Xana Tintangu Ta Wena Ti Ku Ringana Kahle?

“Loyi a tivaka kahle lomu tintangu ti lumaka kona, hi loyi a ti ambaleke.”—MARITO LAWA YA VUTLHARI MA NGA HA VA MA HUMA EKA NTLHARI YA LE RHOMA.

XANA u hetelele rini ku xava tintangu? Xana a ti ku ringana kahle? U teke nkarhi wo tanihi kwihi u ri karhi u hlawula? Xana vatirhi va le xitolo va ku pfune njhani? Xana u ti xavise hi mhaka ya xitayele ku nga khathariseki leswaku a ti ku ringani kahle? Ti njhani sweswi se u nga ni nkarhinyana u ri karhi u ti ambala? Xana ku ni laha ti ku lumaka kona?

Ku xava tintangu a swi olovi. Naswona swa tika swinene ku kuma tintangu leti ku ringanaka kahle. Ha yini?

Ku Kuma Tintangu Leti Ku Ringanaka Kahle

Xo sungula, hi wihi nkondzo lowukulu eka wena—xana i wa xinene kumbe i wa ximatsi? Xana u ehleketa leswaku ya ringana ha yimbirhi? A swi tano! Yinhla yin’wana leyi u faneleke u yi tekela enhlokweni i ya leswaku nkondzo ha wun’we wu ni swiphemu swa mune: mpimo wa wona loko u tshamile, loko u yimile, loko u endla swo karhi niloko ku hisa. Hi kwihi ku hambana ka kona?

Malunghana ni mpimo wa kondzo buku leyi nge Professional Shoe Fitting yi ri: “Lowu i mpimo wa nkondzo loko nenge wu vekiwe ehansi, (loko munhu a tshame hansi).” Hilaha xiga lexi nge “mpimo wa nkondzo loko u yimile” xi kombisaka hakona, nkondzo wu pimiwa loko munhu a yime hi milenge. Loko munhu a yimile, mpimo ni xivumbeko xa nkondzo wakwe swa cinca. Buku leyi tshahiweke laha henhla yi ri: “Loko munhu a tshame ehansi nkondzo wa yena wa ntshunxeka kambe loko a yime hi milenge, marhambu ni tinyama ta le minkondzweni ta ‘tiya,’ xisweswo mpimo wa nkondzo wa cinca.” Kambe ka ha ri ni mimpimo yin’wana yimbirhi.

Ku ni mpimo wa nkondzo loko munhu a endla swo karhi—loko a famba, a tsutsuma, a tlula kumbe a endla vutiolori byo karhi. Leswi “swi endla leswaku nkondzo wu va ni mimpimo ni swivumbeko swo hambana-hambana.” Mpimo wa vumune hi lowu kumekaka loko ku cinca maxelo hikwalaho ka ku hisa, ku tsakama ni nkahelo. Leswi swi nga endla leswaku nkondzo wu pfimba hi tiphesente ta ntlhanu. Kutani, a swi hlamarisi leswi u titwaka u pepile loko u hluvula tintangu nimadyambu, ngopfu-ngopfu loko ti nga ku ringani kahle! Hakanyingi hi ambala tintangu leti nga hi ringaniki kahle.

Xana Minkondzo Ya Wena Yi Pimiwa Njhani?

Se ku hundze malembe yo tala Erik a ri karhi a xava tintangu ta sayizi 10 na hafu kumbe 11, leti nga anamangiki ngopfu ematlhelo. Hi nkarhi wolowo, a a tshamela ku va ni tikhono eka rintiho leritsongo ra nkondzo ni min’wala leyi milelaka endzeni ka gutsu. Dokodela wakwe wa minkondzo u ringanyete leswaku a ya eka mutshila wa ku ambexa tintangu a ya pima minkondzo yakwe. Lexi hlamariseke Erik hileswaku ntangu leyi a yi ta n’wi ringana kahle i sayizi 12 na hafu, ku anama ka yona ku ri mpimo wa A! Mpimo wa “A” wu kombisa nkondzo wo lala. Kambe, xana ku pima ntsena ku leha ni ku anama swi ringene leswaku munhu a kuma ntangu leyi n’wi ringanaka kahle? Xana u fanele u yi pima njhani minkondzo ya wena?

