Vantshwa Va Vutisa . . .

Ha Yini Ndzi Fanele Ndzi Hlaya?

“A ndzi na yona mbilu yo hlaya. Swa antswa ndzi hlalela thelevhixini.”—Margarita, la nga ni malembe ya 13, wa le Rhaxiya.

“Loko vo ndzi kombela leswaku ndzi hlawula exikarhi ka ku hlaya buku ni ku tlanga ‘basketball,’ ndzi nga hlawula ku tlanga.”—Oscar, la nga ni malembe ya 19, wa le United States.

LOKO u tinyike nkarhi wa ku hlaya ku ta fikela laha, kumbexana wa swi lemuka leswaku ku hlaya i vuswikoti byo hlawuleka lebyi lavaka ku dyondziwa. Nilokoswiritano, u nga ha teka ku hlaya buku kumbe xihloko eka magazini wo karhi tanihi ku nwa murhi: Wa swi tiva leswaku wu ta ku pfuna, kambe a wu swi lavi ku wu nwa.

Xalamuka! yi burisane ni vantshwa lava humaka ematikweni ya 11 ku twa vonelo ra vona malunghana ni mintlhontlho ni mimbuyelo ya ku hlaya. Va vule leswi landzelaka.

Ha yini swi ku nonon’hwela ku hlaya?

“Swi vonaka swi ndzi tikela ku kuma nkarhi wo hlaya.”—Semsihan, wa malembe ya 19, wa le Jarimani.

“Ku hlaya swi lava ku tiyimisela. Ndzi vona onge ndzi ni vulolonyana.”—Ezekiel, wa malembe ya 19, wa le Philippines.

“Ndza swi venga ku sindzisiwa ku hlaya timhaka to lolohisa.”—Christian, wa malembe ya 15, wa le Nghilandhi.

“Loko buku yi ri yitsongo, ndzi nga ha navela ku yi hlaya. Kambe loko yi ri yikulu, ya ndzi chavisa.”—Eriko, wa malembe ya 18, wa le Japani.

“Ndzi kavanyeteka hi ku olova hi swilo swin’wana. Swa ndzi tikela ku tshama ndzi yingisele nchumu un’we.”—Francisco, wa malembe ya 13, wa le Afrika Dzonga.

Vantshwa lava nga Vakreste va khutaziwa ku hlaya Bibele. (Pisalema 1:1-3) Xana ku endla sweswo swa ku tikela? Loko swi ri tano, ha yini?

“Bibele i buku leyikulu swinene! Ndzi vona onge a ndzi nge pfuki ndzi yi hlaye hinkwayo evuton’wini bya mina hinkwabyo!”—Anna, wa malembe ya 13, wa le Rhaxiya.

“Swiphemu swin’wana swa Bibele swa nonon’hwa naswona a swi tsakisi.”—Jezreel, wa malembe ya 11, wa le Indiya.

“Swa ndzi tikela ku hlaya Bibele hi masiku hikuva xiyimiso xa mina a xi hlelekanga nikatsongo.”—Elsa, wa malembe ya 19, wa le Nghilandhi.

“Swa ndzi tikela hikuva swintirhwana swa le kaya ni ntirho wa xikolo swi ndzi dyela nkarhi wo tala.”—Zurisadai, wa malembe ya 14, wa le Mexico.

“Swa ndzi tikela ku hlaya Bibele hikuva swi vonaka ndzi tsandzeka ku hunguta nkarhi lowu ndzi wu tirhiselaka ku tihungasa.”—Sho, wa malembe ya 14, wa le Japani.

Swi le rivaleni leswaku ku hlaya swi nga ha va ntlhontlho. Kambe, xana hi nga vuyeriwa hi ku endla matshalatshala? Xana swi ku pfune njhani ku hlaya?

“Ku hlaya swi ndzi pfune leswaku ndzi va ni vutivi lebyi engetelekeke, naswona sweswo swi endle leswaku ndzi titshemba swinene loko ndzi vulavula ni vanhu.”—Monisha, wa malembe ya 14, wa le Indiya.

“Ku hlaya swa ndzi wisisa naswona swi ndzi endla ndzi rivala maxangu ya mina.”—Alison, wa malembe ya 17, wa le Australia.

“Ku hlaya swi ndzi yisa etindhawini to hambana-hambana hi mahlo ya mianakanyo, tindhawu leti ndzi nga ta kala ndzi nga pfuki ndzi fikile eka tona.”—Duane, wa malembe ya 19, wa le Afrika Dzonga.

“Ku hlaya swi ndzi pfuna leswaku ndzi tikambisisela swilo hi ndzexe ematshan’weni yo titshega hi leswi van’wana va ndzi byelaka swona.”—Abihú, wa malembe ya 16, wa le Mexico.

I yini leswi ku pfuneke leswaku u tiphina hi ku hlaya?

“Ku sukela loko ndza ha ri ntsongo, vatswari va mina va ndzi khutaze ku hlaya hi rito ra le henhla.”—Tanya, wa malembe ya 18, wa le Indiya.

“Vatswari va mina va ndzi khutaze leswaku ndzi ringeta ku swi vona hi tihlo ra mianakanyo leswi ndzi swi hlayaka.”—Daniel, wa malembe ya 18, wa le Nghilandhi.

