Maxangu Ya Maggy Ni Nkateko Wa Mina

Ravumbirhi, May 2, 1995, i siku leri n’wana wa mina wa nhwanyana a velekiweke ha rona ni leri nsati wa mina a feke ha rona. Lexi vavisaka, Maggy a nga swi kotanga ku vona xikandza xa n’wana wakwe. Ntshembo lowu ndzi nga na wona sweswi i wo tivisa Tamara eka mana wakwe loko a pfuxiwa eku feni.

ENDZHAKU ka malembe ya 16 hi ri evukatini, nsati wa mina Maggy, u tivisiwe hi dokodela wakwe leswaku u ni khensa ya mavele naswona u lo saleriwa hi tin’hweti ti nga ri tingani ntsena to hanya. Sweswo swi humelele malembe ya ntlhanu lama hundzeke. Lexi nkhensekaka, hileswi Maggy a swi koteke ku hanya hi ndlela leyinene emalembeni wolawo yo hetelela ya vutomi byakwe. Hi le ku heteleleni ntsena laha ku vava loku a a ri na kona a ku nga ha tiyiseleki kahle.

Hikwalaho ka ndlela leyi khensa leyi a ri na yona a yi kule ha yona, madokodela ma vule leswaku a swi nga tshembisi leswaku a nga tika. Kutani u nga anakanya ndlela leyi swi hi hlamariseke ha yona hi nkarhi wa vukamberi bya nkarhi na nkarhi bya mpfumawulo byo xiya ku kula ka matshumba ya khensa, loko va vone xihlangi xi ri embelekweni yakwe! A ri n’wana wa nhwanyana. Maggy a a ri ni tin’hweti ta mune ni hafu a tikile. A a tsake ngopfu leswi a rindzele ku va manana ro sungula.

Maggy a a endla xin’wana ni xin’wana lexi a nga xi kotaka leswaku a tiyiseka leswaku xihlangi xi tswariwa xi hanye khwatsi. A a xiya swakudya leswi a dya swona, naswona hambi ku ri emavhikini mambirhi yo hetelela ya vutomi byakwe, loko xitlhavi xi sungule ku vava swinene, a a tirhisa swidlaya-xitlhavi ntsena loko a nga ha swi koti ku tiyiselela xitlhavi xa kona.

Ku Katekisiwa Hi N’wana La Hanyeke Kahle

Hi Mugqivela, April 29, mbilu ya Maggy yi sungule ku ba hi matimba swinene, kutani a ku: “Ndzi anakanya leswaku ndzi ta fa.” Ndzi tshame na yena mahelo-vhiki hinkwawo. Endzhaku ka loko ndzi bele dokodela riqingho hi Musumbhunuko, hi ku hatlisa ndzi n’wi teke ndzi n’wi yisa exibedlhele xa le Montreal, eCanada, lexi nga riki ekule ni le kaya ka hina eSt. Jérôme.

Kwalomu ka 5:30 mixo lowu tlhandlamaka, muongori un’wana loko a hundza ekusuhi ni rivanti ra kamara leyi Maggy a a ri eka yona, kutani a lemuka leswaku a a ri eku karhatekeni. Handle ko kanakana, a a khomiwe hi vuvabyi bya mbilu. Hi ku copeta ka tihlo ku vitaniwe dokodela eka kamara leyin’wana. Hambileswi Maggy a feke, ntlawa wa swa vutshunguri wu swi kotile ku ponisa n’wana wa hina. Tamara u tswariwe nkarhi wakwe wu nga si fika, ka ha sele tin’hweti timbirhi ni hafu naswona a a tika 1,1 wa tikhilogiramu ntsena.

Tanihi leswi mpimo wa Tamara wa ngati a wu ri ehansi, madokodela a ma lava ku tirhisa mpompelo wa ngati. Hambiswiritano, ematshan’weni ya sweswo ma khutaziwe ku tirhisa homoni leyi endliweke kunene, leyi vuriwaka erythropoietin. Ma swi endlile sweswo, naswona loko ku tirhisiwa ka homoni leyi ku swi kotile ku engetela mpimo wa ngati ya yena, muongori un’wana u te: “Hikwalaho ka yini va nga tirhisi yona eka swihlangi hinkwaswo?”

Tamara a a ri ni swiphiqo swin’wana leswi yelanaka ni ku tswariwa ka yena nkarhi wu nga si fika, kambe leswi hinkwaswo swi lulamisiwile. Kahle-kahle, loko Dok. Watters, la nga dokodela wa fambiselo ra misiha, a n’wi kamberile endzhakunyana, u byele muongori a ku: “Ndzi anakanya leswaku n’wana loyi u nga ndzi nyika yena leswaku ndzi n’wi kambela a hi yena loyi a wu fanele u ndzi nyike yena; loyi u vonaka a ri kahle swinene eka mina.”