Nchumu lowu tolovelekeke ngopfu ematikweni man’wana wa ku pima sayizi ya tintangu i nchumu lowu vuriwaka Brannock. (Vona xifaniso.) Nchumu lowu wu nga tirhisiwa ku pima matlhelo manharhu: ku leha ka nkondzo, mpimo lowu sukelaka exirhendzeni ku ya emahlanganweni ya nhlolo ni ku anama ka mahlangana-nhlolo. Kambe, nkondzo wun’wana ni wun’wana wu ni xivumbeko ni sayizi ya wona. Hi yona mhaka leyi hi rhangaka hi ambala tintangu, hi ti pima hi nga si ti xava. Xiphiqo xi nga ha va kwalaho. Xana u tshame u pima tintangu leti u ti rhandzaka hakunene—ivi u kuma leswaku ta ku manya katsongo? Kutani muxavisi a ku: “Tintangu leti ti ta pfuleka.” Xisweswo u ti xava kutani u sungula ku tisola endzhaku ka masiku kumbe mavhiki ma nga ri mangani endzhaku ka loko se u sungule ku ti ambala. Endzhaku ka sweswo u sungula ku va ni tikhona naswona min’wala yi milela endzeni ka khudzu kumbe milenge ya wena yi pfimba!

Xana Wa Ti Kuma Tintangu Leti Ku Ringanaka Onge Ti Lo Endleriwa Wena?

Xana u nga swi kota ku kuma tintangu leti ku ringanaka onge ti lo endleriwa wena? Buku leyi nge Professional Shoe Fitting yi nyikela nhlamulo yo kongoma leyi nge doo! Ha yini swi nga koteki? “Hikwalaho ka swiphiqo swo hlayanyana leswi nga tlhantlhekiki. . . . A nga kona munhu la nga ni minkondzo yimbirhi leyi ringanaka kahle kumbe leyi nga ni xivumbeko lexi fanaka.” Hikwalaho loko ntangu yi wu ringana kahle nkondzo wa wena lowukulu, a yi nge wu ringani kahle nkondzo lowun’wana. “Leswi a swi vuli leswaku a wu nge swi koti ku kuma ntangu leyi ku ringanaka kahle, kambe hi fanele hi tirhisa vukheta lebyikulu loko hi vulavula hi ntangu leyi ku ringanaka ‘onge yi lo endleriwa wena.’”

Loko u lava ku vona leswaku tintangu ti ku vavisa kwihi, kambisisa tintangu tin’wana ta wena ta khale. Languta furu leyi nga endzeni ka tona. Hi kwihi laha ti vavisekeke kona ngopfu? Hakanyingi u ta kuma leswaku ti vaviseke laha xirhendze xi kandziyaka kona, hala ndzhaku ka xirhendze ni le mahlanganeni ya nkondzo ni swikun’wana. Xana leswi swi vula yini? Leswi swi vula leswaku “nkondzo wa wena a wu andlalekanga kahle entangwini ya wena. Swiyenge swin’wana swa ntangu swi onhaka ngopfu kasi swin’wana nkondzo a wu swi khumbi nikatsongo.”

Hambi ku ri nkolo wa ntangu i wa nkoka leswaku nkondzo wa wena wu tshamiseka entangwini. Xana u swi lemukile leswaku ndlela leyi tintambhu ti bohaka ha yona eka nkolo wa ntangu a yi fani? Mabohelo man’wana ma tlakula matlhelo hamambirhi ya nkondzo ku sukela ehansi. Kambe, loko ku tele tinyama eminkondzweni ya wena, mabohelo lama endlaka leswaku tinyama ti nga tlakuki i manene eka wena, tanihi leswi tinyama leti ti tshamisekaka. (Vona xifaniso.) Ha yini vuxokoxoko lebyi byi ri bya nkoka? Buku leyi fanaka yi ri: “Hakanyingi leswi endlaka leswaku nkondzo wa wena wu nga tshamiseki entangwini, hiloko yi bohiwe ngopfu le henhla, kutani nkondzo wu khomana ngopfu ni xirhendze xa ntangu.”

Ku Vuriwa Yini Hi Tintangu Ta Vavasati Leti Nga Ni Swirhendze Swa Le Henhla?

Tintangu leti vavasati va ti rhandzaka, leti nga ni swirhendze swa le henhla, ti tshikilela miri hi tindlela to hambana-hambana. Swirhendze swa le henhla swi tala ku cinca xivumbeko xa miri, hakanyingi swi endla leswaku munhu a byekela emahlweni, kutani hi ku famba ka nkarhi, a boheka ku petsa matsolo swinene leswaku a ta kota ku yima a ku thwii! Swirhendze swa le henhla swi koka ni misiha ya hala ndzhaku ka nenge, kutani yi sungula ku vonaka.

