Xo Antswa Ku Tlula Ku Tlanga eMagandlatini
Hi ku vula ka Karl Heinz Schwoerer
Ndzi tswaleriwe ePittsburgh, le Pennsylvania, eU.S.A. hi 1952, kambe ndzi kulele eNew Smyrna Beach le Florida. Loko ndza ha ri emalembeni ya kondlo-a-ndzi-dyi, ndzi sungule ku rhandza ngopfu ntlango wo tlanga emagandlatini (surfing). Kahle-kahle, ntlango lowu wu ve wona wa nkoka ngopfu evuton’wini bya mina.
HI 1970, ndzi sungule ku dyondzela ku va muhahisi wa swihaha-mpfhuka eYunivhesiti ya Embry-Riddle Aeronautical leyi nga eDaytona Beach le Florida. Hambiswiritano, ndzi hetiwe matimba ngopfu hikwalaho ka leswi enkarhini wolowo hulumendhe yi sunguleke nyimpi ni tiko ra Vietnam leyi a ndzi yi vona yi ri nyimpi ya tihanyi. Leswi sweswo swi hi nyangatseke ni vantshwa van’wana va le nkarhini wolowo, ndzi tshike xikolo kutani ndzi nghenela xitayele xa vuhipi. Ndzi fuwe misisi ndzi tlhela ndzi tirhisa swidzidzirisi.
Ku nga si hundza nkarhi wo leha ndzi tivane na Susan, ntombhi ya migingiriko leyi nga ni nyiko yo dirowa ni ku teka swifaniso. Ndzi dye marhambu ya nhloko hi ta vutomi bya hina, ndzi vona leswaku loko ho tihanyela vutomi byo olova, ndzi nga tirha ntirho wo aka tin’hweti ta tsevu ku ya eka ta nhungu eFlorida kutani tin’hweti letin’wana ta lembe hi ti heta hi titshamele etendeni eRibuweni ra Pacific eMexico ni le Amerika Xikarhi.
Ku Khathala Hi Timhaka Ta Swa Moya
A swi tsakisa ngopfu ku tihanyela hi nga vileli hi nchumu eribuweni ra lwandle etindhawini to hisa, Sue a ri karhi a dirowa ni ku teka swifaniso, mina ndzi ri karhi ndzi titlangela emagandlatini. Kambe endzhaku ka malembe yo hlayanyana, hi sungule ku swi xiya leswaku vutomi bya hina a byi na xikongomelo. A swi tikomba ku ri ni lexi kayivelaka evuton’wini bya hina. Xisweswo, exikarhi ka lembe ra 1975, loko hi tshama le Ribuweni ra Pacific eCosta Rica, ndzi sungule ku lava ku voningeriwa hi tlhelo ra moya. Ndzi hlaye tibuku ta vukhongeri bya le Vuxeni ni ta tifilosofi leti a ti dumile enkarhini wolowo.
Leswi tibuku leti hakanyingi a ndzi ti hlaya a ti tshaha Bibele tanihi vumbhoni bya leswaku tidyondzo ta tona i ntiyiso, ndzi tibyele leswaku swi vula leswaku ntiyiso wu sekeriwe eBibeleni. Hiloko ndzi nyika munhu un’wana swikowa leswi vangaka mihahamo kutani yena a ndzi nyika Bibele ya Vuhundzuluxeri bya King James. Ndzhenga wun’wana ni wun’wana a ndzi tshama ehansi ndzi tihlayela Bibele, endzhaku ko heta mixo hinkwawo ndzi ri karhi ndzi tlanga emagandlatini. Hambileswi a ndzi hisekela ku hlaya Bibele a ndzi nga yi twisisi.
“Xana U Ni Swivutiso Swa Bibele?”
Hi August 1975, mina na Sue loko hi ri endleleni hi huma eCosta Rica hi kongome eUnited States, hi fike aEl Salvador hi nghena ekhemisi leswaku hi ta xava murhi. Loko hi ri karhi hi ringeta ku vulavurisana ni muendli wa mirhi ekhemisi kambe hi nga twanani hi ririmi, muxavi un’wana loyi va nge i Jenny u hi pfunile. A a ri nhwanyana wa malembe ya 16 la humaka eAmerika loyi a xi tivaka kahle Xipaniya. U vule leswaku yena ni vatswari vakwe i Timbhoni ta Yehovha naswona va rhurhele aEl Salvador leswaku va ta dyondzisa vanhu Bibele.
Jenny u ndzi vutise a ku, “Xana u ni swivutiso swa Bibele?”
