Yu Ting God i Givim Strafe?
“Mi sori long ol lain i kisim bagarap, tasol mi ting [em] tembatsu (strafe i kam long God).” Em tok bilong wanpela politisen long Japan taim wanpela bikpela guria tru (strong bilong en 9.0) na sunami i bin kamap long Japan long Mas 2011.
Taim 220,000 manmeri i dai long bikpela guria i kamap long Haiti long Janueri 2010, wanpela evanjelis long TV i tok ol “i save bihainim tru pasin bilong devil,” olsem na ol i mas “tanim bel na bilip long god.”
“Bel bilong yumi i no save kotim yumi moa, olsem na God i laik kirapim gen maus bilong bel long mekim wok.” Dispela em tok wanpela pris Katolik i bin mekim taim 79 manmeri i dai long wanpela pait long Manila, Filipins. Wanpela niuspepa long Filipins i tok, “21 pesen bilong ol manmeri i bilip olsem God i wok long kamapim belhat bilong em long rot bilong graun i bruk, saiklon, na ol narapela disasta” we i save kamap planti taim long kantri.
LONG bipo yet i kam inap long nau, ol man i bilip olsem God i save kamapim ol disasta, olsem bikpela guria na sunami samting bilong givim strafe long ol man nogut. Long 1755, inap 60,000 manmeri i dai long bikpela guria, paia, na sunami i kamap long Lisbon, Potugal, na saveman Voltaire i tok: “Ating i gat planti pasin nogut tru long Lisbon, winim Paris we olkain amamas nogut i pulap tru long en, a?” Tru tumas, dispela i mekim na planti milion manmeri i ting olsem God i yusim ol bikpela disasta bilong givim strafe long ol man. Long planti kantri ol man i tok ol dispela disasta em ol wok bilong God.
Taim yumi tingim olgeta dispela samting, yumi mas askim yumi yet olsem: Tru tru God i yusim ol bikpela disasta bilong givim strafe long ol man? Ol bikpela disasta i kamap long nau em ol strafe i kam long God?
Sampela man i hariap long sutim tok long God, long wanem, ol i tingim ol stori bilong Baibel long God i yusim wara na paia samting bilong bagarapim ol man nogut. (Stat 7:17-22; 18:20; 19:24, 25; Namba 16:31-35) Taim yumi skelim gut ol dispela stori bilong Baibel, bai yumi luksave olsem i gat tripela samting i narapela kain long ol bikpela bagarap God i bin kamapim bipo na ol bagarap i kamap long nau. Namba 1, em i bin givim tok lukaut pastaim. Namba 2, ol bikpela disasta long nau i save kilim i dai ol gutpela man na ol man nogut wantaim, tasol ol bagarap God i kamapim long bipo i pinisim tasol ol man nogut. God i bin bagarapim tasol ol man nogut na ol man husat i sakim ol tok lukaut. Na namba 3, God i bin opim rot bilong ol stretpela manmeri i ken abrusim bagarap.—Stat 7:1, 23; 19:15-17; Namba 16:23-27.
God i no as bilong ol disasta i bagarapim tru sindaun bilong planti milion man long nau. Orait, bilong wanem planti kain disasta olsem i wok long kamap? Olsem wanem yumi inap karim hevi bilong en? Yu ting bai i gat wanpela taim we bai i no gat moa ol disasta? Yu bai painim bekim bilong ol dispela askim long ol atikol i kamap bihain long dispela.