Watchtower LAYIBURARI YA LE KA WEB SITE
Watchtower
LAYIBURARI YA LE KA WEB SITE
Xitsonga
  • BIBELE
  • MIKANDZIYISO
  • TINHLENGELETANO TA VANDHLA
  • g95 2/8 matl. 8-9
  • Valahliwa Ni Vabaleki

A ku na vhidiyo.

Hi khomele, ku ve ni xiphiqo loko hi tlanga vhidiyo leyi.

  • Valahliwa Ni Vabaleki
  • Xalamuka!—1995
  • Swihloko
  • Tinhlokomhaka Tin'wana Leti Yelana Na Yona
  • Valahliwa
  • Vabaleki
  • Ku Onhiwa Ni Ku Xanisiwa
  • Ku Lava “Ntshunxeko”
  • Ha Yini Ku Ri Na Vana Vo Tala Swinene Lava Balekaka?
    Xihondzo xo Rindza Xi Huwelela Mfumo Wa Yehovha—1988
  • Xana Khombo Leri Ri Ta Hela Rini?
    Xalamuka!—1995
  • Ndlela Yo Tiyisa Vuxaka Bya Ndyangu
    Xihondzo xo Rindza Xi Huwelela Mfumo Wa Yehovha—1988
  • “Se Ndza Yi Rhandza Nsimu!”
    Xihondzo xo Rindza Xi Huwelela Mfumo Wa Yehovha (Lexi Dyondziwaka eVandlheni)—2021
Vona Swo Tala
Xalamuka!—1995
g95 2/8 matl. 8-9

Valahliwa Ni Vabaleki

“NDZI tsemeta misisi ya mina, ndzi ambala tanihi wanuna, ndzi vehela vuhlalu ni swihakarho enhan’wini ya mina, ndzi tlhoma xipereta erhameni, kutani hi ndlela yoleyo ndzi sungula ku hanya tanihi nghwavava.”—Tamara.

Loko a wu lo vona Tamara eswitarateni, xana a wu ta vhumbha leswaku a a ri n’wana wa kondlo-a-ndzi-dyi la nga ni xivundza, la khomiweke hi ndlela yo biha loyi vutomi bya ndyangu wa ka vona byi n’wi siyeke a pfumala nkhathalelo ni rirhandzu leri a ri lava swinene? Xana a wu ta anakanya leswaku u xandzukile a teka ndlela leyi lwisanaka ni nawu kumbe a hanya vutomi bya vugevenga? Tamara u hlamusela eka Xalamuka! malunghana ni swiendlakalo leswi chavisaka leswi n’wi ngheniseke evuton’wini lebyi a hanyeke byona ku sukela emalembeni ya 14, hanyelo leri a a nga ri naveli.

Valahliwa

Tamara wa hlamusela: “Ndzi kulele exidorobaneni xa le ntshaveni eItaly, endyangwini lowu rirhandzu a ku ri nchumu lowu nga tiviwiki. Lexi twisaka ku vava, ndzi langutane ni timholovo letikulu leti a ti ri kona exikarhi ka vatswari va mina ni nhlambha leyi chavisaka leyi a yi va kona eminkarhini yo tano. Hakanyingi a ndzi nghena etimholoveni naswona a ndzi biwa hi ndlela ya tihanyi hi tatana lowo pfumala ntwela-vusiwana. A ndzi tshama ndzi ri ni tinghonghoma mavhiki yo hlaya.

“Loko ndzi ri ni malembe ya 14, tata wa mina u ndzi nyike mali leyi nga nyawuriki ni thikithi ra xitimela ro kota ntsena ku ya edorobeni ra le kusuhi, laha a ku ri ni makhombo yo tala. Ndzi endle xinghana ni vantshwa van’wana lava, ku fana na mina, a va nga ri na loyi a va khathalelaka. Vo tala va hina hi tinyiketele eka swakunwa swa xihoko. Ndzi sungule ku titiva, ndzi va ni nhlambha ni ku rhandza timholovo. Hakanyingi a ndzi pfumala swakudya. Hi vusiku byin’wana hi vuxika mina ni vanghana va mina hi hise fenixara leswaku hi orha. A ndzi ta tsaka ngopfu loko a ndzi kume ndyangu wo ndzi khathalela, lowu a wu ta khumbeka hi ndlela leyi ndzi titwaka ha yona, mivilelo ni ku chava loku a ndzi ri na kona. Kambe a ndzi ri ni xivundza, lexikulu ngopfu.”

Ku ni madzana ya magidi ya “va-Tamara” emisaveni ya namuntlha. Etindhawini hinkwato, ku ni vana vo tala lava tshikiweke hi vatswari va vona lava tsan’weke vutihlamuleri bya vona.

Vabaleki

Vana van’wana va anakanya ku suka emakaya hikuva “i ndhawu leyi chavisaka swinene eka vona ku va va tshama eka yona; ya vavisa swinene, yi ni khombo lerikulu, kutani va balekela eswitarateni.”—New York State Journal of Medicine.

Loko a ri ni malembe ya kaye hi vukhale, Domingos u yisiwe evuhlayiselweni bya vana lava nga riki na vatswari loko mana wakwe a tlhela a tekiwa. Hikwalaho ko tshamela ku biwa hi vaprista, u anakanye ku baleka. Hambi mana wa yena u n’wi vuyiserile ekaya, kambe a a tshamela ku biwa hi tata wakwe wa muwundli. U vone ku baleka ku ri yona ndlela yo kuma ntshunxeko eka tihanyi leti nga ekaya.

