Ku Ta Sala Vukhongeri Byin’we
ANAKANYA leswaku a swi ta va njhani loko vanhu hinkwavo emisaveni a vo hlangana eka vukhongeri byin’we, evugandzerini byin’we lebyi tengeke bya Xikwembu xin’we ntsena xa ntiyiso. Sweswo a swi ta tisa vun’we hakunene! A ku nga ha ta va na ku nga twanani, minkitsikitsi kumbe tinyimpi ta vukhongeri. Xana lowu ko va norho ntsena? Doo. Xivono xa muapostola Yohane xa ku herisiwa ka muoswi, mfumo wa misava wa vukhongeri bya mavunwa, xi hlamusela leswaku ku ta sala muxaka wa vugandzeri byin’we ntsena loko se a herisiwile. Hi byihi?
Rito leri Yohane a ri tweke loko a ri etilweni ri hi pfuna ku kuma nhlamulo: “N’wina vanhu va mina, humani mi n’wi siya leswaku mi ta kala mi nga ngheni eswidyohweni swa yena, mi ta kala mi nga weriwi hi maxangu ya yena.” (Nhlavutelo 18:4) Swi le rivaleni leswaku laha Xikwembu hi xoxe xi vulavula ni vanhu va xona. Xiya leswaku a xi lerisi vanhu va xona ku katsakatsana ni muoswi ematshalatshaleni ya yena ya misava hinkwayo ya ku n’wi ponisa hi ku n’wi pfuna leswaku a hundzukela emahanyelweni yo basa. Doo, eka yena ku hava n’anga. Hikwalaho, u va lerisa ku huma ni ku n’wi siya leswaku va nga totiwi hi swidyoho swakwe leswo chavisa naswona va papalata ku tikuma eku heteleleni va avanyisiwa ni ku herisiwa swin’we na yena.
Xileriso xa le tilweni xa leswaku “humani mi n’wi siya” xi tlhela xi pfuna ni valavi va ntiyiso ku tiva vanhu va Xikwembu. Va nga ha tivutisa, ‘I vanhu vahi namuntlha emisaveni lava hlayiseke xileriso lexi hi ku huma evukhongerini, enhlengeletanweni, kumbe evandleni rihi na rihi ra vagandzeri leri tirhisanaka na “Babilona Lonkulu”? (Nhlavutelo 18:2) Xisweswo i vanhu vahi namuntlha emisaveni lava va tintshunxeke etidyondzweni, emilawini, emaendlelweni, ni le mikhuveni ya Babilona hinkwayo?’ Xana ku nga va mani handle ka Timbhoni ta Yehovha? Exikarhi ka Timbhoni to tlula 5,2 wa timiliyoni leti nga ematikweni yo tlula 230, hinkwavo lava va nga tshama va landzela vukhongeri byo karhi bya Babilona, ku nga ha va hi ku velekeriwa eka byona kumbe hi ku hundzuleriwa eka byona, va byi tshike hi ndlela leyi nga erivaleni—minkarhi yin’wana ku nga khathariseki ku kanetiwa ni nxaniso wa maxaka, wa vanghana, ni wa varhangeri va vukhongeri.
Xikombiso xin’wana i xa Henry, wanuna wa le Afrika Dzonga, loyi a a ri mukhomi wa nkwama ekerekeni ya vona naswona a a yi rhandza hi mbilu hinkwayo. Kambe a a ri eku laveni ka ntiyiso, kutani siku rin’wana a amukela dyondzo ya mahala ya Bibele ya le kaya ni Timbhoni ta Yehovha. Hi ku famba ka nkarhi u kunguhate ku va Mbhoni, u byele mufundhisi, loyi hi tlhelo a a ri muakelani wakwe, leswaku a a lava ku tshika kereke.
Mufundhisi u hlamale ngopfu ivi endzhaku a rhamba mufambisi ni swirho swin’wana swa kereke leswaku va ya endzela Henry. Va n’wi vutise leswaku ha yini a tshika kereke, a ya va xirho xa vukhongeri lebyi hi ku ya hi vona, a byi nga ri na moya lowo kwetsima wa Xikwembu. Henry u ri: “Eku sunguleni, a ndzi chava ku va hlamula, hikuva a va ri ni nkucetelo lowukulu eka mina. Kambe ndzi khongele eka Yehovha leswaku a ndzi pfuna, kutani u ndzi endle ndzi kota ku tihlamulela: ‘Xana eka vukhongeri hinkwabyo bya misava, hi byihi lebyi nkarhi na nkarhi byi tirhisaka vito ra Xikwembu, Yehovha? Xana a hi Timbhoni ta Yehovha? Xana mi anakanya leswaku Xikwembu a xi ta va pfumelela ku byarha vito ra xona, kutani xi nga va nyiki moya wa xona lowo kwetsima?’” Varhangeri va kereke va tsandzeke ku kaneta mianakanyo leyi, kutani sweswi Henry i un’wana wa Timbhoni ta Yehovha.
Hikwalaho loko rito ra le tilweni ri lerisa ri ku: “Humani mi n’wi siya,” ku kona laha u nga yaka kona. (Nhlavutelo 18:4) Ku ni vanhu, vagandzeri va Xikwembu xa ntiyiso, Yehovha, lava u nga balekelaka eka vona. Timiliyoni ti balekile. Ti tiviwa ti ri Timbhoni ta Yehovha, ti vumba vumakwerhu bya matiko hinkwawo bya Vukreste, ti hleleke hi mavandlha yo tlula 78 600, kutani sweswi vona ku andza lokukulu swinene ematin’wini ya tona. Ti khuvule vanhu vo tlula 1200 000 emalembeni ya mune ntsena lama hundzeke! Hinkwato, loko ti nga si khuvuriwa ti rhange ti heta nongonoko wa swa moya wa dyondzo ya Bibele, leyi ti pfuneke ku endla xiboho xa munhu hi xiyexe, lexi anakanyisisiweke kahle xa ku tintshunxa evuxakeni hinkwabyo lebyi a ti ri na byona ni vukhongeri byihi na byihi byin’wana.—Sofoniya 2:2, 3.
Loko u nga si tshama u va kona enhlanganweni wa Timbhoni ta Yehovha eka yin’wana ya Tiholo ta tona ta Mfumo, ha yini u nga yi kona vhiki leri? U nga ha tsakisiwa swinene hi leswi u nga ta swi vona ni ku swi twa. Naswona loko u lava ku twisisa Bibele, ha yini u nga kombeli un’wana wa Timbhoni ta Yehovha leswaku a dyondza na wena, hilaha timiliyoni tin’wana ti endleke ha kona? Loko xikhongelo xa wena xi ri xa ku lava ku twisisa Rito ra Xikwembu hi ndlela leyi kongomeke ni xa ku va ni vutomi lebyi fambisanaka ni Rito rolero, u ta kuma nhlamulo ya xikhongelo xa wena.
[Xifaniso lexi nga eka tluka 1]
Timiliyoni ti ringeta ku hundzukela eku gandzeleni Yehovha Xikwembu