Xana Hi Nga ‘Tsakisa Yehova Hi Xitalo’ Hi Ndlela Yihi?
NAMUNTLHA, i vantsongo swonghasi lava khumbekaka hi loko miehleketo ya vona, marito ni swiendlo swi ri leswi tsakisaka eka Xikwembu! Hambi va ri lava vulaka ku khumbeka ko tano ngopfu-ngopfu va vonaka va nyikela Xikwembu ‘ntirho wa nomu ntsena.’ Kahle-kahle, hi vunyingi lebyikulu ku nga vuriwa leswi: “A va tsakisi Xikwembu.”—1 Vatesalonika 2:15.
Van’wana lava tivulaka Vakriste va vona onge ntsendze loko va nga tshovi Milawu ya Khume, va tsakisa Xikwembu. Kambe a swi tano! Xikombiso xa hina Yesu Kriste u te hi Xikwembu: “Masiku hinkwawo ndzi endla leswi swi n’wi tsakisaka.” (Yohane 8:29) Ina, u tsakisile Tata wakwe hi ku endla swilo swin’wana. Xiendlo lexinene xa laveka, hi laha swi nga voniwaka ha kona eka xikhongelo xa muapostola Pawulo mayelana ni vapfumerikulobye eKolosa. U khongele leswaku “va ta hanya vutomi lebyi fanelekaka emahlweni ka [Yehova], [va ta n’wi] tsakisa etimhakeni hinkwato, [va] ta tswala mihandzu hi ku tirha mintirho leyinene ya tinxaka-nxaka”—Vakolosa 1:9, 10.
Kambe, hakunene swa koteka ku ‘tsakisa Yehova hi xitalo?’ Kunene, va nga hetisekanga, Vakriste va nge swi koti ku tsakisa Xikwembu hi laha ku hetisekeke sweswi. Hambi swi ri tano, va nga tirhela etlhelweni rero hi matimba, hi xikongomelo xo xi ‘tsakisa hi xitalo.’ Leswi Pawulo a boxeke “ku tswala mihandzu hi mintirho leyinene ya tinxaka-nxaka, mintirho leyinene ya katseka. Kavula, laha hi nga ka hi nga yi longoloxi hinkwayo mintirho yo tano. Kambe hi nga lunghiselela swakudya swin’wana swa miehleketo. Loko tinhla leti ti komba leswaku ku na tindhawu tin’wana ta vutomi leti eka tona u faneleke u endla mindzulamiso yin’wana, tiyiseka leswaku Yehova u ta katekisa matshalatshala ya wena yo n’wi tsakisa. Mhaka hi leswaku ku ‘tsakisa Yehova hi xitalo’ ku lava leswaku hi hlayisa miehleketo, marito ni swiendlo swa hina.
Ku Vuriwa Yini Hi Miehleketo Ya Hina?
Rito ra Xikwembu ri hi byela leswaku “ku hava ni xivumbiwa ni xin’we lexi tumbeleke. Hinkwaswo swilo dlúú! erivaleni, emahlweni ka Loyi hi fanelaka ku tihlamulela eka yena.” (Vaheveru 4:13) Ku hava vanhu kumbe mademona lama nga hlayaka miehleketo ya hina, kambe Xikwembu xi nga swi kota. Leswi sweswo swi nga tano, hi lava leswaku miehleketo ya hina yi n’wi tsakisa. Kutani hi endla swinene ku tivutisa: Xana ndzi rhandza ku ehleketa hi yini loko ndzi nga laveki leswaku ndzi tirhisa miehleketo ya mina eka ntirho lowu nga evokweni? Kavula, i yinhla yihi, leyi nseve wa khompasi ya mianakanyo ya mina hi ntumbuluko wu kombaka eka yona?
Nakambe hi nga ha vutisa: Xana ndzi rhandza ku endla makungu lama nga tiyangiki ni ku lorha hi ku tsakela rifuwo, ku twala, kumbe ku dzunisiwa hikwalaho ka matshalatshala ya mina? Xana ndzi ehleketa hi ndlela leyi hambaneke, tanihi ku anakanyisisa hi mivilelo, ndzi yi phindha kambe na kambe? Xana ndzi pfumelela miehleketo ya mina yi hambeta yi tshama eka mintsako ya rimbewu? Kumbe minkarhi hinkwayo ndzi tata miehleketo ya mina hi marhengu ni makungu yo endla mali xana?
