Gondzo Ro Ya Eku Hlakarheleni

ENDZHAKU ka nhlaselo wa mbilu, i ntumbuluko leswaku munhu a chava ni ku karhateka. Xana yi nga tlhela yi ndzi hlasela? Xana ndzi ta lamala kumbe switlhavi swi ta ndzi sivela ku endla swilo swo karhi naswona ndzi heleriwa hi ntamu ni nkhikhi?

John, la boxiweke exihlokweni xa hina xa vumbirhi, a a ri ni ntshembo wa leswaku hi ku famba ka nkarhi, swivavi ni xitlhavi xa le xifuveni xa siku na siku a swi ta hela. Kambe endzhaku ka tin’hweti ti nga ri tingani, u te: “A swi si hela ni sweswi. Hikwalaho ka sweswo, swin’we ni ku karhala hi xihatla ni leswi mbilu ya mina yi baka hi ku hatlisa minkarhi yin’wana, swi ndzi endla ndzi tshamela ku tivutisa leswi, ‘Xana ndzi le kusuhi ni ku hlaseriwa nakambe?’”

Jane, wa le United States, loyi enkarhini wa ku hlaseriwa hi mbilu a a ha ku va noni, u te: “A ndzi anakanya leswaku a ndzi nge hanyi kumbe leswaku yi ta ndzi hlasela nakambe ivi ndzi fa. A swi ndzi chavisa hikuva a ndzi ri na vana vanharhu lava a ndzi fanele ku va khathalela.”

Hiroshi, wa le Japani u hlamusele a ku: “Swi ndzi chavisile loko va ndzi byele leswaku mbilu ya mina a yi nga ha ta tirha hilaha a yi tirha ha kona eku sunguleni; ndlela leyi a yi pompa ha yona a yi hunguteke hi 50 wa tiphesente. A ndzi tiyiseka leswaku ndzi fanele ku hunguta yin’wana ya mintirho ya mina tanihi mutirheli wa Timbhoni ta Yehovha, hikuva a ndzi kota ntsena ku endla hafu ya leswi a ndzi kota ku swi endla khale.”

Loko munhu a heleriwa hi ntamu, a nga tshamela ku va ni gome ni ku titwa a nga pfuni nchumu. Marie, wa le Australia wa 83 wa malembe hi vukhale, loyi a tinyiketeleke entirhweni wa nkarhi hinkwawo wa ku chumayela wa Timbhoni ta Yehovha u titshandzile: “Leswi a ndzi tsandzeka ku gingiriteka hilaha a ndzi endla hakona a swi ndzi twisa ku vava. Ematshan’wini yo pfuna van’wana, a ku ri mina la lavaka mpfuno enkarhini lowu.” EAfrika Dzonga, Harold u te: “Ndzi hete tin’hweti tinharhu, ndzi nga koti ku tirha. Lexi a ndzi kota ku xi endla enkarhini wolowo a ko va ku famba-famba exirhapeni ntsena. Sweswo a swi ndzi heta matimba swinene!”

Thomas wa le Australia u boheke ku endliwa vuhandzuri byo nghenisiwa nsiha wun’wana endzhaku ko hlaseriwa hi mbilu ravumbirhi. U te: “A ndza ha swi koti ku tiyisela xitlhavi, naswona ku anakanya hi vuhandzuri lebyikulu a swi ndzi tikela swinene.” Jorge, wa le Brazil, u hlamusele hi vuyelo bya vuhandzuri bya mbilu a ku: “Hikwalaho ka xiyimo xa mina xa swa timali lexi nga nyawuriki, a ndzi chavisiwa hi leswaku ndzi ta sukela nsati wa mina a ri swanga a nga ri na mupfuni. A ndzi titwa onge a ndzi nge hanyi nkarhi wo leha.”

Ku Hlakarhela

Xana i yini lexi pfuneke vo tala ku hlakarhela ni ku tlherisela mintlhaveko ya vona exiyin’weni lexi faneleke? Jane u hlamuserile: “Minkarhi hinkwayo loko ndzi biwa hi ripfalo a ndzi khongela Yehovha ivi ndzi lahlela mindzhwalo ya mina eka yena ndzi yi siya kwalaho.” (Pisalema 55:22) Xikhongelo xi pfuna munhu ku va ni matimba ni mianakanyo leyi rhuleke leswi nga swa nkoka loko u vilela.—Vafilipiya 4:6, 7.

John na Hiroshi va ye eka minongonoko yo vuyeteriwa. Swakudya leswi faneleke ni vutiolori swi tiyise timbilu ta vona leswaku va tlhelela entirhweni. Naswona va vula leswaku ku hlakarhela ka vona emianakanyweni ni le mintlhavekweni swi tisiwe hi matimba lama seketelaka ya moya wa Xikwembu.