Lexi twisaka ku vava, “timiliyoni ta vana a ti va tshembi vanhu lavakulu emindyangwini ya ka vona leswaku ti kuma vuhlayiseki byo karhi,” ku tsale Anuradha Vittachi ebukwini ya yena leyi nge Stolen Childhood—In Search of the Rights of the Child. U tlhela a tsala: “Ku ringanyetiwa leswaku vana vanharhu hi siku va fa hi ku khomiwa hi ndlela yo biha hi vatswari va vona eUnited States.” Eka swiendlakalo swo tala, vana va onhiwa hi tlhelo ra rimbewu ematshan’weni yo sirheleriwa hi swirho swa ndyangu.

Ku Onhiwa Ni Ku Xanisiwa

Domingos u boheke ku hanya ni vana van’wana va switarata lava a va katseka eka vuxisi ni ku yiva, ku katsa ni ku tirhisa swidzidzirisi hi ndlela yo biha ni ku swi xavisa. Khombo ra kona, vo tala lava balekaka ekaya hikwalaho ka swiyimo swo biha va onhiwa hi vavanuna va vuoswi, vanhu lava hlaselaka vana hi rimbewu ni vaendli va tibuku ta vanhu lava nga ambalangiki. Hikwalaho ka ndlala ni ku pfumala vini, vana lava va nyikiwa ndhawu yo tshama ni ku tshembisiwa leswaku va ta “hlayisiwa” hi munhu lonkulu, kambe va kuma leswaku va hakela hi mimiri ya vona eka vutomi bya vunghwavava. Hikwalaho ko pfumala vutshila bya ntirho, vo tala va dyondza ku hanya eswitarateni hi ndlela yihi na yihi leyi va nga yi kotaka, ku katsa ni ku yengiwa hi tlhelo ra rimbewu. Van’wana a va hanyi. Swidzidzirisi, swakunwa swa xihoko, ku dlaya ni ku tihinga swi heta vana vo tala.

Loko a hlamusela hi vutomi bya vana lava tshamaka eswitarateni, n’wana un’wana loyi a ri nghwavava u te: “U tshama u ri eku chaveni. Wa tiva, lexi ndzi hlundzukisaka hi leswaku [vanhu] vo tala va anakanya leswaku loko va vona n’wana a etlele exitimeleni, kumbe va vona n’wana a yingayinga minkarhi hinkwayo, va anakanya leswaku hi leswi a tsakelaka swona. Leswi sweswi ndzi kuleke, a ndzi swi voni hi ndlela yoleyo. Vana lava hinkwavo va rila hi tindlela to hambana-hambana. A va swi tsakeli ku va hi ndlela yoleyo, kambe vatswari va vona a va va rhandzi.”

Ku Lava “Ntshunxeko”

Ku ni vantshwa van’wana va madzana ya magidi lava ku vikiwaka leswaku va tlhakile ekaya, lava kokeriweke eswitarateni hikwalaho ka ntshunxeko lowu va anakanyaka leswaku wu kona. Van’wana va lava ku ntshunxeka eka vusweti. Van’wana va navela ku ntshunxeka eka vulawuri bya vatswari ni le ka milawu leyi va vonaka onge yi tika ngopfu.

Muntshwa un’wana loyi a ringeteke leswi vuriwaka ku ntshunxeka eka vulawuri bya vatswari ni le ka misinya ya milawu ya kaya ra Vukreste a vuriwa Emma. Hi ku suka ekaya a ya tshama ni vanghana va yena, u sungule ku hanya hi swidzidzirisi. Kambe endzhaku ka loko a vone maxangu ya vutomi bya le switarateni, Emma u kombise ku navela ku tlhelela ekaya ni ku tshika mukhuva wa yena wa swidzidzirisi. Kambe, lexi khomisaka gome, a nga byi tsemanga vunghana bya yena lebyo biha, naswona hi vusiku byin’wana bya ximumu swin’we ni vanghana vakwe, va titlhavele hi xidzidzirisi xa heroyini. Eka Emma ri ve ro hetelela. U titivarile kutani a fa hi siku leri landzeleke, a ri yexe naswona a tshikiwile hi “vanghana” va yena.

Xana vumundzuku bya vana lava karhatiwaka hi vatswari va vona kumbe hi van’wana byi nga antswa? Xana yi ta va kona misava leyi nga ta ka yi nga va onhi vantshwa? Hi wihi ntshembo lowu nga kona wa leswaku vutomi bya ndyangu byi ta antswisiwa leswaku vantshwa va ta ka va nga naveli ku baleka? Tinhlamulo ti nga kumeka eka xihloko lexi landzelaka.

    Minkandziyiso Ya Xitsonga (1987-2025)
    Huma
    Nghena
    • Xitsonga
    • Rhumela
    • Leswi u swi tsakelaka
    • Copyright © 2025 Watch Tower Bible and Tract Society of Pennsylvania
    • Swipimelo Swo Tirhisa Website Leyi
    • Milawu Yo Sirhelela Rungula Ra Xihundla
    • Seta Swa Xihundla
    • JW.ORG
    • Nghena
    Rhumela