Xiviko Xa Vahuweleri Va Mfumo
‘Xiviko Lexinene Xo Huma eMatikweni Ya Le Kule’
◻ ETIKWENI ra ayisi ra Greenland vahuweleri van’wana eka pfhumba ro chumayela va hlangane na muntshwa wa le Norway loyi a amukeleke buku leyi nge Life—How Did It Get Here? By Evolution or by Creation? Hambi swi ri tano, a nga kombisanga ku tsakela lokukulu. Eriendzweni ra vona leri landzeleke eka ndhawu leyi ya le kule, u va byele leswaku u hlaye buku minkarhi yo tala naswona a a lava tibuku leti engetelekeke. U siyeriwe tibuku ni tibroxara to hlanyana. A khome hi gome ku twa leswaku vahuweleri a va nga ha ta tlhelela ku kondza ku hela nkarhi wo ringana lembe kambe u kume adirese ya Timbhoni. Lexi va hlamariseke, endzhaku ka n’hweti, u gongondzile erivantini ra vona. U hlamusele leswaku u wele eayisini hi xithuthuthu xa yena xa gamboko erindzweni ra yena ro ya ebyatsweni bya yena, kutani swi n’wi tekele tiawara ta tsevu ku tluta a ya kuma Timbhoni. U lave ku kuma tibuku to tala ni ku kanela hi ntiyiso. U ve kona enhlanganweni madyambu wolawo naswona u endle makungu yo va kona kan’we hi n’hweti. U tile eka riendzo ra mulanguteri wa xifundza naswona u khutazeke ngopfu. U humile ekerekeni naswona sweswi u chumayela mahungu lamanene endhawini ya ka vona. Loko ayisi hi xixika yi n’wi sivela ku ya emihlanganweni hi byatso, u tirhisa xihaha-mpfhuka-phatsa, lexi n’wi tekelaka R390.
I vangani va hina lava tikarhateke hi ndlela leyi leswaku va ta endla nhluvuko evutirhelini bya hina?
◻ Vanhu vo tala va amukela mahungu lamanene eMadagascar. Laha ku nga na vahuweleri va Mfumo vo tlula 3 200 ntsena, 16 205 va ve kona eka Xitsundzuxo xa rifu ra Kriste. Vamakwerhu va le ku endleni ka matshaltshala lamakulu yo fikelela vanhu hinkwavo lava va nga exihlaleni.
Hi xikombiso, 17 eka vahuweleri va 30 va le Bandlheni ra Isaonjo va kunguhate ku ya nyikela vumbhoni eka nsimu leyi yi nga kule hi 50 wa tikhilomitara. Va suke eximutanini xa ka vona hafu ya awara endzhaku ka xikarhi ka vusiku. Ku ringana tiawara timbirhi va fambe etindleleni ta mawa yo voyama ni le ndzhopeni. Kutani va nghene exihlahleni xa tiropiki hi 2:30 a.m. Hikuva munyama wu funengete xihlahla, vamakwerhu van’wana va wele emaweni. Van’wana va wele endzeni ka madamu ya mati emaribyeni lama celekeke. Xihlahla a xi ri ni tinxaka tin’wana ta tixikwa, naswona switsotswana swo tala a swi va luma. Vamakweru vo tala va xisati va xanisekile erindzweni leri. Ndzhope a wu ente ku fika etsolweni minkarhi yin’wana. Hinkwavo vahuweleri va 17 va vavisekile hi ndlela yo karhi, kambe eku heteleleni va humile exihlahleni hi 6:30 a.m!
Ntirho wa nsimu wu sungule hi 6:45 a.m. Vanhu vo tala va amukele vahuweleri hi tintswalo. Loyi eku sunguleni a kalaka a nga va amukelanga a ku ri nsati wa murhangeri wa vukhongeri bya Protestente. U te: “Ndzi na vukhongeri bya mina; ndzi anerisekile. Ndzi tiva hinkwaswo leswi Bibele yi swi vulaka.” Loko muhuweleri a humesa magazini wa Xihondzo xo Rindza, wansati hi ku tinyungubyisa u wu arile, a ku: “Ana se ndzi na swilo swin’wana swo tala swo swi hlaya.” Kambe u sungule ku vutisa swivutiso a ku: “Hi n’wina vamani, nakambe mi huma kwihi, naswona i mani la mi rhumeke?” Endzhaku ka loko va hlamule hi ku titsongahata ni ku hlamusela hi ku komisa matshalatshala hinkwawo lawa va ma endleke yo fikelela ximutana xa ka vona, wansati u amukele Xihondzo xo Rindza, a ku: “Ndzi ta xi xava. I mani la tivaka loko mi rhumele hi Xikwembu?”
Hi 1:30 p.m., lava 17 va tshike nsimu va tlhelela ekaya, va fambe riendzo ra le hansi ka tiawara ta mune hikuva a wa ha ri nhlikanhi. A va karhele kambe va hlayisekile, naswona swikandza swa vona swi komba ntsako. Va te: “A ku ri siku leri ri nga rivalekiki eka hina va 17 va le Bandlheni ra le Isaonjo.”
Entiyisweni, moya wa Yehova wu susumetela malandza ya yena lawa ma tinyiketeleke ku chumayela mahungu lamanene ya Mfumo “ku ya fika emakun’wini ya misava,” naswona vo tala va amukela matshalatshala lamanene ya Timbhoni.—Mintirho 1:8.
[Xifaniso lexi nga eka tluka 30]
Umanak harbor, Greenland