Karim Hevi Bilong Ol Bikpela Disasta

Abrusim ples we hevi inap kamap.

Baibel i tok: “Man i gat gutpela tingting, em i save olsem, hevi i laik kamap long em na em i abrusim. Tasol man i no gat tingting, em i lukim trabel i stap long rot bilong en, na em i go na bungim na karim hevi.” (Sindaun 22:⁠3) Dispela savetok i stret long taim bilong ol disasta. Sapos ol i givim toksave long bikpela bagarap bai kamap long wanpela hap, olsem volkeno, bikpela tait wara, o saiklon samting, orait em savetingting long lusim dispela hap na go long ol hap i seif. Laip em i bikpela samting moa, winim haus o ol narapela samting bilong skin.

Sampela manmeri inap wokim tingting long sindaun long ol ples we bagarap i no inap painim ol. Wanpela lain i tok: “I gat sampela hap bilong graun em oltaim bikpela bagarap i save kamap. Klostu long olgeta taim ol bikpela bagarap i save kamap long ol seim hap bilong graun we ol bagarap i bin kamap bipo, na bihain tu planti moa bagarap bai kamap long ol dispela hap.” Ating dispela tok em i tru long ol ples i stap klostu long nambis o long hap bilong ol volkeno. Sapos yu abrusim hap we ol bikpela disasta inap kamap long en o yu go sindaun long narapela hap i seif moa, yu inap abrusim ol bikpela hevi.

Plenim samting yu mas mekim.

Maski yu bihainim olgeta tok lukaut, yu inap kisim bagarap yet long taim we yu no ting bagarap bai painim yu. Sapos paslain yet yu plenim ol samting yu bai mekim, dispela bai helpim yu taim hevi i kamap. Dispela tok i stret wantaim gutpela tok bilong Sindaun 22:3 em yumi stori pinis long en. Yu redim pinis ol samting yu bai nidim long taim bilong hevi? Buk 1-2-3 of Disaster Education i tok long man i mas redim ol samting olsem: Ol samting bilong fes eid, botol wara, kaikai i no inap bagarap kwik, na ol setifiket o pepa bilong benk samting. I gutpela long famili i ken toktok gut wantaim long wanem kain bagarap inap kamap, na ol bai mekim wanem taim dispela bagarap i kamap.

Pas gut yet wantaim God.

Dispela bai helpim yumi long olgeta kain taim. Baibel i tok long God olsem em i “Papa bilong marimari na God bilong mekim isi bel bilong ol man long olgeta kain taim.” Narapela ves i tok long God olsem em “i save mekim isi bel bilong ol man em bel hevi i daunim ol.”​—⁠2 Korin 1:​3, 4; 7:⁠6.

Tru tumas, God i save gut tru long olgeta hevi i painim ol man i bilip long em. God i gat pasin laikim na long kain kain rot em i save strongim ol manmeri i bilip long em. (1 Jon 4:⁠8) Yumi beten bambai God i givim holi spirit bilong helpim yumi long karim ol hevi, na yumi no beten bilong God i wokim mirakel. Holi spirit inap kirapim man long tingim ol tok bilong Baibel we inap mekim gut bel bilong em taim em i karim hevi. Ol gutpela wokman bilong God inap pilim wankain samting em Devit, king bilong Israel bilong bipo i bin pilim, em i tok: “God, maski mi wokabaut long ples nogut na bikpela tudak, mi no ken pret long samting nogut, long wanem, yu stap wantaim mi. Mi lukim yu i holim stik ol wasman bilong sipsip i save holim, olsem na bel bilong mi i stap isi. Mi no inap bagarap.”​—⁠Song 23:⁠4.

Ol wanbilip Kristen i helpim narapela narapela.

Long taim bilong ol aposel, profet Agabus i tokaut olsem “bikpela hangre bai i kamap long olgeta hap bilong graun. Na dispela hangre i bin kamap long taim bilong Klodius.” Dispela bikpela hangre i putim bikpela hevi tru long planti disaipel bilong Jisas long Judia. Orait, ol disaipel long ol narapela hap i mekim wanem taim ol i harim olsem ol wanbilip bilong ol i karim hevi? Baibel i tok: “Ol disaipel i pasim tok long salim ol samting bilong helpim ol brata i stap long Judia. Na olgeta i givim ol samting inap long skel bilong ol.” (Aposel 11:​28, 29) Long pasin laikim, ol i givim ol samting bilong helpim ol wanbilip i karim hevi.

Long nau taim ol bikpela bagarap i kamap, lain bilong God i save mekim wankain pasin olsem. Ol Witnes Bilong Jehova i gat nem long pasin bilong helpim ol wanbilip bilong ol. Olsem, taim wanpela bikpela guria i kamap long Sili long Februeri 27, 2010, ol Witnes Bilong Jehova i hariap tru long helpim ol manmeri i kisim bagarap. Karla, em sunami i bagarapim haus bilong em, i tok: “Long de bihain stret long taim bagarap i kamap, [ol wanbilip Witnes] bilong ol narapela hap i kam helpim mipela, na dispela i mekim gut bel bilong mi na i strongim mi tru. Jehova i helpim mipela long rot bilong gutpela pasin bilong ol dispela volantia. Mi pilim olsem ol i laikim mi tru na i lukautim mi.” Bubu man bilong Karla i no wanpela Witnes, tasol em i lukim dispela wok helpim na i tok: “Dispela i narapela kain tru long samting mi lukim inap planti yia pinis insait long sios bilong mi.” Samting em i lukim i kirapim em long askim ol Witnes Bilong Jehova long stadi wantaim em long Baibel.

Pasin bilong pas gut wantaim ol manmeri husat i laikim tru God, dispela bai helpim tru yumi long taim bilong hevi. Maski i olsem, yu ting bai i gat wanpela taim we graun bai i no gat moa ol disasta? Yumi ken lukim tok Baibel i mekim bilong bekim dispela askim.