Olsem Wanem? Tingting Bilong Yumi Long Sin i Senis?
BIPO, ol manmeri bilong lotu ol i bin harim pasto i toktok strong long “sevenpela sin i nogut tru”—bel i kirap, kaikai planti tumas, strongpela laik long kisim mani samting, pasin bilong les, belhat, bel nogut, na pasin antap. Na pasto i bin tokaut strong long pe nogut bilong sin na em i bin kirapim ol man long tanim bel. Tasol wanpela man bilong raitim buk i tok: “Long nau, planti pris pasto i no toktok moa long sin—ol i save toktok long ol samting lain bilong ol i laik harim na dispela i ‘mekim gut bel bilong ol.’”
Sampela niusman tu i lukim dispela kain pasin i kamap. Daunbilo i gat sampela tok ol nius i kamapim:
▪ “Ol tok ol i bin mekim bipo long sin, tanim bel, na kisim bek man, ol man bilong nau i no laik harim dispela kain tok; ol i laik harim ol tok i mekim gut bel bilong ol, olsem amamas long ol yet, na laikim tumas ol yet.”—Star Beacon, Ashtabula, Ohio.
▪ “Ol man i no save tingting moa long sin na ol i no pret moa long mekim sin.”—Newsweek.
▪ “Yumi no save askim moa olsem ‘God i laik bai mi mas mekim wanem?’ Yumi save askim, ‘God i ken mekim wanem bilong helpim mi?’”—Chicago Sun-Times.
Long nau ol man bilong kain kain lain na tokples i sindaun wantaim na ol i gat ol narapela narapela tingting, olsem na ol man i no laik skelim pasin bilong ol narapela—ol i orait tasol long en. Ol i save tok, i no stret long skelim man. Na i luk olsem em i bikpela sin tru long skelim pasin bilong narapela man. Olsem na planti man i tingting olsem: ‘Samting yu bilip long en, ating em bai i gutpela long yu, tasol yu no ken subim narapela man long kisim wankain tingting olsem yu. Long nau, ol man i gat ol narapela narapela kain lo i bosim i stap bilong ol. Man i no ken ting em tasol i save wanem samting i stret. Tingting bilong ol narapela tu i stret.’
Dispela kain tingting i mekim na long nau yumi no save harim tumas dispela tok “sin.” Planti man i save mekim tok pilai long en. Bipo, taim man na meri i sindaun nating wantaim, ol man i tok ol i “mekim sin.” Tasol long nau ol i orait tasol long dispela pasin. Na ol i no gat tok moa long ol marit i slip wantaim narapela i no poroman marit bilong ol. Na man i slip wantaim man, ol man i tok i no gat rong long en—ol i laikim “narapela kain sindaun.”
Tru tumas, tingting bilong ol man long wanem pasin i “orait” o em i “sin,” dispela tingting i senis. Tasol wanem samting i mekim na tingting bilong ol i senis? Ating i no gat sin moa o olsem wanem? Na tingting bilong yu long dispela, em i bikpela samting o nogat?