Xiviko Xa Vahuweleri Va Mfumo
“Tinyimpfu Ti Twa Rito Ra Yena”
◻ YESU u te: “Tinyimpfu ti twa rito ra [murisi]; ú vitana tinyimpfu leti nga ta yena hi mavito ya tona, a ti humesela handle.” (Yohane 10:3) U engeterile: “Ndzi tiva [tinyimpfu] ta mina, ni [tinyimpfu] ta mina ta ndzi tiva.” (Yohane 10:14) Vanhu lava fanaka ni tinyimpfu va yingisela rito ra Yesu loko a vulavula na vona hi ku tirhisa Bibele. Xiya ndlela leyi vanhu vambirhi va timbilu letinene eItaly va landzeleke ntila lowu ha yona.
Eku Heteleleni U Yingiserile
◻ Alberto wa tsala: “A ndzi ri na malembe ya 16 loko ndzi sungula ku dzaha mbangi ni ku tirhisa LSD, naswona emalembeni ya 18 ndzi sungule ku tirhisa heroin. Leswaku ndzi kuma swidzidzirisi leswi, ndzi endle xin’wana ni xin’wana lexi nga anakanyiwaka. A ndzi yiva, ndzi xavisa swidzidzirisi, ndzi kuma mali hi ku xisa, ndzi xavisa nhundzu ya mina hinkwayo. A ndzi nga swi koti ku tshika. Masiku yo wisa ekule ni le kaya, minkarhi yo leha etindhawini ta le makaya, kumbe ku nghenela mintlawa leyi hisekaka ya politiki leyi voyameleke eku lwisaneni ni vuhomboloki—a ku na nchumu xa leswi lexi pfuneke. Ndzi ringete vukati, kambe endzhaku ka xinkarhana ndzi tlhelele laha ndzi sunguleke kona. Ku velekiwa ka n’wana wa nhwanyana na kona a ku ndzi tshikisanga ku tirhisa swidzidzirisi. Entiyisweni, swilo swi ye swi nyanya, tanihi leswi sweswi a ndzi lava mali yo tala. Kutani nsati wa mina u ndzi tshikile, naswona emalembeni mambirhi ya ku tshama ndzi ri ndzexe, ndzi vone n’wana wa mina kambirhi ntsena. A ndzi balekela vaxavisi va swidzidzirisi lava a ndzi va kolota mali, naswona minkarhi yo tala ndzi tokote swikombiso swa ku lava ku tihambanisa.
“Kutani ndzi tsundzuke buku leyi Timbhoni ta Yehova ti ndzi nyikele yona malembe emahlweninyana. A ndza ha ri na yona naswona ndzi sungule ku yi hlaya kun’we ni Bibele. Hi ndlela leyi ndzi kote ku tiva Xikwembu xa ntiyiso, Yehova, kutani ndzi khongele eka yena leswaku a ndzi pfuna. Loko hakantsongo-ntsongo ndzi tirhisa swilo leswi a ndzi swi dyondza, swikombiso swa mina swo tihambanisa ni vanhu a swi nga ha karhati ngopfu. Ndzi kume ntirho, naswona hi ku pfuniwa hi Yehova ndzi hlanganise ndyangu wa mina kun’we. Ndzi ye eHolweni ya Mfumo, naswona kwalaho ndzi xiye leswaku Timbhoni ta Yehova ti na ntiyiso. Loko hi hlanganile nakambe, mina ni nsati wa mina hi dyondze Bibele ni Timbhoni naswona eku heteleleni hi khuvuriwile. Sweswi, mawaku ntsako wonghasi lowu ku nga wona ku avelana ntshembo wa hina ni van’wana tanihi maphayona ya nkarhi hinkwawo!”
Xikhongelo Xa Wansati La Tinyiketeleke Xi Hlamuriwa
◻ Wansati un’wana wa vika: “Hi 1958, a ndzi hisekela ngopfu mintirho ya vukhongeri, ngopfu-ngopfu eka maendzo yo ya eXikwetsimisweni xa Madonna xa Rirhandzu ra le Henhla eRhoma. Hi ku famba ka nkarhi ndzi ve munghana lonkulu wa murhangeri loyi a a ri mufundhisi wa Rhoma, naswona ndzi ve ni ku burisana ko tala ka le xihundleni na Mupapa Paul VI na John Paul II. Endzhaku ka malembe ya 25 ya ku lunghiselela maendzo, ndzi amukele diploma ya ku faneleka. Hambi swi ri tano, hi ku famba ka nkarhi ripfumelo ra mina tanihi Mukhatoliki la hisekaka ri sungule ku tsekatseka. Ndzi xiye vukhamba, ku kuma mali hi vuxisi, xin’wana-manana ni ku xaviselana loku hlamarisaka. Ndzi sungule ku vona kereke hi mahlo lama hambaneke tanihi leswi a ndzi swi xiya leswaku nawu wa Xikwembu hakanyingi a a wu kandziyeriwa hi milenge. Swilo swo tano swi ndzi kavanyetile, naswona ndzi kombele Xikwembu leswaku xi ndzi pfuna hikuva a ndzi lahlekeriwa hi ripfumelo ra mina. Hakanyingi a ndzi rila.
“Kutani ke, malembe ya mune lama hundzeke, n’wana wa mina u ndzi tisele tikopinyana ta Xihondzo xo Rindza ni Awake! leti a ti kumeke eka Timbhoni ta Yehova. Timagazini a ti tsakisa swinene lerova ndzi n’wi kombela leswaku a ndzi kumela tin’wana. Hi ku hatlisa endzhaku ka sweswo ndzi kume Holo ya Mfumo ya Timbhoni ta Yehova ivi ndzi veka xiphephana enyangweni ndzi kombela leswaku un’wana a ndzi endzela. Timbhoni ti tile tiawara ta mune endzhakunyana. Ndzi sungule dyondzo ya Bibele ivi ndzi endla nhluvuko ku fika eyinhleni yo khuvuriwa. Sweswi ndza tiyiseka leswaku eku heteleleni ndzi kume leswi a ndzi swi lava nkarhi hinkwawo—ntiyiso!”
Vanhu lava va yingisele rito ra Murisi Lonene, Yesu Kriste, kutani ‘ntiyiso wu va ntshunxa.’—Yohane 8:32.
[Laha Xifaniso Xi Humaka Kona eka tluka 14]
Garo Nalbandian