Hi nseketelo wa vamakwavo va Vakreste, Thomas u ve ni xivindzi xo langutana ni vuhandzuri byakwe. U te: “Loko ndzi nga si handzuriwa, mulanguteri u ndzi endzerile ivi a khongela na mina. Hi xikombelo lexi humaka evuentweni bya mbilu, u kombele Yehovha leswaku a ndzi tiyisa. Vusiku byebyo ndzi anakanyisise hi xikhongelo xakwe ivi ndzi titwa ndzi kateke ngopfu ku va ni vakulu vo kota yena lava ntwela-vusiwana wa vona hi nkarhi lowu wa maxangu wu nga xiphemu xa nchavelelo.”

Anna, wa le Italy, u langutane ni gome hi ndlela leyi: “Loko ndzi hele matimba, ndzi anakanya hi mikateko hinkwayo leyi ana ndzi yi kumeke tanihi un’wana wa malandza ya Xikwembu, ku katsa ni mikateko leyi nga ta ta eMfun’weni wa Xikwembu. Leswi swa ndzi pfuna ku tlhelela emianakanyweni leyinene.”

Marie u khensa mpfuno wa Yehovha. Ndyangu wa ka vona wu n’wi seketerile, naswona u ri: “Vamakwerhu va moya, un’wana ni un’wana a ri ni ndzhwalo wakwe lowu a faneleke ku wu rhwala, va tinyike nkarhi wa ku ndzi endzela, va ndzi bela riqingho, kumbe ku ndzi rhumela makhadi. Xana ndzi nga tshama ndzi ri ni gome ndzi ri karhi ndzi kombiwa rirhandzu hi ndlela leyi?”

Ku Hava Timbilu Leti Nga Toxe

Ku vuriwa leswaku loko mbilu yi hlakarhela a yi fanelanga yi va yoxe. Nseketelo wa ndyangu ni vanghana wu hoxa xandla hi ndlela leyinene swinene eku hlakarheleni ka lava timbilu ta vona ta xiviri kumbe to fanekisela ti faneleke ku ololoxiwa.

Michael, wa le Afrika Dzonga, u te: “Swa tika ku hlamusela van’wana leswaku swi njhani ku va ni gome. Kambe loko ndzi nghena eHolweni ya Mfumo, ndlela leyi vamakwerhu va ndzi khathalelaka ha yona yi ndzi kufumeta mbilu ni ku ndzi chavelela.” Henry, wa le Australia, na yena u tiyisiwe hi rirhandzu leri enteke ni ku twisisiwa loku vandlha ra ka vona ri n’wi kombeke kona. U te: “Kunene a ndzi lava marito wolawo ya xikhutazo.”

Jorge u wu tlangele ngopfu nkhathalelo lowu enteke lowu van’wana va n’wi kombeke wona hi ku pfuna va ndyangu wakwe hi tlhelo ra timali kukondza loko a tlhele a kota ku tirha. Hi ku fanana, Olga, wa le Sweden, u tlangele ndlela leyi vamakwerhu va moya va n’wi pfuneke ha yona hi xiviri. Van’wana va n’wi yele exitolo, loko van’wana va n’wi basisela yindlu.

Hakanyingi, lava vabyaka hi timbilu va fanele va hunguta mintirho ya vona leyi a va yi rhandza swinene. Sven, wa le Sweden u hlamuserile: “Minkarhi yin’wana ndzi boheka ku nga yi evutirhelini loko ku ri ni moya kumbe ku titimela ngopfu, hikuva leswi swi tlhekekisa vusindza bya misiha. Ndzi tlangela ndlela leyi Timbhoni-kulorhi to tala ti twisisaka ha yona emhakeni leyi.” Hambileswi Sven a tshamaka a etlele, wa swi kota ku yingisela minhlangano hikuva vamakwerhu hikwalaho ka rirhandzu va n’wi rhekhodela yona hi thepi. “Va ndzi endla ndzi fambisana na vona hileswi swi humelelaka evandlheni, kutani leswi swi ndzi endla ndzi titwa ndzi hlanganyerile.”

Marie, loyi a tshamaka a etlele, u titwa a katekile leswi lava a dyondzaka na vona Bibele va taka eka yena. Hi ndlela leyi u kota ku ya emahlweni a hlamusela vumundzuku lebyo hlamarisa lebyi a byi languteleke. Thomas u nkhensa nkhathalelo lowu a kombiwaka wona a ku: “Vakulu va kombise ku anakanyela swinene, naswona va hungute nhlayo ya swiavelo leswi va ndzi nyikaka swona.”

