Xiviko Xa Vahuweleri Va Mfumo

Ku Lavisisa Ntiyiso Ku Hakeriwile

BIBELE yi hi byela leswaku hi ‘lava Yehova, . . . hi huwelela eka yena.’ (Esaya 55:6) Yehova u tivise Solomoni a ku: “Kungaku loko u ṅwi lav̌isisa [Yehova], u ta ṅwi kuma.” (1 Tikronika 28:9) Wanhwana eFinland u lavisisile ntiyiso ehenhleni ka Yehova naswona u hakeriwe swinene.

U nghene State Church ya Finland kutani a ya eConfirmation School, hi ku tshemba leswaku a a ta kuma ntiyiso malunghana ni Xikwembu. Hambi swi ri tano, u khomiwe hi gome. A va nga yi hlayi ngopfu Bibele exikolweni. Entiyisweni, muprista u n’wi tsundzuxe leswaku a nga yi hlayi, hikuva a yi ta pfilunganya ku ringa-ringana ka mianakanyo yakwe.

Hambi swi ri tano, u sungule ku hlaya Bibele endzhaku ka loko a hetile xikolo. U tlhele a ya ekerekeni, kambe a nga kumanga ku aneriseka kwalaho. Endzhaku u ye eka Kereke ya Pentekosta laha a “ngheneleke ripfumelo.” Va n’wi khongelerile kutani va n’wi byela leswaku manuku se ú kumile ripfumelo. Kambe a nga kalanga a titwa a ri kusuhi na Xikwembu ku tlula hi laha a titweke ha kona eku sunguleni.

U tsalele “Gang and Street Service Center” leswaku va n’wi pfuna, kambe va n’wi nyike nomboro ya riqingho ntsena. Loko a foyinile, riqingho ri hlamuriwe hi Mumethodist loyi a n’wi khongeleleke kutani a n’wi byela leswaku a swi khathariseki leswaku u nghena kereke yihi ntsendze loko a nga tatisi Timbhoni ta Yehova kumbe va-Mormon (valandzeri va Joseph Smith)!

U nghene People’s Mission naswona u nyikiwe swiphephana leswi nge Jehovah’s Witnesses, the Deception of the Time of the End leswaku a swi hahgalasa. Hambi swi ri tano leswi a swi ku anerisanga ku lavisisa ka yena ntiyiso kumbe ku n’wi nyika xikongomelo evuton’wini.

Endzhaku u endzele hahani wakwe loyi a n’wi hlamariseke hi ku n’wi byela leswaku a a pfumela leswaku Timbhoni ti dyondzisa ntiyiso. Hahani wakwe u hlaye matsalwa lama humaka eBibeleni lama kombiseke leswaku a ku ri xikongomelo xa Xikwembu ku endla misava leyi yi va paradeyisi, kutani a n’wi nyika buku leyi nge Ntiyiso Lowu Yisaka eVuton’wini Lebyi Nga Heriki. Nhwanyana loyi u hlaye buku hi xikongomelo xo kuma xihoxo ha yona—leswaku a yi sola—kambe ematshan’wini ya sweswo hi ku hatlisa u xiye leswaku a yi ri na ntiyiso, yi n’wi komba xikongomelo lexi a a ri karhi a lava xona evuton’wini. U tsalele vakandziyisi leswaku va n’wi rhumela tibuku tin’wana ni ku kombela munhu leswaku a n’wi endzela. Endzhakunyana ka masiku mambirhi ntsena, vamakwerhu vambirhi va xisati va maphayona va fikile enyangweni yakwe.

Ku lunghiseleriwe dyondzo ya Bibele naswona nhwanyana loyi u sungule ku va kona eminhlanganweni eHolweni ya Mfumo, laha a hlamarisiweke swinene ni ku khumbiwa hi xiyimo lexinene lexi a xi ri kona kwalaho. U yile emahlweni ni dyondzo yakwe ya Bibele, a khuvuriwa eka lembe leri landzelaka, a sungula ku phayona, kutani a va kona eka Xikolo Xa Ntirho Wa Vuphayona. U te: “Eku heteleleni ndzi tsakile.” Ku lavisisa kakwe ntiyiso ku hakeriwile.

Mintokoto leyi fanaka yi phindha-phindhiwile hi minkarhi ya magidi-gidi ‘emakun’wini ya mafambiselo lawa ya swilo,’ loko Yesu, Murisi Lonene, a hlengeleta ‘tinyimpfu takwe tin’wana’ hi laha ti vhumbiweke ha kona eka Yohane 10:16. (Matewu 24:3) Manuku ke, ku katekile lava lavisisaka ntiyiso wa Bibele ni lava Xikwembu xi va hakelaka.—Matewu 7:7.