Sweswi xiya: Xana hi nga ‘tsakisa Yehova hi xitalo’ hi ku tata mianakanyo ya hina hi miehleketo yo tano? Kavula a swi tano! Hi xikhongelo lexi tiyisekaka na hi mpfuno wa Yehova Xikwembu, yi suse hi ku tata mianakanyo ya wena hi miehleketo leyinene, leyi fanelaka, leyi baseke, leyi tengeke ni leyi rhandzekaka. (Vafilipiya 4:8) I swinene swonghasi eka hina ku tshinya miehleketo ya hina leswaku hi ta ehleketa hi swilo leswi fambelanaka ni vugandzeri bya hina eka Yehova! Anakanya hi Mfumo wa Xikwembu, lowu tshineleke swinene. Tsundzuka tinhla leti dyondziweke sweswinyana eRitweni ra Xikwembu. Hlayisisa mhaka leyi ku nga ta vulavuriwa ha yona eminhlanganweni leyi landzelaka ya bandlha, naswona ngopfu-ngopfu swiphemu swin’wana ni swin’wana leswi u nga ha vaka na swona eka nongonoko. Anakanyisisa hi laha u nga antswisaka vutirheli bya wena bya nsimu. Tsundzuka leswaku xo sungula eka hinkwaswo, u mutirheli wa Mukriste.
Van’wana va pfuniwile hi ku phindha matsalwa lama va ma nhlokohateke, kun’we ni ku hamutela tinsimu ta Mfumo. Tanihi xitsundzuxo, mutirheli un’wana wa Vukriste u kume swi pfuna ku tilunghisa ivi a ehleketa hi marito lawa:
“Oho Xikwembu, ndzi pfune leswaku ndzi titsongahata,
Ndzi amukela leswi u swi lavaka ni leswi u swi rhandzaka.
Oho, onge ndzi nga ka ndzi nga pfuki ndzi xandzukile,
Tanihi leswi u endlaka swilo hinkwaswo swinene.”
Ina, hambeta u khongela hi laha Hosi Davhida wa khale a endleke ha kona: “Wa nga amukela . . . ku anakanya ka mbilu ya mina”—sweswo swa ku tsakisa—“wena Yehova.”—Psalma 19:14.
Ku Vuriwa Yini Hi Marito Ya Hina?
Nakambe Davhida u khongerile: “Wa nga amukela marito ya nomu wa mina, ni ku anakanya ka mbilu ya mina, Wena Yehova.” (Psalma 19:14) Hi laha hi dyondzaka ha kona eka Yakobo 3:2-12, i munhu loyi a hetisekeke ntsena la nga lawulaka ririmi ra yena hi laha ku heleleke. Kambe hi fanele ku Iwela ku ri lawula, loko hi ta ‘tsakisa Yehova hi xitalo.’
Kavula, hi vulavula marito yo tala siku na siku, naswona, hi nga ka hi nga rindzeli ku hikela tinhlamuselo ta hina eka timhaka ta Matsalwa. Hambi swi ri tano, ku nga khathariseki leswi hi kumekaka hi vulavula hi swona, hi nga tikarhatela ku tsakisa Yehova. Hi xikombiso, ha swi tiva leswaku ndzhukano, tinhlamba, kumbe ku vulavula loku tlhavaka ni loko biha swi nga ka swi nga n’wi tsakisi Tata wa hina wa le matilweni. Kutani hi fanele ku papalata ku vulavula ko tano.—Vaefesa 5:3, 4.
Kutani nakambe, loko hi ta tsakisa Muendli wa hina hi xitalo mayelana ni ku vulavula ka hina, hi fanele ku va ni vukheta leswaku hi nga vuli swilo leswi rhukanaka, leswi solaka van’wana. Mayelana na hina, swi fanele swi koteka ku: “Ririmi ra yena a ri hembeli munhu, a nga endli warikwav̌o le’ŝo biha, a nga humeseri makwav̌o e šisolo.” Hambi leswi hi nga ha xanisiwaka hi vuhomboloki, hi fanele ku tivonela leswaku hi ‘nga tshuki hi onha van’wana mavito.’—Psalma 15:3; Tito 3:2.
