Xiviko Xa Vahuweleri Va Mfumo

Ku Tiyisela eNtirhweni Wa Vona Eka Xikwembu

TIMBHONI TA YEHOVA ti teka ntirho wa tona eka Xikwembu wo chumayela mahungu lamanene ya Mfumo wa Xikwembu hi matimba. (1 Vakorinto 9:16; Mintirho 20:26, 27) Mpatswa wa le Furwa wu twe nsusumeto wa ntirho lowu wo fikelela un’wana ni un’wana hi mahungu lamanene. Ensin’wini ya ka vona a ku ri na hositele leyi a yi hlayisa vabaleki va tipolitiki ni vatirhi lavantsongo va valuveri. Mpatswa wa hlamusela: “Hi vilerile leswaku hi nga nghenisa ku yini endzeni handle ka loko hi rhambiwe hi un’wana la tshamaka kwalaho. Kutani hi kunguhate ku vonana ni vanhu lava nga ehandle ntsena ivi hi ku olova hi kuma xirhambo xo va vhakela endzeni. Jaha ri amukele timagazini hi ku hiseka ivi ri kombela ku vhakeriwa.

“Hi endzerile jaha leri, naswona dyondzo yi sunguriwile hi ku anghwetla. Nkarhi na nkarhi nakulobye wa rona a a va kona, kambe nakulobye loyi a a nga vuli nchumu. Loko, eku heteleleni ka dyondzo ya vumbirhi, hi vutisile loko na yena a nga tsakela ku dyondza swo tala hi ta Rito ra Xikwembu, u hlamurile: ‘Ha yini swi nga ri tano?’ Xisweswo dyondzo ya vumbirhi yi sunguriwile. Hi va rhambele eminhlanganweni ku sukela eku sunguleni, naswona a va si tshama va nga vi kona ku sukela kwalaho. Nhluvuko wa vona a wu vonaka swinene, ngopfu-ngopfu ehositele, laha va sunguleke ku vulavula hi swilo leswi a va swi dyondza hi ku hatlisa, leswi vangeke leswaku dyondzo ya vunharhu yi sunguriwa ni mpatswa. Siku rin’wana ntlawa hinkwawo a wu ri enyangweni yo nghena, wu tiyimisele ku ya enhlanganweni, loko munghana un’wana na yena a kunguhata ku ya na vona. A a hiseka swinene naswona u lave leswaku nakulobye wakwe wa jaha a dyondza hinkwaswo hi ta wona. Hinkwavo va sungule ku dyondza.

“Ku fikela kwalaho ntlhanu wa tidyondzo a ti fambisiwa. Yin’wana ni yin’wana a yi fana ni nhlangano! Un’wana ni un’wana a a va kona eka dyondzo ya un’wana, kutani vanhu lavantshwa va joyinile na vona. Hinkwavo a va vulavula hi ta ntiyiso, kutani hikwalaho ka sweswo, dyondzo ya vutsevu yi sunguriwile ni wanuna un’wana, loyi na yena a sunguleke ku va kona eminhlanganweni ivi a veka vumbhoni eka nakulobye wakwe wa wanhwana.

“Kavula, leswi hinkwaswo a ku ri vumbhoni lebyi hlamarisaka ehositele. A swi nga olovi eka vanhu lava vantshwa ku ambala vumunhu lebyintshwa. A va fanele ku hlula ku dzaha, xihoko, vukarhi, mahanyelo layo biha ni vanghana vo biha. Sathana u endle leswaku khale ka vanghana va vona va ringeta ku sivela nhluvuko wa vona, va va kucetela ku dzaha kumbe ku va ni mintlangu ya pongo. Un’wana wa vavanuna lava tsakelaka a a vute wanhwana wa mungoma. U ringete ku n’wi susa entiyisweni. Hambi swi ri tano, eku heteleleni u sungule ku dyondza naswona ku sukela kwalaho u endle nhluvuko lowunene.

“Hi ku ya hi mahungu ya sweswinyana,” ku vika mpatswa, “un’wana wa majaha u ye ekhotsweni hikwalaho ka xiyimo xakwe eka vukala-tlhelo. Ehansi ka lembe, van’wana va tsevu va khuvuriwile, lava ntlhanu wa vona hi ku anghwetla va ngheneleke ntirho wa vuphayona bya nkarhinyana. Eka ntlawa hinkwawo, sweswi tsevu i maphayona ya nkarhi hinkwawo, lava pakani ya vona ku nga ntirho wa vuphayona byo hlawuleka.”

Mpatswa lowu wu hakeriwe hi laha ku fuweke swonghasi hi ku tiyisela ka wona eku hetisiseni ka ntirho wa vona eka Xikwembu wo lava vanhu lava fanaka ni tinyimpfu! Hakunene Yehova u katekise matshalatshala ya vona lama tshembekaka. Hambi leswi hi nga ha pfumalaka mintokoto yo tano leyi xiyekaka, minkarhi hinkwayo hi lava ku hetisisa ntirho wa Xikwembu xa hina wo chumayela mahungu lamanene ya Mfumo hi ku tshembeka.—Matewu 24:14.

[Xifaniso lexi nga eka tluka 21]

Mpatswa wa le Furwa kun’we ni tsevu wa maphayona ya nkarhi hinkwawo