Hiloko ndzi ku, “Ina, ndzi na swona!” Hambileswi a hi endle switayele swa hina swa vuhipi, Jenny u vhele a hi rhamba ekaya ka vona hi ya vona vatswari vakwe, Joe na Nancy va ka Trembley. Hi pfumerile ku famba na yena. Hi dzumbe na vona ndzhenga hinkwawo hi ri karhi hi vutisa swivutiso swa Bibele naswona ndlela leyi Joe na Nancy va hi hlamuleke ha yona yi hi tsakise ngopfu. Nkarhi na nkarhi a va ku, “Pfula Bibele ya wena u hlaya tsalwa ra kona.”
Ri hi pelele kwale, hiloko va hi nyika byetlelo ekaya ra vona. Kambe a va pfumelanga leswaku mina na Sue hi etlela ekamareni rin’we tanihi leswi a hi nga tekananga ximfumo. Sue na Jenny va sale va xuxa nkarhi wo leha va ri karhi va bula hi timhaka to tala ta Bibele—ku sukela eka ta Adamu ku ya eka ta Armagedoni.
Bibele Ya Rihlaza
Hi xamundzuku xa kona loko hi nga si famba, Joe na Nancy va hi nyike tibuku, timagazini to tala ta Xihondzo xo Rindza ni Xalamuka! ni Bibele. Bibele ya kona a ku ri Vuhundzuluxeri Bya Misava Leyintshwa Bya Matsalwa Yo Kwetsima, lebyi enkarhini wolowo a byi ri ni xifunengeto xo tsindziyela xa rihlaza. Joe u fambe na hina a ya hi komba Holo ya Mfumo. A wu ri muako wo saseka laha Timbhoni ta Yehovha a ti hlangana kona ti dyondza Bibele. Hiloko embilwini ya mina ndzi ku, ‘A yi fani ni tikereke ta manyunyu ta Vujagana leti eka tona vanhu va nga dyondziki swo nyawula hi Bibele!’
Rona siku rero, loko hi fika endzilakanini wo nghena eGuatemala, Bibele ya rihlaza yi hlamarise vatirhela-mfumo lava a va ri kwalaho. Va hlamarile hikuva hi ntolovelo va yi tiva yi tirhisiwa hi Timbhoni ta Yehovha. Kambe hina a hi nga languteki hi ri Timbhoni nikatsongo. Ku nga khathariseki ndlela leyi a hi languteka ha yona va hi pfumelele leswaku hi hundza endzhaku ka timinete ti nga ri tingani. Leswi swi hi hlamarise ngopfu hikuva hi ntolovelo a va secha movha ni mindzhwalo ya hina ku vona loko ku nga ri na swidzidzirisi ni swilo swin’wana leswi nga riki enawini. Hiloko hi sungula ku teka Bibele ya rihlaza yi ri mhamba.
Loko hi ri karhi hi hambeta hi hlaya Bibele ni tibuku leti dyondzisaka Bibele a hi tiyiseka leswaku hi kume ntiyiso mayelana ni Xikwembu. Loko hi ri karhi hi famba-famba hi movha le Mexico a ndzi swi langutele hi mahlo-ngati ku heta mavhiki mambirhi ndzi ri karhi ndzi tlanga emagandlatini le Puerto Escondido, ku nga ndhawu leyi a ndzi yi rhandza ngopfu. Endzhaku ko tiphina hi ku tlanga emagandlatini a ndzi tiyimisele ku tlhelela eFlorida ivi ndzi va nandza wa Yehovha.
Mavhiki mambirhi lama landzeleke, mixo wun’wana ni wun’wana ndzi wu hete ndzi ri eku tlangeni emagandlatini. Kutani nindzhenga a ndzi tshama eribuweni ndzi tihlayela Bibele ni tibuku ta Bibele. N’wana un’wana wa malembe ya nhungu u kokiwe mahlo hi Bibele ya rihlaza, hiloko a sindzisa leswaku nimadyambu hi famba na yena kun’wana. A hi nga swi twisisi leswaku u lava hi ya kwihi, kambe lexi a hi xi tiva hileswaku ndhawu ya kona yi fambisana na Bibele ya rihlaza. Hiloko hi ala kambe a sindzisa. Endzhaku ka masikunyana hi hetelele hi fambe na yena. U hi yise eHolweni ya Mfumo ya Timbhoni ta Yehovha, leyi akiweke hi musengele yi fuleriwa hi byanyi. Un’wana ni un’wana u hi xewetile a hi qhavula ni ku hi angarha onge i khale hi ri vanghana.
Hi tsakisiwe hi ndlela leyi xiximekaka leyi hinkwavo a va tikhome ha yona. Loko nhlangano wu ya emahlweni, vana van’wana a va hi xondzolota kumbexana hikwalaho ka leswi a va nga si tshama va vona vanhu va misisi ya wanuna yo leha hi ndlela yoleyo. Vatswari va vona a va boheka ku tshamela ku va tsundzuxa leswaku va fanele va rhiya ndleve. Kambe, Yehovha u tirhise n’wana wo ringana na vona leswaku a hi yisa eka nhlangano wa hina wo sungula.
