Swivutiso Swa Vahlayi

◼ Xana i xitsundzuxo xihi xa xisekelo lexi Swivuriso 27:23 yi xi nyikelaka eka varisi va moya swin’we ni le ka Vakriste hinkwavo?

Ndzimana yi hlayekisa xileswi: “Tiv̌isisa ŝinene tinyimpfu ta wena ha yiṅwe, u hlayisa ŝinene mitlhambi ya wena.” (Swivuriso 27:23) Tsalwa leri hakanyingi ri tirhiseriwe ku khutaza varisi va moya ku kombisa ku tsakela ni ku tolovelana ni swiyimo ni swiphiqo swa Vakriste ebandlheni. Xikhutazo xo tano xi fanerile, tanihi leswi Bibele yi fanisaka vakulu tanihi varisi, ni bandlha tanihi ntlhambi wa tinyimpfu. (Mintirho 20:28, 29; 1 Petro 5:2-4) Kambe, hambi leswi nsinya lowu nga la henhla wu tirhaka, entiyisweni ndzimana leyi a yi vulavuli hi varisi va moya.

Buku ya Swivuriso yi ni tindzimana to tala leti yimaka ti ri toxe tanihi tinhlamuselo ta switsundzuxo leswi baka nhloko ya mhaka, kambe Swivuriso 27:23 i xiyenge xa ntlawa wa tindzimana: “Tiv̌isisa ŝinene tinyimpfu ta wena ha yiṅwe, u hlayisa ŝinene mitlhambi ya wena. Hikuv̌a nḍalo a hi ya malembe hikwawo, ni hari ya v̌uhosi a yi ṭhami hi masiku. Byanyi bya susiwa, rihlaza ra humelela ku lav̌iwa byanyi e tinṭhav̌eni. Ŝinyimpfana ŝi ta v̌a ŝa tinguv̌u ta wena, ŝiphongo ŝi ta šav̌a nsimu; nṭwamba wa timbuti ŝi ta v̌a ŝakudya ŝa wena ni ŝa yindlu ya wena, ni ŝa malanḍa ya wena ya šisati.”—Swivuriso 27:23-27.

Mhaka leyi yi huhuteriweke yi bumabumela ku va ni hanyelo leri funghiweke hi ku rhandza mintirho, ku gingiriteka, ku olova ni ku xiya ku titshega ka hina hi Yehova. Yi bumabumela leswi hi ku kombisa vutomi bya le makaya bya murisi wa Muisrayele, kumbexana ku hambana ni vutomi bya manyunyu lebyi sekeriweke emintirhweni ya bindzu ni ku fuma hi xihatla.

“Nḍalo,” kumbe rifuwo leri kumiweke ebindzwini leri vuyerisaka swinene, ndhuma (“hari”) leyi vaka kona, ri nga nyamalala hi ku olova, hi laha vo tala va nga tiyisaka ha kona. Xisweswo ku na swo tala leswi nga vuriwaka hi vutomi byo olova, byo tanihi lebyi hanyiweke hi varisi va khale eku khathaleleni ka swifuwo. Ndlela yoleyo ya vutomi a a yi nga olovi emhakeni ya ku va la nga khathaliki. Murisi a a fanele ku nyikela nyingiso eka ntlhambi wa yena, a tiyiseka leswaku tinyimpfu a a ti hlayisekile. (Psalma 23:4) Loko, eku nyikeleni ka nyingiso eka tona, a kuma nyimpfu leyi vabyaka kumbe leyi vavisekeke, a a ta yi tota hi mafurha yo miyetaka xivavi. (Psalma 23:5; Ezekiel 34:4; Zakariya 11:16) Eka swiyimo swo tala murisi la rhandzaka mintirho loyi a vekaka mbilu ya yena eka ntlhambi wa yena u ta vona matshalatshala ya yena ma humesa vuyelo—ntlhambi wa yena a wu ta andza hikantsongo-ntsongo.

Murisi la tirhaka hi matimba ni wa vukheta a a ri ni xihlovo lexi a nga titshegaka ha xona xa mpfuno—Yehova. Ha yini swi ri tano? Xikwembu xi nyikela tinguva ni mindzhendzeleko leyi hi ntolovelo yi hetelelaka hi byanyi lebyi ringaneleke lebyi nga xurhisaka ntlhambi. (Psalma 145:16) Loko, hi ku cinca ka tinguva, byanyi bya rihlaza byi hela etindhawini ta le hansi, byi nga tala etindhawini ta le henhla, laha murisi la nyikelaka nyingiso a nga byiselaka swifuwo swa yena kona.

Swivuriso 27:26, 27 yi boxa vuyelo byin’wana bya ntirho wo tano—swakudya ni swiambalo. Nhlamuselo leyi nyikeriweke a hi ya swakudya swa manyunyu kumbe swa mutshila wa vusweki, kumbe ku nyikela mutirhi xivangelo xo rindzela swiambalo swa rhungelo ra sweswinyana leswi endliweke hi muendli wa ndhuma kumbe swa lapi ro durha. Kambe loko a tiyimiserile ku endla matshalatshala lama engetelekeke, murisi ni ndyangu wa yena a a va ta kuma ntswamba (kutani xisweswo chizi), xikan’we ni voya byo luka swiambalo leswi tiyeke entlhambini.

Kutani xitsundzuxo lexi nge: “Tiv̌isisa ŝinene tinyimpfu ta wena ha yiṅwe” a hi lexi ngopfu-ngopfu xi nga xa valanguteri va moya; i xa Vakriste hinkwavo. Xi kandziyisa nkoka wa ku va lava anerisiwaka hi nseketelo ni nsirhelelo lowu hi wu kumaka hi ntirho wo tshembeka, wa migingiriko, hi ku tshemba leswaku Xikwembu a ri nge hi fularheli. (Psalma 37:25; 2 Vatesalonika 3:8, 12; Vaheveru 13:5) Loko hi ringanisa Swivuriso 27:23-27 ni xitsundzuxo lexi nga eka Luka 12:15-21 na 1 Timotiya 6:6-11, hi vona hi laha xitsundzuxo xa Xikwembu xi nga hundzukiki ha kona emhakeni leyi. Kutani un’wana ni un’wana wa hina a nga ha hlaya nakambe Swivuriso 27:23-27, hi tivutisa, ‘Xana leswi ndza swi nghenisa embilwini kutani ndzi swi tirhisa evuton’wini bya mina bya siku na siku?’

[Laha Xifaniso Xi Humaka Kona eka tluka 30]

Pictorial Archive (Near Eastern History) Est.