I minkarhi yihi leyi hi nga na yona yo ‘tsakisa Yehova hi xitalo’ malunghana ni mavulavulelo ya hina enkarhini wa swakudya! Hi ntumbuluko, lowu a hi nkarhi wa marito ya vukari kumbe mavulavulelo lama tsanisaka. Ku na swilo swo tala leswinene swo vulavula ha swona! Ngopfu-ngopfu hi fanele ku va ni vukheta eka minkarhi yo tano loko hi ri vapfhumba kumbe hi ri na vaendzi. Hakanyingi la vulavulaka ngopfu ku tlula Vakriste lava vupfeke u fuma bulo. Xana u ta va ni mupfhumba wa Vukriste la nga ni malembe yo tala ya ntokoto evutirhelini bya nkarhi hinkwawo? Xana u tiva Rito ra Xikwembu swinene? Kutani tirhisa vutlhari ku n’wi endla leswaku a vulavula. “Makungu e mbilwini ya munhu i šihlov̌o ša ku enta, Wa ku twisisa o tiv̌a ku ya ka šona,” leswaku ku pfuneka hinkwavo lava nga kona.—Swivuriso 20:5.
Hi ku engetela, ku ‘tsakisa Yehova hi xitalo’ eku vulavuleni ka hina, hi fanele ku phaphamela minkarhi yo nyikela vumbhoni hi xitshuketa hi vito ra Xikwembu ni Mfumo. Entiyisweni, minkarhi yin’wana mutirheli wa Vukriste a nga ha hetisisa swo tala hi ku veka ko tano ka vumbhoni hi xitshuketa. Hambi swi ri tano, ndlela yo sungula yo tsakisa Yehova hi ku vulavula ka hina, loko nakambe hi katekisa van’wana, i ku famba hi yindlu na yindlu ni mahungu ya Mfumo.—Mintirho 20:20.
Leswaku marito ya hina ya ta ‘tsakisa Yehova hi xitalo’ loko hi hlanganyela evutirhelini bya nsimu bya Vukriste, hi fanele ku hambeta hi Iwela ku antswisa ku twarisa ka hina mahungu ya Mfumo. Hi ku va lava byarhisiweke “mahungu lamanene,” hina, ku fana na muapostola Pawulo, hi lava ku ‘vulavula, leswi tsakisaka, hayi vanhu, kambe Xikwembu, lexi kambaka timbilu ta hina.’ Naswona lexi nga fanelangiki ku honisiwa i mfanelo ya ku tirhisa milomu ya hina ku vula ripfumelo ra hina erivaleni eminhlanganweni ya Vukriste, laha hi nga khutazaka van’wana ku va ni rirhandzu ni mintirho leyinene.—1 Vatesalonika 2:4; Vaheveru 10:23-25.
Ku ‘Tsakisa Yehova Hi Xitalo’ Hi Mahanyelo Ya Hina Ni Swiendlo
Eka hina ku ‘tsakisa Yehova hi xitalo,’ hi fanele nakambe hi tivonela hi mahanyelo ya hina ya siku na siku, ku katsa ni ku tirivatisa ka hina. Ina, hambi loko hi lava ku titsakisa, hi nga ka hi nga swi koti ku rivala Xikwembu. Xana sweswo swi tikomba ku ri ku hundzeleta? Nikantsongo, hikuva Pawulo u te: “Hambi ma dya, hambi ma nwa, hambi mi endla yini na yini, endlani hinkwaswo ku dzunisa Xikwembu.” Hi fanele ku tsundzuka xitsundzuxo xa leswaku lava “fumiwaka hi ntumbuluko wa vona, va nga ka va nga tsakisi Xikwembu.” Kutani, ehenhla ka hinkwaswo, ku tirivatisa ka hina ku fanele ku va lokunene.—1 Vakorinto 10:31; Varhoma 8:8.
