Taim Tineja i Gat Tupela Tingting Long Lotu Bilong Yu

YU BILIP tru olsem lotu bilong yu i skulim ol man long stretpela save long God, na Baibel i helpim ol man long bihainim nambawan gutpela rot bilong laip. Olsem na yu gat bikpela laik long skulim pikinini bilong yu long ol dispela samting em yu yet i bilip long en. (Lo 6:6, 7) Tasol olsem wanem sapos pikinini bilong yu i wok long kamap bikpela na em i no tingim moa ol samting bilong lotu? Olsem wanem sapos em i stat long kisim tupela tingting long lotu em i bin amamas long bihainim taim em i liklik?—Galesia 5:7.

Sapos dispela samting i kamap, no ken ting olsem yu no bin mekim gut wok olsem papamama Kristen. Ating i gat ol narapela samting i kirapim em long kisim dispela tingting, na bai yumi skelim dispela. Tasol tingim: Wanem ol tok na pasin yu mekim bilong stretim tingting bilong pikinini, dispela bai kirapim em long insait moa long lotu o lusim lotu. Sapos yu kirap long tok pait wantaim pikinini long dispela samting, dispela bai kirapim bikpela kros na bai yu no inap helpim em.—Kolosi 3:21.

I gutpela moa long yu bihainim tok bilong aposel Pol, em i tok: “Wokboi bilong Bikpela i no gat wok long pait, nogat. Em i gat wok long isi long olgeta man, na save gut long skulim ol man, na bosim gut em yet.” (2 Timoti 2:24) Taim pikinini bilong yu i gat tupela tingting long lotu bilong yu, olsem wanem yu inap soim olsem yu gat pasin bilong “save gut long skulim ol man”?

Skelim Gut Tingting

Pastaim, traim long skelim wanem samting i mekim na pikinini bilong yu i kisim dispela tingting. Olsem:

• Ating em i pilim olsem em i stap wanpis na i no gat pren insait long kongrigesen Kristen. “Mi laikim sampela pren, olsem na mi pas gut wantaim sampela wanskul bilong mi na inap planti yia dispela i pasim mi long i go klostu long God. Mi no tingim moa pasin bilong lotuim God, long wanem, mi gat ol poroman nogut, na nau mi rigret long planti samting.”—Lenore, 19.

• Ating em i no gat konfidens na dispela i mekim na em i hatwok long autim bilip bilong em. “Taim mi stap long skul, mi surik long autim bilip long ol wanklas. Mi pret, nogut ol i ting mi narakain na ol i kolim mi ‘lotu boi.’ Ol wanklas i no save laikim ol pikinini i stap narapela kain, na mi no laik bai dispela samting i kamap long mi.”—Ramón, 23.

• Ating em i pilim hatwok tumas long bihainim ol lo Kristen. “Mi pilim olsem tok promis bilong Baibel long laip oltaim em samting i stap longwe tru long mi, i olsem em i stap antap tru long wanpela longpela lata, na mi no sanap yet long dispela lata. Mi pret tru na dispela i mekim na mi tingting long lusim bilip.”—Renee, 16.

Toktok Gut Wantaim Pikinini

Wanem samting i givim hatwok long pikinini bilong yu? Gutpela rot bilong painimaut em long askim em! Tasol was gut bambai toktok bilong yupela i no ken kamapim tok pait. I gutpela yu bihainim tok bilong Jems 1:19: “Olgeta man i mas putim yau kwik long harim tok, na ol i no ken hariap long mekim toktok. Na ol i no ken belhat hariap.” Mekim pasin isi. Yu mas bihainim pasin bilong ‘no ken les kwik na mekim gutpela wok tisa,’ wankain olsem pasin yu bai mekim long wanpela man i no wanfamili.—2 Timoti 4:2.

Olsem, sapos pikinini i no laik go long ol miting Kristen, traim painimaut sapos i gat wanpela samting em i tingting planti long en. Tasol mekim long pasin isi. I no gat gutpela samting bai kamap sapos papamama i mekim kain pasin olsem i stap daunbilo.

Pikinini: Mi no laik go moa long ol miting.

Papa: [strongpela nek] Wai na yu tok yu no laik go?

Pikinini: Mi pilim olsem ol miting i boring, em tasol!

Papa: Yu pilim olsem tu long God, a? Yu ting God em i boring? Sori tru, taim yu stap yet long haus bilong mipela, oltaim yu mas kam wantaim mipela long ol miting!

God i laik ol papamama i mas skulim ol pikinini long God, na ol pikinini i mas bihainim tok bilong papamama. (Efesus 6:1) Tasol yu no laik bai pikinini i bihainim nating ol pasin bilong lotu na skin les wantaim na bihainim yu i go long ol miting Kristen. Yu laik bai tingting na bel bilong em yet i kirapim em long go long ol miting.

Yu inap tru long helpim em sapos yu painimaut as na em i no laik insait moa long ol samting bilong lotu. Tingim toktok i bin kamap namel long papa na pikinini, na skelim olsem wanem yu inap mekim dispela toktok i kamap gutpela moa:

Pikinini: Mi no laik go moa long ol miting.

Papa: [long pasin isi] I gat wanem as na yu pilim olsem?

