Ntsombano Wa Muganga Wa “Ku Xixima Xikwembu” Wu Tshinele

Masiku manharhu lama vuyerisaka ya vuleteri bya Bibele ma ku rindzerile eNtsombanweni wa Muganga wa “Ku Xixima Xikwembu” wa Timbhoni ta Yehovha. Edzongeni wa Afrika ntsena, ku hleriwe mintsombano yo tlula 20 eku heleni ka lembe. Kutani u nga kota ku ya eka lowu nga ekusuhi ni laha u tshamaka kona.

Ntsombano wu ta sungula hi vuyimbeleri hi 10:20 ni mixo hi Ravuntlhanu, naswona nongonoko wa siku rero wu ta pfala kwalomu ka awara ya ntlhanu ni ndzhenga. Hi Mugqivela ni Sonto, minongonoko yi ta sungula hi 9:30 ni mixo, ivi yi hela kwalomu ka awara ya ntlhanu hi Mugqivela ni ndzhenga kasi hi Sonto yi ta hela hi 4:15 ni ndzhenga.

Nkulumo-nkulu hi Ravuntlhanu ni mixo yi ta kombisa leswi ku xixima Xikwembu ku nga swona yi tlhela yi hlamusela mimbuyelo leyi kumiwaka hi lava hlakulelaka ku xixima ko tano. Nongonoko hinkwawo wa ntsombano wu ta kandziyisa mimbuyelo leyi.

Enxaxamelweni lowu nga ta teka awara wa tinkulumo ni minkombiso hi Ravuntlhanu ni ndzhenga, u ta twa leswaku ku xixima Xikwembu ku nga byi tiyisa njhani vukati ni vutomi bya ndyangu, kun’we ni ndlela leyi ku nga va pfunaka ha yona vantshwa leswaku va tshama va tiyile, va tshemba Xikwembu. Minongonoko ya Ravuntlhanu yi ta gimeta hi nkulumo leyi tsakisaka leyi nge “Nchavelelo Eka Lava Feriweke.” U ta tlangela mpfuno lowu tirhaka lowu nga ta nyikeriwa enkulumeni yoleyo, mpfuno wo seketela lava loveriweke hi varhandziwa va vona.

Nongonoko wa Mugqivela wu ta kombisa ndlela leyi ku xixima Xikwembu ku nga tiyisaka ha yona ku khomelela ka hina eka nkongomiso wa Yehovha malunghana ni vandlha ni vutirheli bya hina. Nkulumo leyi nge “Vanhu Lava Nga Fularheriwiki Hi Yehovha” yi ta hlamusela ndlela leyi xitshembiso xa Xikwembu xa ku ka xi nga fularheli vanhu va xona xi faneleke xi va khumba ha yona emisaveni ya namuntlha. Endzhaku, hi ndzhenga, enkulumeni leyi nge “Hlaya Rito Ra Xikwembu, Bibele Yo Kwetsima, Siku Na Siku,” vapfhumba va ta kuma swiringanyeto leswi tirhaka swa ku hlaya ni ku dyondza Bibele. Nongonoko wa Mugqivela wu ta gimeta hi nkulumo leyi nga ni xihloko lexi pfuxaka ku tsakela lexi nge “Siku Ra Yehovha Leri Chavisaka Ri Kusuhi.”

Xiphemu xa nkoka xa nongonoko wa Sonto i nkulumo leyi nge “Ku Ta Va Ni Ku Pfuka Ka Lavo Lulama.” Enkulumeni leyi landzelaka, “Ku Ponisiwa eNhlomulweni Lowukulu,” ku ta nyikiwa nhlamuselo ya xitshembiso xa Yesu lexi hlamarisaka malunghana ni lava va nga ta ka va nga fi nikatsongo.—Yohane 11:26.

Nongonoko wa Sonto ni mixo wu ta pfala hi drama leyi tlhontlhaka mianakanyo ya timinete ta 40 leyi nge Swiboho Leswi U Langutaneke Na Swona. Vayingiseri va ta tlheriseriwa le ndzhaku enkarhini wa Yoxuwa naswona va ta vona xikombiso xa ku tiyimisela ka yena ku tirhela Yehovha. Va ta tlhela va vona ndzingo lowu chavisaka wa masiku ya Eliya, naswona ku ta kumiwa tidyondzo letinene eka swiendlakalo leswi swimbirhi, leti nga ta pfuna vapfhumba leswaku va kombisa ku xixima Xikwembu namuntlha.

Yinhla-nkulu ya ntsombano hi Sonto ni ndzhenga ku ta va nkulumo ya le rivaleni leyi nge, “Lexi Endlaka Leswaku U Xixima Xikwembu Xa Ntiyiso Sweswi.” Kunene u ta vuyeriwa loko wo va kona masiku lawa manharhu hinkwawo! U rhambiwa hi mbilu hinkwayo leswaku u va kona. Leswaku u tiva ndhawu leyi nga ekusuhi ni kaya ra wena, vutisa eHolweni ya Mfumo ya Timbhoni ta Yehovha endhawini ya ka n’wina, kumbe u tsalela vakandziyisi va magazini lowu.

[Laha Xifaniso Xi Humaka Kona eka tluka 32]

T. Rosenthal/SUPERSTOCK