Naswona a hi fanelanga ku honisa timhaka ta ku ringanisela ni ta nkarhi. Leswaku hi ‘tsakisa Yehova hi xitalo,’ hi fanele ku hlayisa ku titsakisa endhawini ya kona, tanihi nchumu wa xiwelo naswona wu nga ri wa nkoka lowukulu. A hi fanelanga ku phikelela ku tirivatisa, ku nga va ku hlalela nongonoko lowu hlawulekeke wa TV kumbe ku ya eka xiendlakalo xa mintlangu, ku fikela laha swi kavanyetaka ku va kona ka hina eminhlanganweni ya Vukriste kumbe ku hlanganyela hi minkarhi evutirhelini bya nsimu.—Matewu 6:33.
Ku ‘tsakisa Yehova hi xitalo’ nakambe ku katsa ku endla leswinene eka vamakwerhu va Vukriste, loko hi kuma nkarhi ni loko ku ri na xilaveko. Mayelana ni leswi, ha hlaya: “Mi nga rivali ku endla leswinene ni ku pambulela van’wana leswi mi nga na swona, hikuva magandzelo lawa hi wona lama tsakisaka Xikwembu.” Muapostola Pawulo u vule leswaku vunene lebyi Vakriste va le Filipiya va byi kombiseke eka yena a ku ri “gandzelo leri amukelekaka eka Xikwembu ni ku tsakisa.”—Vaheveru 13:16; Vafilipiya 4:18.
Xana vana va nga ‘tsakisa Yehova hi xitalo’ hi ndlela yihi mayelana ni mahanyelo ya vona? Pawulo u komba leswaku ndlela leyikulu swinene i ku yingisa vatswari va vona “hikuva hi swona leswi lulameke emahlweni ka Hosi.” Nakambe u ri: “Vana, yingisani vatswari va n’wina etimhakeni hinkwato, hikuva exikarhi ka Vakriste, hi swona leswi tsakisaka.”—Vaefesa 6:1-3; Vakolosa 3:20.
Malandza hinkwawo lama tinyiketeleke ya Xikwembu ya tokote vunene byo tano eka Yehova ni le ka xihlovo xa la misaveni, leswaku hi rirhandzu ni ku tlangela, minkarhi hinkwayo ya khathalela ku xi tsakisa hi xitalo. Hakunene, ku tlangela ka rirhandzu ku lava leswaku hi nga ‘amukeli tintswalo ta Xikwembu, kutani hi lahlekeriwa hi xikongomelo xa tona.’ (2 Vakorinto 6:1) Ku khathalela ku tsakisa Yehova hi xitalo nakambe hi wona nchumu lowunene, wo wu endla, tanihi leswi a nga Mufumi wa Misava Hinkwayo. Ku tlula kwalaho, ku lava ku ‘tsakisa Yehova hi xitalo’ i ndlela ya vutlhari, hikuva ku endla tano swa pfuna eka hina sweswi naswona swi hi khomele xitshembiso xa vutomi lebyi taka.—1 Timotiya 4:8.
Ina, hi lava ku hlayisa miehleketo ya hina, marito ya hina, ni mahanyelo ni swiendlo swa hina. Hi mpfuno wa Yehova, leswi hi ta swi endla leswaku hi n’wi tsakisa hi xitalo. Kutani eku endleni tano, hi nga tshikeni. Ku ri na sweswo, onge minkarhi hinkwayo hi nga hlayisa ndzayo ya muapostola Pawulo leyi yaka eka Vakriste eTesalonika: “Sweswi ke, vamakwerhu, mi dyondzile eka hina hi laha mi fanelaka ku hanya ha kona, leswaku mi tsakisa Xikwembu, kutani mi hanyile hi mukhuva wolowo. Hikokwalaho, ha mi kombela hi matimba ni ku mi khongotela hi vito ra Hosi Yesu, leswaku mi ya mi kula, mi ri karhi mi hanyisa sweswo.”—1 Vatesalonika 4:1.
[Xifaniso eka tluka 23]
U nga pfumeleli ku tirivatisa ku kavanyeta ntirho wa Vukriste