Mindyangu Yi Lava Ku Seketeriwa

Xiyimo xi nga ha tikela swirho swa ndyangu kukota ndlela leyi xi tikelaka muhlaseriwa ha yona. Va tshikileleka ni ku chava swinene. Mayelana ni ku vilela ka nsati wakwe, Alfred, wa le Afrika Dzonga, u te: “Loko ndzi vuya ekaya ndzi huma exibedlhele, nsati wa mina a hamba a ndzi pfuxa minkarhi yo tala ni vusiku a kambela loko ndza ha hanye kahle, naswona a hamba a ndzi sindzisa leswaku ndzi ya vonana ni n’anga leswaku ndzi ta kamberiwa endzhaku ka tin’hweti tin’wana ni tin’wana tinharhu.”

Swivuriso 12:25 yi hlamusela leswaku ‘ku kanakana, loko ku ri embilwini ya munhu, ka n’wi tova.’ Carlo, wa le Italy, u vula leswaku hi mpfhuka a hlaseriwa hi mbilu, nsati wakwe la nga ni rirhandzu ni la n’wi seketeleke “u ni gome.” Lawrence, wa le Australia, u te: “Xin’wana xa swilo leswi u faneleke u swi veka tihlo hi leswaku munghana wa wena wa khathaleriwa. Ntshikilelo wa munghana wa wena wu nga ha va wukulu swinene.” Hikwalaho, hi fanele hi tsundzuka swilaveko swa hinkwavo endyangwini, ku katsa ni vana. Xiyimo xi nga ha va tikela emintlhavekweni ni le nyameni.

James, la boxiweke exihlokweni xa hina xa vumbirhi, u tihambanise ni vanhu endzhaku ka loko tata wakwe a hlaseriwe hi mbilu. U te: “A ndzi twa onge a ndzi nge he swi koti ku titsakisa hikuva a ndzi anakanya leswaku xikan’we-kan’we loko ndzo sungula ku titsakisa, ku ta humelela xin’wana xo biha.” Loko a hlamusele tata wakwe hi ku chava loku a a ri na kona, ivi a hlakulela ku vulavurisana ni van’wana, swi n’wi pfune ku susa ku vilela ka yena. Enkarhini wolowo, James u endle nchumu wun’wana lowu khumbeke vutomi byakwe swinene. U te: “Ndzi engetele dyondzo ya mina ya Bibele ya munhu hi yexe, ni ku lunghiselela ka mina minhlangano ya hina ya Vukreste.” Endzhaku ka tin’hweti tinharhu u nyiketele vutomi byakwe eka Yehovha ivi a swi kombisa hi nkhuvulo wa mati. U ri: “Ku sukela enkarhini wolowo, ndzi hlakulele vuxaka lebyi enteke na Yehovha. Kunene swi tele leswi ndzi nga n’wi nkhensaka ha swona.”

Endzhaku ka nhlaselo wa mbilu, munhu u kuma nkarhi wo anakanyisisa ta vutomi hi vuntshwa. Hi xikombiso, langutelo ra John ri cincile. U te: “U kota ku vona vuhava bya ku tsutsumisa swilo swa misava, kutani u xiya ndlela leyi swi nga swa nkoka ha yona ku rhandza va ndyangu ni vanghana, ni leswaku hi va risima ku fikela kwihi eka Yehovha. Vuxaka bya mina na Yehovha, ndyangu wa mina, ni vamakwerhu va moya sweswi i bya nkoka ku tlurisa.” Loko a tsundzuka maxangu ya ntokoto wakwe, u engeterile: “A ndzi tshembi leswaku a ndzi ta swi kota ku langutana ni leswi loko a hi nga ri na ntshembo wa nkarhi lowu swilo leswi swi nga ta lulamisiwa ha wona. Loko ndzi va ni gome, ndzi anakanyisisa hi vumundzuku, kutani hinkwaswo leswi humelelaka sweswi swi vonaka swi nga vuli nchumu.”

Loko vanhu lava poneke nhlaselo wa mbilu va hlangana ni swihinga egondzweni leri yaka eku hlakarheleni, va ni ntshembo lowu tiyeke lowu sekeriweke eMfun’weni lowu Yesu Kreste a hi dyondziseke ku wu khongelela. (Matewu 6:9, 10) Mfumo wa Xikwembu wu ta tisela vanhu vutomi lebyi nga heriki laha va nga ta va va hetisekile emisaveni leyi nga paradeyisi. Kutani laha vuvabyi bya mbilu ni mavabyi laman’wana hinkwawo ma ta heriseriwa makumu. Misava leyintshwa yi kwala nyongeni. Kunene, vutomi lebya kahle ku tlurisa byi le ndleleni!—Yobo 33:25; Esaya 35:5, 6; Nhlavutelo 21:3-5.

[Xifaniso lexi nga eka tluka 1]

Nseketelo wa va ndyangu ni vanghana wu hoxa xandla swinene eku hlakarheleni