Pikinini: Mi pilim olsem ol miting i boring, em tasol!

Papa: Em tru, taim yu sindaun 1-pela o 2-pela aua yu inap pilim olsem skin i les. Wanem samting long miting i givim bikpela hatwok moa long yu?

Pikinini: Mi no save. Mi pilim olsem i gutpela mi stap long sampela narapela hap.

Papa: Ol pren bilong yu tu i pilim olsem?

Pikinini: Em dispela samting tasol! Nau mi no gat moa wanpela pren. Taim bes pren bilong mi i go stap long narapela hap, mi pilim olsem mi no gat wanpela bilong toktok wantaim! Olgeta narapela i stap amamas. Mi tasol, nogat!

Taim papa i kirapim pikinini long toktok, em i kisim save long as na pikinini i no laik go moa long ol miting—em i pilim olsem em i stap wanpis—na tu, dispela bai kirapim pikinini long trastim papa, na pikinini bai amamas long toktok moa wantaim em.—Lukim blok “No Ken Les Kwik!”

Planti yangpela i bin lain olsem sapos ol i winim ol hevi we i pasim ol long i go klostu moa long God, ol i save amamas moa long ol yet na long bilip bilong ol. Tingim Ramón, em pastaim yumi stori long em olsem em i bin surik long tokaut long ol wanskul olsem em i wanpela Kristen. Bihain Ramón i luksave olsem taim em i tokaut long bilip bilong em, dispela i no putim bikpela hevi long em olsem em i bin ting—maski sampela i tok bilas long em. Em i tok:

“Wanpela taim, wanpela mangi long skul i tok bilas long lotu bilong mi. Mi pret nogut tru, long wanem, mi pilim olsem klas olgeta i putim yau i stap. Orait mi kirap tromoi askim i go bek long em, na mi askim em long bilip bilong em. Mi kirap nogut long lukim olsem em i pret nogut tru winim mi! Long dispela taim mi luksave olsem planti yangpela i gat ol bilip bilong lotu, tasol ol yet i no kliagut long en. Mi amamas olsem mi inap eksplenim ol samting mi bilip long en. Olsem na long taim bilong stori long ol bilip bilong lotu, i stret ol wanklas i pilim nogut—mi nogat!”

“Gutpela Tingting” Bilong Pikinini

Ol papamama na ol saveman i skelim olsem tingting na pasin bilong ol liklik pikinini i narapela kain olgeta long tingting na pasin bilong ol tineja. (1 Korin 13:11) Ol liklik pikinini i save bilipim olgeta kain tok, tasol ol tineja nogat, ol i save skelim gut ol samting. Olsem: Papamama inap skulim liklik pikinini olsem God i wokim olgeta samting. (Stat 1:1) Tasol ating tineja inap kisim tingting olsem: ‘Olsem wanem mi inap save olsem i gat God i stap? Bilong wanem God bilong pasin laikim inap larim pasin nogut i stap? Wanem samting i soim olsem God i bin stap oltaim, na i no gat kirap o pinis bilong em?’—Song 90:2.

Ating yu inap pilim olsem ol kain askim olsem inap makim olsem pikinini bilong yu i wok long lusim bilip. Tasol tru tru, ating dispela i makim olsem bilip bilong em i wok long kamap strong. Tingim, pasin bilong kamapim askim em i bikpela samting bilong helpim wanpela Kristen long kamap strong long bilip.—Aposel 17:2, 3.

Na tu, tineja i wok long lain long yusim “gutpela tingting.” (Rom 12:1, 2) Taim em i mekim olsem, em inap kliagut moa long ‘bikpela, longpela, antap na daunbilo’ bilong bilip Kristen, em samting em i no bin kliagut long en taim em i stap liklik pikinini. (Efesus 3:18) Winim olgeta taim bipo, nau em i taim bilong helpim tineja bilong yu long wokim tingting na skelim ol bilip bilong em bambai bilip bilong em i ken kamap strong.—Sindaun 14:15; Aposel 17:11.

‘Helpim Em Long Bilip’

Baibel i stori olsem yangpela man Timoti i bin lain long ol rait holi kirap long taim em i “stap bebi yet.” Maski i olsem, aposel Pol i tokim Timoti: “Bihainim yet ol samting ol arapela i bin lainim yu long en na helpim yu long bilip long en.” (2 Timoti 3:14, 15) Olsem Timoti, ating yu bin skulim pikinini long ol lo bilong Baibel kirap long taim em i bebi yet. Tasol nau yu mas kirapim em long em yet i mas kisim pasin bilong bilip.

Buk Questions Young People Ask—Answers That Work, Volume 1, i tok: “Taim tineja i stap yet long haus bilong yu, i stret em i mas bihainim ol tok bilong yu long ol samting bilong lotu. Tasol bikpela samting em olsem, yu laik putim pasin bilong laikim tru God i go daun long bel bilong tineja—na i no bilong mekim em i bihainim nating wanpela kain pasin i stap pinis.” Taim yu tingim dispela samting, yu inap helpim tineja long “sanap strong long bilip” na dispela bai kamap pasin bilong em yet—na i no pasin bilong yu tasol.b—1 Pita 5:9.