Helpim Bilong Ol Lain i Karim Hevi Bilong Domestik Vailens

Wol Helt Oganaisesen i tok: “Long olgeta hap bilong graun, ol man i paitim na bagarapim ol meri. Dispela hevi i olsem wanpela bikpela sik, olsem na em i bikpela samting long yumi mas mekim sampela samting bilong stopim dispela hevi.” Dispela oganaisesen i tok, klostu 30 pesen “bilong olgeta meri em ol i marit o ol i gat boipren i bin karim hevi long poroman marit o boipren bilong ol i paitim ol o bagarapim ol na mekim pasin sem long ol.” Na wanpela ripot bilong Yunaitet Nesen i tok insait long wanpela yia i no longtaim i go pinis, long graun olgeta inap olsem 137 meri i lusim laip bilong ol long olgeta wan wan de bikos poroman marit o boipren bilong ol o wanpela wanfamili i kilim ol i dai.a

Ol ripot i soim klia olsem domestik vailens em i wanpela bikpela hevi tru, tasol ol i no stori long tingting na filings bilong ol viktim na bikpela pen ol i karim.

Olsem wanem? Yu wanpela viktim bilong domestik vailens? O yu save long wanpela em i viktim bilong domestik vailens? Sapos olsem, orait skelim ol dispela poin em Baibel i kamapim bilong givim helpim.

Em i no asua bilong yu na yu karim dispela hevi

I gat helpim i stap

Yu no stap wanpis

Domestik vailens bai pinis

Hau yu ken helpim wanpela viktim

Em i no asua bilong yu na yu karim dispela hevi

Tok Baibel i mekim: “Yumi olgeta wan wan bai tokaut long God long as bilong ol samting yumi bin mekim.”—Rom 14:12.

Tingim dispela: Asua i stap long man i paitim yu o i bagarapim yu.

Sapos poroman marit o boipren bilong yu i sutim tok olsem em asua bilong yu na em i paitim yu o bagarapim yu, orait tok bilong em i no tru. I stret long ol man marit i mas laikim meri bilong ol, na ol i no ken paitim ol o bagarapim ol.—Kol. 3:19.

Sampela taim, man i save paitim o bagarapim meri bilong em bikos em i gat sik bilong tingting, o em i kamap bikpela long famili we ol i save paitim na bagarapim ol narapela, o ating em i man bilong dring planti alkohol. Maski i olsem, God bai skelim em long pasin em i mekim long yu. Na em i mas mekim sampela samting bilong senisim pasin bilong em.

I gat helpim i stap

Tok Baibel i mekim: “Gutpela samting i kamap taim man i kisim tingting bilong planti edvaisa.”—Provep 15:22.

Tingim dispela: Sapos yu pilim olsem yu no stap seif o yu no save long rot bilong lukautim yu yet, orait ol narapela i ken helpim yu.

Wai na yu mas kisim helpim long ol narapela? Sapos yu karim hevi bilong domestik vailens, i gat planti samting em yu inap tingting long en. Ating yu pilim hatwok long makim samting yu bai mekim bikos yu no save wanem samting em i bikpela samting moa, olsem:

• Seifti bilong yu

• Hau long lukautim gut ol pikinini bilong yu

• Hau long lukautim gut yu yet long sait bilong mani

• Pasin laikim yu gat long poroman marit bilong yu

• Yu laik tru long seivim marit bilong yu sapos poroman marit i senisim pasin bilong em

Em nomol long yu tingting planti na pilim olsem yu no save long samting yu mas mekim. Yu inap kisim helpim long husat?

Wanpela pren yu trastim o wanpela insait long famili i ken helpim yu long ol samting yu nidim na long sait bilong bel na tingting tu. Taim yu toktok wantaim wanpela husat i save tingim yu, dispela inap helpim yu tru.

Ol hotlain bilong helpim ol viktim bilong domestik vailens i stap bilong ol i ken ring long en na kisim helpim kwiktaim. Ol lain i wok long ol dispela hotlain i ken helpim yu long wokim wanpela plen bilong seifti bilong yu. Sapos poroman marit bilong yu i luksave olsem em i mas kisim helpim bilong lusim pasin bilong paitim na bagarapim yu na em i laik tru long mekim olsem, orait em i ken kisim helpim long wanpela hotlain bilong save long ol samting em i mas mekim pastaim.

Ol narapela helpim long sait bilong imejensi i stap sapos yu bungim hevi na yu nidim helpim kwiktaim. Olsem, yu inap kisim helpim long ol dokta na ol nes samting em ol i kisim trening bilong givim helpim long taim bilong imejensi.

Yu no stap wanpis

Tok Baibel i mekim: “Jehovab i save stap klostu long ol manmeri em hevi i daunim tru ol; na em i save kisim bek ol manmeri bel bilong ol i bagarap.”—Buk Song 34:18.

Tingim dispela: God i tok promis long helpim yu.

Jehova i save wari tru long yu. (1 Pita 5:7) Em i kliagut long tingting tru i stap long bel bilong yu na filings bilong yu. Em i ken mekim isi bel bilong yu long rot bilong tok bilong em long Baibel. Na em i invaitim yu long beten long em. Taim yu beten, yu ken askim em long givim yu savetingting na strong yu nidim bilong karim hevi bilong yu.—Aisaia 41:10.

Domestik vailens bai pinis

Tok Baibel i mekim: “Olgeta wan wan bai stap aninit long rop wain na diwai fik bilong em yet, na i no gat wanpela bai mekim ol i pret.”—Maika 4:4, futnot.

Tingim dispela: Baibel i tok promis olsem klostu nau, taim bai kamap na olgeta man bai stap bel isi long haus bilong ol wan wan.

God Jehova wanpela tasol inap pinisim tru olgeta hevi bilong yumi, na ol dispela hevi i no inap kamap gen. Baibel i tok promis olsem: “Em bai mekim drai aiwara i stap long ai bilong ol, na bai i no gat dai moa, na ol bai i no bel hevi moa na krai moa, na ol bai i no inap pilim pen gen.” (Revelesen 21:4) Long dispela taim, ol man bai i no tingim gen ol pen na hevi bilong bipo, nogat. Ol bai tingim ol gutpela gutpela samting i kamap long dispela taim. (Aisaia 65:17) Dispela em tok promis Baibel i mekim long gutpela sindaun yu inap kisim long bihain we olgeta man bai stap bel isi tru.