Ku Tiyimisela Ku Tirhela Yehovha
Endzhaku ka mavhiki mambirhi ya ku tlanga emagandlatini ro hetelela, ndzi xavise tibodo ta mina to tlanga ha tona emagandlatini, kutani hi khoma ndlela hi movha hi kongoma eFlorida. Loko hi fika kwalaho hi sungule ku dyondza Bibele ni Timbhoni ta Yehovha hi tlhela hi ya ni le minhlanganweni hinkwayo ya vandlha. Leswi a hi tiyimisele ku tirhela Yehovha, hi tshike ku tshama swin’we hi tlhela hi tshika ni vanghana va hina va khale. Ndzi tseme malepfu ni misisi, kutani Sue a xava tirhoko ti nga ri tingani. Endzhaku ka tin’hweti ta mune hi tekane ximfumo, kutani hi April 1976, hi khuvuriwa hi kombisa ku tinyiketela ka hina ku tirhela Xikwembu.
Sweswi vutomi bya hina a byi ri ni xikongomelo. Hi nkhensa Yehovha hi vuyelela hikwalaho ka mikateko hinkwayo leyi hi nga na yona, a hi swi langutele hi mahlo-ngati ku tlhelela etikweni leri ku vulavuriwaka Xipaniya eka rona hi ya chumayela kona mahungu lamanene ya Mfumo wa Xikwembu. Kambe vakulu lava nga Vakreste va le vandlheni ra hina va hi nyike xitsundzuxo va ku: “Pfanani mi yimilenyana. Rhangani mi tiaka emoyeni leswaku mi ta kota ku va ni swo pfuna van’wana ha swona.” Hi xi amukerile xitsundzuxo xa vona, endzhaku ka sweswo pakani ya hina a ku ri ku va maphayona hilaha vachumayeri va nkarhi hinkwawo lava nga Timbhoni ta Yehovha va vitaniwaka hakona.
Sue u sungule ku phayona hi January 1978. Na mina a ndzi swi lava ku phayona, kambe a ndza ha kolota mali yo tala le yunivhesiti. Hiloko ndzi ta ni rhengu ro olova ro tlhantlha xiphiqo lexi. A ndzi ta titsarisa eka hulumendhe tanihi munhu la nga riki na mali yo hakela xikweleti leswaku xi ta suriwa.
Kambe, vakulu va ndzi layile hi vutlhari malunghana ni rhengu leri, va ndzi hlamusela leswaku ri ta va ri lwisana ni misinya ya milawu ya Bibele ya ku “tshembeka eka swilo hinkwaswo.” (Vaheveru 13:18) Hiloko ndzi hambeta ndzi tirha leswaku ndzi ta hakela swikweleti swa mina. Eku heteleleni hi September 1979, ndzi fikelele pakani ya mina yo joyina Sue entirhweni wa vuphayona. Endzhaku ka sweswo leswi a hi tihanyela vutomi byo olova a ndzi boheka ku tirha ntsena masiku ma nga ri mangani leswaku hi kota ku tihanyisa.
Ku Tirha eBethele Ya Le Brooklyn
Hi April 1980, endzhaku ka lembe hi ri karhi hi phayona swin’we hi twe mhaka yo hlamarisa. Eku sunguleni hi rhambiwe entirhweni wo aka, kambe hina a hi endle swikombelo swo ya tirha eBethele, eyindlu-nkulu ya Timbhoni ta Yehovha eBrooklyn le New York. Se a hi kume xirhambo xa leswaku hi ta endzhaku ka masiku ya 30! A hi pfilunganyekile, tanihi leswi a hi byi rhandza ngopfu vuphayona. Leswi a hi nga tiyiseki hi leswi hi faneleke hi swi endla, hi bule hi mhaka leyi ni vakulu vambirhi lava hi pfuneke leswaku hi vona nkoka wa lunghelo leri hi nyikiweke rona. Va hi tsundzuxile va ku, “Fambani mi ya ringeta ku tirha eBethele ku ringana lembe.” Hiloko hi xavisa nhundzu ya hina hinkwayo kutani hi kongoma eBrooklyn.
Endzhaku ko tirha entirhweni wo aka ku ringana malembe mambirhi, ndzi rhambiwe ku ya tirha eHofisi yo Endla Tipulani ta Miako, ndzi leteriwe ku dirowa miako. Sue u tirhe laha ku Hlanganisiwaka Tibuku ku ringana lembe kutani a cinceriwa eka Ndzawulo yo Hlela Swifaniso swa Minkandziyiso. Lembe ni lembe hi siku ra ku tekana ka hina, a hi kambisisa swiyimo swa hina ni leswi a hi navela ku swi endla n’wexemu ka kona kutani hi tiyimisele ku hambeta hi tirha eBethele.
