Misava Yo Pfumala Swidzidzirisi—Yi Ta Va Kona Ku Nga Ri Khale
Xana u anakanya leswaku yi nga va kona misava leyi nga riki na swidzidzirisi leswi tirhisiwaka hi ndlela yo biha?
MATSALANA JENERALA wa Nhlangano wa Matiko, Kofi Annan, u rhambe matiko hinkwawo leswaku ma lwela ku fikelela pakani yoleyo. U te: “Hi fanele hi teka magoza lamantshwa ni ya vukarhi ya ku lwisana ni vubihi lebyi; ku nga ntungu lowu se wu phaseke vana va hina vo tala.”
Hambiloko varhangeri vo pfumela ku hunguta ku endliwa ni ku xavisiwa ka swidzidzirisi leswi nga riki enawini emisaveni hinkwayo, kambe ku ni ntlhontlho lowukulu. Hennadiy Udovenko wa le Ukraine, loyi a nga holobye-nkulu wa xiyenge xa Nhlengeletano ya Mani na Mani ya Nhlangano wa Matiko, u vule leswaku ku “xavisa swidzidzirisi i bindzu lerikulu ra le xihundleni leri hi xiringaniso ri nghenisaka mali leyi tlulaka $400 wa tibiliyoni [R3, 75 wa tibiliyoni] hi lembe, . . . ri nga ha tsekatsekisa ikhonomi ya misava hinkwayo.” U ye emahlweni a vula leswaku xiphiqo xa swidzidzirisi “xi hundzuke nxungeto emisaveni hinkwayo naswona a ku na tiko leri nga titwaka ri sirhelelekile.”
A swi olovi ku ehleketa hi misava leyi pfumalaka swidzidzirisi leswi nga riki na khombo. Kunene tihulumendhe ta vanhu ti vonaka ti tsandzekile ku swi herisa. Hambiswiritano, a nga kona loyi a nga sivelaka Xikwembu xa Matimba Hinkwawo ku hetisisa xikongomelo xa xona xo endla misava yi va paradeyisi, leyi eka yona swilaveko swa mintlhaveko, swa le mirini ni swa moya swi nga ta kumeka. (Pisalema 145:16; Luka 23:43; 2 Petro 3:13) Hi ku ya hi muprofeta Esaya, rito ra Xikwembu ‘a ri nge tlheleli eka xona ri nga ri na vuyelo, kambe kunene ri ta endla leswi xi swi tsakelaka, naswona ri ta humelela hakunene eka leswi xi ri rhumeleke swona.’—Esaya 55:11.
Ku veka ntshembo eka switshembiso sweswo swi nga va ni vuyelo lebyinene hambi ku ri sweswi. Hi xikombiso, Edmundo a a tirhisa swidzidzirisi. Kambe endzhaku ko amukela xitshembiso xa Bibele xa misava leyintshwa yo lulama, u sungule ku cinca vutomi byakwe. Sweswi Edmundo u ri: “Ndzi tlange hi nkarhi wa mina.” Leswi a navelaka ku amukeriwa hi Xikwembu, sweswi u tiyimisele ku papalata swidzidzirisi. Ina, ku tiva Xikwembu swin’we ni switshembiso swa xona swi nga hi susumetela ku “ambala vumunhu lebyintshwa lebyi tumbuluxiweke hi ku ya hi ku rhandza ka Xikwembu hi ku lulama ka ntiyiso ni vutshembeki.”—Vaefesa 4:24.
Vanhu van’wana va ntsandza vahlayi lava a va tirhisa swidzidzirisi hi ndlela yo biha, se va ni vuxaka lebyikulu ni Muvumbi wa vona. Marito lawa ya mupisalema ma rhandzeka eka vona: “U nga swi tsundzuki swidyoho swa le vuntshweni bya mina ni leswi ndzi ku pfukeleke ha swona. Ndzi tsundzuke hi ku landza musa wa wena wa rirhandzu, hikwalaho ka vunene bya wena, wena Yehovha. Yehovha hi lonene naswona u lulamile. Hi yona mhaka leyi a letelaka vadyohi hi ndlela leyi.” (Pisalema 25:7, 8) I mhaka leyi chavelelaka swinene eka vatswari lava vana va vona va hambukeke, ku tiva leswaku vana va vona va nga cinca! Loko vo tikarhata, vatswari va nga swi kota ku pfuna vana va vona leswaku va hlula ntungu wa ku tirhisa swidzidzirisi kutani va “khomelela swinene evuton’wini bya xiviri.”—1 Timotiya 6:19.
[Swifaniso leswi nga eka tluka 10]
Ntshembo wo hanya emisaveni leyintshwa ya Xikwembu wu susumetele vanhu vo tala lava a va tirhisa swidzidzirisi leswaku va cinca vutomi bya vona