Tiyimisele

Leswaku u kota ku tiyimisela entirhweni wun’wana ni wun’wana, u fanele u xiya ndlela leyi wu ku pfunaka ha yona.

I YINI leswi xikolo xi nga ku pfunaka ha swona? Xi nga ku pfuna leswaku u kuma vutlhari naswona Bibele yi vula leswaku “vutlhari i xisirhelelo.” (Eklesiasta 7:12) Hi ndlela yihi? Hi xikombiso: Tivone hi mahlo ya mianakanyo u ri karhi u famba endhawini leyi nga ni khombo. Xana a wu ta hlawula ku famba u ri wexe kumbe ku famba ni vanghana va wena lava nga ku sirhelelaka loko wo tshuka u humeleriwa hi swin’wana? Swilo leswi landzelaka leswi u nga swi dyondzaka exikolweni swi fana ni vanghana lava nga ku pfunaka evuton’wini bya wena:

Vuswikoti byo ehleketa. Ku ya exikolweni swi nga ku pfuna leswaku u kuma vutshila lebyi Bibele yi byi vitanaka “vutlhari lebyi pfunaka ni vuswikoti byo ehleketa.” (Swivuriso 3:21) Vutshila byebyo byi ta ku pfuna leswaku u kota ku titlhantlhela swiphiqo ematshan’weni yo lava ku tlhantlheriwa swona hi vanhu van’wana.
Vuswikoti byo hanyisana ni vanhu van’wana. Bibele yi khutaza Vakreste leswaku va hlakulela timfanelo to tanihi ku lehisa mbilu ni ku tikhoma. (Vagalatiya 5:22, 23) Ku nghena xikolo ni vanhu vo hambana-hambana swi ku pfulela tindlela to tala to hlakulela timfanelo teto ni tin’wana to tanihi ku anakanyela, xichavo ni ntwela-vusiwana—leti nga ku pfunaka swinene loko se u kurile.
Ndzetelo lowu vuyerisaka. Xikolo xi nga ku dyondzisa ndlela leyi swi nga swa nkoka ha yona ku va ni matirhelo lamanene, lama nga ta ku pfuna leswaku u kuma ntirho wu tlhela wu nga ku lahlekeli. Nakambe loko u ya u va tiva kahle vanhu lava u hanyaka na vona, u ta swi twisisa kahle leswaku u munhu wa muxaka muni nileswaku i yini leswi nga swa nkoka swinene eka wena. (Swivuriso 14:15) Xisweswo, u ta kota ku ti yimela hi xichavo tidyondzo leti u pfumelaka eka tona.—1 Petro 3:15.

Makumu ya mhaka: Tanihi leswi u lavaka dyondzo, a swi nge ku pfuni nchumu ku tshamela ku ehleketa hi swilo leswi u nga swi rhandziki hi xikolo. Ematshan’weni ya sweswo, ehleketa hi swilo leswi ku khutazaka leswi boxiweke laha henhla. U nga ha ehleketa ni hi swilo swin’wana leswi khutazaka.

Ha yini u nga sunguli sweswi? Ehleketa hi xivangelo-nkulu lexi ku khutazaka leswaku u lava ku humelela exikolweni.

Vadyondzisi Lavanene Va Tlangeriwa!

“Mudyondzisi loyi a a ndzi dyondzisa dyondzo ya swa mabindzu (economics) exikolweni xa le henhla a a ta va a tirha ekhampanini ya swa timali, kambe ematshan’weni ya sweswo u hlawule ku ta dyondzisa exikolweni xa ka hina lexi nga emugangeni lowu sweleke, lowu swichudeni swa kona a swi nga ri na mhaka ni dyondzo yoleyo. Nilokoswiritano, a a hi dyondzisa hi ndlela leyi twisisekaka ni leyi tsakisaka naswona sweswo swi hi pfune ku xiya ndlela leyi dyondzo yoleyo a yi ri ya nkoka ha yona eka hina. Siku rin’wana u kale a vitana manana exikolweni leswaku a ta n’wi byela leswaku ndzi xi tsale kahle xitsalwana. Loko swichudeni swi n’wi vutisa leswaku ha yini a hlawule ku ta dyondzisa exikolweni xa hina, u vule leswaku a xi ri kahle ngopfu ku tlula swikolo hinkwaswo leswi a tshameke a dyondzisa eka swona. A a hi twisisa, a a khathala hi hina naswona a a hi bumabumela. A a ri mudyondzisi lonene ku tlula hinkwavo lava tshameke va ndzi dyondzisa!”—Reyon wa le United States.