Yu Tingim Yet?

Olsem wanem? Yu bin amamas long ritim ol tok bilong ol nupela Wastaua? Yu ken traim bekim ol dispela askim i stap daunbilo:

• Pikinini i stap yet long bel bilong mama i dai, yu ting em bai inap kirap bek?

Laip i kirap taim mama i kisim bel. Jehova inap kirapim bek man maski em i gat wanem krismas, long wanem, “em inap mekim olgeta samting.” (Mk. 10:27) Tasol Baibel i no tokaut stret olsem em bai kirapim bek pikinini i dai long bel o nogat.​​—4/15, pes 12, 13.

• Yumi ken kisim wanem skul long ol anis, ol mumut, ol grasopa, na ol geko?

Dispela 4-pela samting i kamapim klia gutpela tingting. Olsem na ol i litimapim savetingting bilong God. (Snd. 30:​24-​28)​​—4/15, pes 16-​19.

• Wanem samting i bin kamap long yia 1909na i bikpela yia long ol Witnes Bilong Jehova?

Long 1909, hetkota bilong Watch Tower Bible and Tract Society, em koporesen ol Witnes Bilong Jehova i yusim bilong prinim buk na i stap long Pittsburgh, Pennsylvania, em i muv i go long Brooklyn, New York, na dispela hap i stap yet olsem ples bilong prinim buk.​​—5/1, pes 22-​24.

• Bilong wanem Baibel i mekim gutpela tok long pasin bilong pasim maus?

Baibel kamapim olsem pasin bilong pasim maus em mak bilong soim rispek, na em i makim olsem yumi gat gutpela tingting na pasin bilong skelim gut ol samting, na em i helpim yumi long tingim tingim ol samting long bel. (Sng. 37:7; 63:6; Snd. 11:12)​​—5/15, pes 3-5.

• Wanem samting long John Wycliffe, William Tyndale, Robert Morrison, na Adoniram Judson i wankain?

Ol i laikim tumas Tok Bilong God na ol i tanim long kain kain tok ples em ol man i save ritim. Wycliffe na Tyndale i tanim i go long tok Inglis, Morrison i tanim long tok ples Saina, na Judson i tanim long tok ples Burma (Mianma).​​—6/1, pes 8-​11.

• Hamas king bilong Juda i kamapim olsem ol i laikim tumas haus bilong God?

Naintin king i bosim Juda long hap saut, na 4-pela i mekim wok i soim klia olsem ol i laikim tumas lotu i tru​​—Asa, Jehosafat, Hesekia, na Josaia.​​—6/15, pes 7-​11.

• Yu ting olgeta Kristen God i makim ol i insait long wok bilong givim kaikai bilong spirit?

Nogat. Olgeta Kristen God i bin makim ol i insait long lain wokboi i gat gutpela tingting, tasol ol lain em ol i insait long Gavening Bodi ol tasol i bosim wok bilong givim kaikai bilong spirit.​​—6/15, pes 22-​24.

• Bilong wanem ol soldia bilong Rom i laikim tumas siot bilong Jisas?

Ol soldia i insait long wok bilong kilim Jisas i dai ol i no laik brukim siot bilong em. Ol i save samapim ol siot long tupela hap laplap, tasol siot bilong Jisas ol i wokim long wanpela laplap tasol, na dispela i mekim dispela siot i gat bikpela pe.​​—7/1, pes 22.

• Bilong wanem yumi ken tok pasin laikim em nambawan gutpela pasin bilong Jisas na dispela pasin bilong em i narapela kain long ol hetman bilong lotu?

Ol hetman bilong lotu long dispela taim ol i no laikim ol man nating, nogat. Ol i nolaik tru long ol. Na tu, ol i no laikim God. Jisas i laikim tru Papa bilong em na em i sori tru long ol man. (Mt. 9:​36) Em i mekim gut tru long ol na i pilim hevi bilong ol.​​—7/15, pes 15.

• Bilong wanem pasin bilong bosim gut mani inap stap olsem wanpela hevi long marit, na wanem samting inap helpim ol long winim?

Planti taim ol marit i tok pait bilong mani, long wanem, narapela i no bilip tumas long poroman, o ol i gat pasin bilong pret, o ating ol i bin kamap bikpela long narapela narapela sindaun. Fopela rot bilong helpim, em: Lain long mekim tok isi taim yu toktok long mani, wanbel long tingting bilong yupela long mani yupela i kisim, raitim long pepa baset bilong famili, na wanbel long husat bai mekim wanem wok.​​—8/1, pes 10-​12.