“Tatana u ndzi khutaze leswaku ndzi sungula hi tibuku ta Bibele leti ndzi kumaka ti tsakisa swinene, to fana ni Tipisalema ni Swivuriso. Se swa ndzi tsakisa ku hlaya Bibele, a ka ha ri ndzhwalo.”—Charene, wa malembe ya 16, wa le Afrika Dzonga.

“Loko se ndzi ri ni malembe ya mune, vatswari va mina va ndzi nyike desika ni xitlati xa tibuku lexi nga ni tibuku hinkwato leti va ndzi vekeleke tona ku sukela loko ndza ha ku velekiwa.”—Airi, wa malembe ya 14, wa le Japani.

Ha yini u ehleketa leswaku i swa nkoka ku hlaya Bibele?

“Swi tele leswi vanhu va swi kholwaka hi Bibele leswi nga riki ntiyiso. Swa antswa loko u kambisisa swilo leswi hi wexe.” (Mintirho 17:11)—Matthew, wa malembe ya 15, wa le United States.

“Bibele yi lava leswaku munhu a ehleketisisa kahle. Kambe ku yi hlaya swi ndzi pfunile leswaku ndzi kota ku chumayela van’wana ndzi ntshunxekile.” (1 Timotiya 4:13)—Jane, wa malembe ya 19, wa le Nghilandhi.

“Loko ndzi hlaya Bibele, ndza swi vona leswaku Yehovha u vulavula na mina hi ku kongoma. Minkarhi yin’wana swi khumba ndlela leyi ndzi titwaka ha yona.” (Vaheveru 4:12)—Obadiah, wa malembe ya 15, wa le Indiya.

“Ndzi ringeta ku tiphina hi ku hlaya Bibele hikuva yi ndzi byela leswi Yehovha a swi ehleketaka ha mina naswona yi ndzi nyika switsundzuxo leswinene.” (Esaya 48:17, 18)—Viktoriya, wa malembe ya 14, wa le Rhaxiya.

Xana u wu kuma rini nkarhi wa ku hlaya Bibele ni tibuku leti sekeriweke eBibeleni?

“Ndzi ni xiyimiso. Ndzi hlaya ndzima yin’we ya Bibele siku rin’wana ni rin’wana nimixo loko ndzi pfuka.”—Lais, wa malembe ya 17, wa le Brazil.

“Ndzi hlaya Bibele ni tibuku tin’wana ta Vukreste loko ndzi khandziye xitimela ndzi ya exikolweni. Se ku hundze malembe ya mune ndzi ri karhi ndzi endla tano.”—Taichi, wa malembe ya 19, wa le Japani.

“Ndzi hlaya Bibele vusiku byin’wana ni byin’wana ndzi nga si ya eku etleleni.”—Maria, wa malembe ya 15, wa le Rhaxiya.

“Ndzi hlaya matluka ya mune ya ‘Xihondzo xo Rindza’ kumbe ya ‘Xalamuka!’ siku ni siku. Ndza swi kota ku heta magazini hinkwawo ku nga si fika wun’wana.”—Eriko, wa malembe ya 18, wa le Japani.

“Ndzi hlaya Bibele mixo wun’wana ni wun’wana ndzi nga si ya exikolweni.”—James, wa malembe ya 17, wa le Nghilandhi.

Hilaha marito lama nga laha henhla ma kombiseke hakona, ku hlaya ku nga endla leswaku u titshemba naswona swi nga ku pfuna ku ndlandlamuxa vutivi bya wena. Ku hlaya Bibele ni tibuku leti sekeriweke eBibeleni—ku fana ni magazini lowu—swi ta tlhela swi ku pfuna leswaku u ‘tshinela eka Xikwembu.’ (Yakobo 4:8) Kutani, hambiloko u kuma swi ri ntlhontlho ku hlaya, u nga heli matimba!

LESWI U NGA EHLEKETAKA HA SWONA

◼ Ha yini swi ri swa nkoka leswaku u hlaya Rito ra Xikwembu?

◼ U nga wu ‘xava njhani nkarhi’ wa ku hlaya Bibele ni minkandziyiso leyi sekeriweke eBibeleni?—Vaefesa 5:15, 16.

[Bokisi leri nga eka tluka 16]

Pimanisa Leswi U swi Hlayaka Ni Leswi U Swi Tivaka

Pimanisa leswi u swi hlayaka ni leswi ana se u swi tivaka ha wena ni ndhawu leyi u nga eka yona. Tivutise swivutiso leswi landzelaka:

◼ Leswi U Swi Hlayaka Ni Leswi U Swi Hlayeke Xana swiyimo kumbe swiphiqo leswi hlamuseriweke kwalaho swa fana ni leswi hlamuseriwaka etibukwini tin’wana, eka timagazini kumbe eka switori leswi ndzi swi hlayeke? Xana vanhu lava ku vulavuriwaka ha vona laha va ni mahanyelo lama fanaka ni ya vanhu lava ndzi tshameke ndzi twa ha vona?

◼ Kombetela Rungula Eka Wena N’wini Xana rungula leri ri fambisana njhani ni swiyimo swa mina, ndhavuko ni swiphiqo swanga? Xana ndzi nga tirhisa rungula leri ku ndzi pfuna ku langutana ni swiphiqo kumbe ku antswisa vutomi bya mina?

◼ Rungula Ri Fambisana Ni Swiyimo Xana rungula leri ri ndzi dyondzisa yini hi ntumbuluko, mbango, mindhavuko yo hambana-hambana kumbe swiphiqo etikweni? Xana rungula leri ri ndzi dyondzisa yini hi Muvumbi?