“Ol Pikinini i Gat Rait Long Save Long God”
LONG Disemba 9, 2008, wanpela lain (Swedish Academy for the Rights of the Child) i mekim wanpela spesel bung nem bilong en, “Ol Pikinini i Gat Rait Long Save Long God.” Ol mausman bilong ol lotu, olsem Sios Bilong Swiden, Islam, ol narapela lotu bilong Kristendom, na ol lain i tingim sindaun bilong ol man, ol i kamapim narapela narapela tingting long dispela samting.
Namel long ol dispela mausman, i gat wanpela pasto, em i tok: “I hatwok long ol man i stori stret long olsem wanem ol stori bilong Baibel inap mekim bikpela samting long pasin bilong ol pikinini long save long God.” Olsem wanem ol tok bilong Baibel i helpim ol pikinini long kisim save long God?
Dispela pasto i tok: “Ol tok na stori bilong Baibel i givim rot long ol pikinini long ol yet i ken tingim tingim long bel ol tok ol i ritim.” Em i kolim ol stori olsem, “stori bilong Adam na Iv, Kein na Abel, Devit na Goliat, mama i karim Jisas, Sakius em man bilong kisim takis, stori bilong pikinini i lusim papa, na man Samaria.” Em i tok ol dispela stori em “sampela gutpela stori bilong helpim na stiaim tingting [bilong pikinini] long tingim sampela bikpela samting long i stap bilong ol man olsem pasin trik, lusim rong, pasin bilong heitim narapela, pasin nogut, kamap wanbel wantaim narapela, na pasin bilong laikim tru narapela.” Em i tok moa olsem: “Ol tok bilong Baibel i soim pasin em man yet i ken bihainim long laip bilong em.”
Olsem na em i gutpela samting tru long kirapim ol pikinini long ritim Baibel. Tasol olsem wanem? Ol pikinini yet inap “tingim tingim long bel” ol tok bilong Baibel ol i ritim na kisim stretpela tingting long en?
Wankain olsem ol pikinini, ol bikpela man tu i mas i gat wanpela i kamapim gut insait bilong ol tok bilong Baibel long ol. Olsem, Baibel i tokim yumi long wanpela man husat i no bin kliagut long ol tok bilong God, maski em yet i bin “tingim tingim long bel” ol dispela tok. Dispela man em wanpela man Itiopia. Em i bin ritim tok profet bilong Aisaia, tasol em i no bin kliagut long mining bilong en. Em i laik kliagut long tok bilong profet, olsem na em i orait long disaipel Filip i kamapim gut mining bilong dispela tok. (Ap. 8:26-40) Wankain olsem dispela man Itiopia, yumi olgeta—na moa yet ol pikinini—i mas kisim helpim bilong kliagut long ol tok bilong Baibel.
Baibel i givim tok lukaut long yumi olsem: “Ol pikinini i save mekim olkain longlong pasin.” (Snd. 22:15) Ol pikinini i mas i gat man i soim rot na stiaim ol, na ol papamama bilong ol i gat wok long skulim ol long stretpela pasin na ol samting bilong spirit—em ol tok i kam long Baibel na ol tok i kamap long ol miting Kristen i as bilong en. Ol pikinini i gat rait long kisim kain skul olsem. Taim ol i liklik yet, ol i mas kisim helpim bilong save gut long ol tok bilong Baibel na bai ol i ken save gut long God na kamap olsem ‘ol man i bikpela pinis em ol i bin traim planti taim long skelim wanem ol pasin i gutpela na wanem ol pasin i nogut, na nau ol i save gut pinis na tingting bilong ol i klia.’—Hi. 5:14.