Ku Langutana Ni Rifu Ni Ku Tiyisela Endzhaku Ka Rona

Ku vona Maggy a ri karhi a fa a swi ndzi karhata. Ndzi titwe ndzi nga ha pfuni nchumu nikatsongo. A swi ndzi tikela swinene ku vulavula hi rifu ra Maggy. Kambe, ndzi vulavule ha rona loko vamakwerhu va mina va Vukreste va xinuna ni va xisati va te exibedlhele. Ku karhateka lokuyani ku ye ku hunguteka hakatsongo-tsongo loko ndzi vulavule ha rona. Loko ndzi hlaya xihloko xa Xihondzo xo Rindza kumbe xa Xalamuka! lexi a xi ndzi khumba swinene, ndzi xi veka exivandleni lexi tirhisiwaka hi mina ntsena eka layiburari ya mina kutani ndzi teka ndzi xi hlaya loko ndzi twa ndzi navela ku hlaya.

Ntlhontlho wun’wana a wu nghena endlwini leyi nga riki na munhu. Swi tika ngopfu ku langutana ni xivundza. Ku titwa loku ka ha ri kona, hambileswi ndzi pfuniwaka hi xinakulobye lexi akaka xa Vukreste. Mina na Maggy a hi hamba hi endla swilo hinkwaswo swin’we, naswona a hi vulavula hi xiphiqo lexi a ndzi ta va na xona xa xivundza. A a lava leswaku ndzi tlhela ndzi teka. Kambe, swilo a swi olovi hi ndlela yoleyo.

Nseketelo Lowu Humaka Eka Vakreste-kulorhi

A ndzi tivi leswaku a ndzi ta va ndzi endle yini loko a ndzi nga kumanga nseketelo wa Komiti yo Vulavurisana ni Swibedlhele (HLC [Hospital Liaison Committee]) ya Timbhoni ta Yehovha. Mixo lowu Maggy a feke ha wona, Mbhoni leyi nga ni vutivi leyi humaka eka HLC a yi ri kona exibedlhele naswona yi ndzi nyike mpfuno lowu a ndzi wu lava.

Vatirhi va le xibedlhele va tsakisiwe hi mpfuno lowu ndzi wu kumeke evandlheni ra Vukreste eSt. Jérôme kun’we ni le mavandlheni man’wana ya le ndhawini yoleyo. Hi vusiku lebyi ku endliweke xitiviso xa rifu ra Maggy ha byona enhlanganweni wa hina wa Vukreste, ku tlula 20 wa vanghana lava rhandzekaka va angule hi ku nyikela mpfuno wa vona. Entiyisweni nseketelo wa kona a wu ri wukulu swinene.

Vanghana va ndzi lulamisele swakudya; xigwitsirisi xa mina a xi tshama xi tele hi swakudya ku ringana tin’hweti to hlayanyana. Va ndyangu wa mina ni vamakwerhu va xinuna ni va xisati va Vukreste va tlhele va kombisa nkhathalelo hi ku kumela n’wananga swiambalo. Va ndzi tisele swilo swo tala swinene lerova ndzi kala ndzi pfumala ni ndhawu yo swi veka eka yona hinkwaswo.

Mintsako Ya Sweswi Ni Ntshembo Wa Nkarhi Lowu Taka

Tamara u endla leswaku ndzi susa mianakanyo ya mina eku lahlekeriweni ka mina. Hakunene u yive mbilu ya mina. Siku rin’wana ni rin’wana loko ndzi n’wi xeweta hi “xewani” la kombisaka ntsako lowukulu, u tlherisela hi ku n’wayitela lokukulu, a sungula ku “vulavula,” a tlangisa mavoko ni milenge yakwe, a tsakile swinene.

Tanihi leswi ndzi nga mutivi wa tinyeleti, ndzi rindzele ku tamela Tamara ndzi n’wi veka endzhumbyini wa mina, leswaku a languta hi theleskopu ya mina, ku vona swilo swa le tilweni leswi hlamarisaka swa Muvumbi wa hina Lonkulu, Yehovha. Ku anakanyisisa hi vutomi lebyi nga heriki emisaveni ya Paradeyisi, i xihlovo xa xiviri xa nchavelelo. Naswona ku tiva leswaku wolowo i ntshembo lowu na Tamara a nga na wona swi ndzi nyika ntsako lowu engetelekeke.—Pisalema 37:9-11, 29.

Loko ndzi tsundzuka leswi humeleleke emalembeni ya ntlhanu lama hundzeke, ndzi nga swi hlamusela kahle swi ri leswi vavisaka ni leswi tsakisaka. Ndzi dyondze swo tala eka mina n’wini ni le vuton’wini hi byoxe. Hi mahlo-ngati ndzi rindzele ku vona leswi vumundzuku byi nga ta va byi ri xiswona, hilaha Bibele yi byi hlamuselaka hakona, “rifu a ri nga ha vi kona; hambi ya ri mahlomulo kumbe ku rila kumbe ku vaviseka a swi nga ha vi kona.”—Nhlavutelo 21:3, 4.

Kutani, eku pfuxiweni ka vafi, Maggy u ta swi kota ku hefemula kahle handle ko twa xitlhavi. Ku tlula hinkwaswo, ntshembo wa mina lowu tiyeke ni ku navela ka mina i ku va ndzi va kona leswaku ndzi ta tivisa Tamara eka Maggy, kutani u ta vona xinhwanyatana lexi a tikarhateke swinene hikwalaho ka xona.—Hi ku vula ka Lorne Wilkins.

[Xifaniso lexi nga eka tluka 14]

Ndzi ri ni nsati wa mina

[Xifaniso lexi nga eka tluka 14]

N’wana wa hina, Tamara