Loko malembe ma ri karhi ma famba, hi ve ni vanghana lavakulu va kahle ngopfu. Ku tlula kwalaho, leswi Bethele yi hi pfumeleleke leswaku hi tirhela Yehovha ni vamakwerhu emisaveni hinkwayo hi ndlela leyi enerisaka, hi hambete hi tiyimisela ku tshama kona. Hi 1989 hi sungule ku dyondza Xipaniya lexi nga endla leswaku hi averiwa evandlheni ra kona le Brooklyn. Hikwalaho ka sweswo, hi ve ni lunghelo ro tirha eka swiavelo swimbirhi—eBethele ni le vandlheni ra ririmi rimbe.
Siku rin’wana Jenny, loyi se ku vulavuriweke ha yena, u hi endzerile eBethele ya le Brooklyn, naswona swi tsakise ngopfu ku twa leswaku yena a a ehleketa yini loko a hi vona ro sungula le El Salvador. U vule leswaku a a ri eku fambiseni ka dyondzo ya Bibele loko a sungula ku ka a nga ha titwi kahle. Loko a ri endleleni yo muka, u vone swi antswa leswaku a hundza a xava murhi. Hikwalaho ka xivangelo xo karhi a nga yanga ekhemisi leyi a nga tshama a ya eka yona, u ye eka liya a hi ri eka yona.
Ku Tirha eMatikweni Man’wana
Siku rin’wana hi 1999 mulanguteri wa ndzawulo leyi a ndzi ri eka yona le Bethele u ndzi vutise xivutiso xin’wana ndzi nga swi rindzelanga a ku, “Xana u nga swi tsakela ku ya eBethele ya le Australia u ya tirha eHofisi ya Vunjhiniyara ya Xifundzha ku ringana tin’hweti tinharhu?”
Ndzi hlamule handle ko kanakana ndzi ku, “Ina.” Ku nga ri khale se a hi ri endleleni yo ya eAustralia laha hi nga fika hi tirha malembe manharhu. Hi tiphinile hi ku pfuna eka ndzawulo yo dirowa tipulani ta miako ya marhavi ya matiko yo tala ya le Vuxeni ni le Pacific Dzonga. Loko hi tlhelela eBrooklyn hi 2003, hi tlhele hi byeriwa mahungu man’wana yo hlamarisa. Hi nyikiwe xirhambo xo ya tirha etikweni rimbe, eHofisi ya Xifundzha yo Aka Tiholo ta Mfumo leyi nga erhavini le Brazil, ehandlenyana ka doroba lerikulu ra São Paulo.
Hi laha hi nga kona nisweswi. Hofisi leyi yi langutela ku akiwa ka Tiholo ta Mfumo ematikweni yo tala ya le Amerika Dzonga. Xiavelo xa mina xi katsa ku famba ndzi pfuna entirhweni lowu wo aka ni ku khutaza lava tirhaka eka swiyenge swo tala—naswona Sue u famba na mina.
Ku Rhangisa Leswi Faneleke
Ndza ha swi tsakela ku tlanga emagandlatini, kambe se ndzi kume swo antswa ku tlula magandlati. Sweswi ku tlanga emagandlatini ndzi swi teka tanihi vuhungasi ntsena. Ndzi dzikise mianakanyo ya mina entirhweni wa nkoka ngopfu wa ku tirhela Yehovha Xikwembu xa hina xa rirhandzu naswona Sue wa ndzi seketela hi rirhandzu.
Lexi hi khathalaka ha xona ngopfu sweswi i ku va hi tirhisa vutomi bya hina etimhakeni ta Mfumo ni ku ndlandlamuxa vugandzeri bya Yehovha Xikwembu. Hi dyondze leswaku nchumu wa nkoka ngopfu a hi laha hi tirhelaka Yehovha hi ri kona, kambe i ku va hi n’wi tirhela hi mbilu hinkwayo kwihi na kwihi laha hi nga kona.—Vakolosa 3:23.
[Nkomiso eka tluka 25]
“Ndza ha swi tsakela ku tlanga emagandlatini, kambe se ndzi kume swo antswa ku tlula magandlati”
[Xifaniso eka tluka 22, 23]
Xifaniso xa mina ndzi ri karhi ndzi tlanga emagandlatini, lexi nga humesiwa eka Nkhuvo wa Ximumu wo Tlanga eMagandlatini
[Xifaniso eka tluka 23]
Loko ndzi ri ni malembe ya 13
[Xifaniso eka tluka 23]
Ndzi vone vuhipi bya mina byi nga ndzi pfuni nchumu
[Swifaniso eka tluka 25]
Ehenhla: Ndzi ri karhi ndzi pfuna eku akeni ka Holo ya Mfumo Exineneni: Ndzi ri na Sue sweswi