Kutani, hakanyingi xirhendze i nchumu wa nkoka eka tintangu ta vavasati naswona hi xona xi nga endlaka leswaku a tsakela ntangu kumbe a nga yi tsakeli. Buku leyi nge Professional Shoe Fitting yi vula leswaku ku ni swilo swinharhu swa nkoka eka xirhendze xa ntangu: ‘(1) “xiyimo,” ku fana ni ku endla leswaku munhu a va ehenhla, (2) vuxongi—xivumbeko kumbe xitayele xin’wana xa ntangu ni (3) ku endla leswaku u languteka kahle—tanihi leswi tintangu ta swirhendze swa le henhla ti yi kombisaka kahle milenge ya vona.’

Vavasati va fanele va va ni vuxiya-xiya ngopfu malunghana ni swirhendze swa tintangu, va xiya leswaku swi le mahlweni ngopfu kumbe swi le ndzhaku ngopfu hikuva hi swona leswi endlaka leswaku ntiko wa miri wu talela etlhelo rin’we. Loko ntiko wu talela endzhaku kumbe emahlweni ka xirhendze, ku nga ha va ni swiphiqo. Ha yini? Hikuva xirhendze xexo xi nga ha tshoveka kutani munhu a wa ku vava.

Eka bulo leri ro koma, swi le rivaleni leswaku ku kuma tintangu leti faneleke swi lava nkarhi naswona swi nga ha koxa mali yo talanyana, tanihi leswi swi tekaka nkarhi wo leha ku endla ntangu leyinene. Kambe, tintangu ta wena ti nga ha endla leswaku u swi tsakela ku ti ambala naswona u va ni rihanyo ro antswa. Hikwalaho, ti nyike nkarhi lowu ringaneke loko u hlawula tintangu. Ti pime kahle. Lehisa mbilu. U nga kanganyisiwi hi fexeni kumbe ndlela leyi ntangu yoleyo yi langutekaka ha yona.

[Bokisi leri nga eka tluka 29]

Leswi U Faneleke U Swi Xiya Loko U Hlawula Tintangu

William A. Rossi na Ross Tennant va nyikela swiringanyeto leswi landzelaka ebukwini ya vona leyi nge Professional Shoe Fitting.

“Xikongomelo xo pima nkondzo a hi ku kuma sayizi leyi faneleke ya ntangu hilaha u nga ehleketaka hakona.” Ha yini? Hikuva sayizi ya tintangu yi nga ha khumbiwa hi swilo swo tala, ku fana ni ku tlakuka ka xirhendze, xitayele, xivumbeko, swilo leswi ntangu yoleyo yi rhungiweke ha swona swin’we ni khampani leyi yi yi endleke. Leswi swi tano ngopfu-ngopfu namuntlha laha tintangu ti rhungiwaka ematikweni yo tala swinene naswona ti rhungiwaka hi tindlela to hambana-hambana.

Loko nkondzo wa wena wu pimiwa, koka sokisi leswaku swikunwana swa wena swi nga petseki, kutani ku tekiwa mpimo lowu hoxeke.

Xana u fanele u pimiwa njhani—u tshamile kumbe u yimile? “Ku pimiwa u tshame ehansi a swi kahle.” Swi endla leswaku ku kumeka mpimo lowu hoxeke. Hikwalaho, yima hi milenge loko minkondzo ya wena yi pimiwa. Ina, ku fanele ku pimiwa minkondzo hayimbirhi. U nga ehleketi leswaku nkondzo wa ximatsi hi wona lowukulu. Yi pime hayimbirhi!

“Ntirho wa ku pima tintangu i vutshila lebyi kotiwaka hi ntlawa wo hlawuleka lowu tirhelaka switolo leswikulu, leswi swi twisisaka naswona swi vonaka nkoka wa ku va ni vanhu lava nga ni vutshila lebyikulu bya ku pima tintangu.”

[Tidayagramu leti nga eka tluka 28]

(Leswaku u vona rungula leri hleriweke hi ku helela, vona nkandziyiso wa kona)

Seyenge leswi vumbaka ntangu

soli

ehenhla ka ntangu

nkolo

laha ku fambaka sokisi

xirhendze xo leha

soli ya xirhendze

eswikun’wanini

soli ya le handle

exikarhi ka soli

ehenhla ka ntangu

bandi ra nkolo

ririmi

rihlanguti

xiponci xa le xirhendzeni

xirhendze

[Swifaniso leswi nga eka tluka 29]

Nchumu lowu vuriwaka Brannock

[Xifaniso lexi nga eka tluka 30]

Tintangu hinkwato loko ti endliwa ti va ti sekeriwe eka marhungelo lawa ya nkombo

[Swifaniso leswi nga eka tluka 30]

Marhungelo ya nkolo

Blucher

Bal