Ndzhaka Leyi Nga Tolovelekangiki Ya Vukreste

HI KU VULA KA BLOSSOM BRANDT

A ku wa gamboko le San Antonio, eTexas, hi January 17, 1923, ku nga siku leri ndzi tswariweke ha rona. Ehandle a ku titimela swinene, kambe a ndzi vukarhiwe hi mavoko lama kufumelaka ya vatswari va Vakreste lava nga ni rirhandzu, ku nga Judge na Helen Norris. Ndza ha swi tsundzuka leswaku xin’wana ni xin’wana lexi vatswari va mina a va xi endla a va xi endla hi ku pfumelelana ni ndlela leyi va gandzelaka Yehovha Xikwembu ha yona.

HI 1910, loko Manana a ri na malembe ya nhungu, vatswari vakwe va rhurhele epurasini leri nga ehandle ka Alvin, eTexas, va suka le Pittsburgh, ePennsylvania laha ku nga kusuhi na kona. Loko va ri kwalaho va tsakele ku dyondzisiwa mintiyiso ya Bibele hi muakelani wa vona. Ku sukela kwalaho, Manana u hete vutomi bya yena hinkwabyo, a lwela ku endla leswaku vanhu va tsakela ntshembo wa Mfumo. U khuvuriwile hi 1912, endzhaku ka loko ndyangu wu rhurhele eHouston, eTexas.

Manana ni vatswari vakwe va tivane ro sungula na Charles T. Russell, muungameri wo sungula wa Watch Tower Bible and Tract Society, loko a endzela vandlha ra vona le Houston. Ndyangu wa ka hina hi ntolovelo a wu amukela vayimeri lava famba-fambaka va Sosayiti, lava hi nkarhi wolowo a va vitaniwa tiphiligirimu. Malembe ma nga ri mangani endzhakunyana, Manana u rhurhele eChicago, le Illinois ni vatswari vakwe, kasi Makwerhu Russell a a ta tlhela a endzela vandlha ra kwalaho.

Hi 1918, Kokwana wa xisati u khomiwe hi chachalaza ya le Spain, kutani leswi a yi n’wi karhata swinene, madokodela ma khutaze leswaku a ya tshama endhawini leyi kufumelaka. Tanihi leswi Kokwana wa xinuna a a tirha eka khamphani ya switimela ya ka Pullman, hi 1919 u byeriwe leswaku a tlhelela eTexas a ya tirhela kona. Loko va ha ri kwalaho, Manana u tivane na jaha leri gingiritekaka leri a ri hlanganyela ni vandlha ra le San Antonio, leri vito ra rona a ku ri Judge Norris. Xikan’we-kan’we va sungule ku tsakelana, kutani endzhakunyana va tekana, ivi Judge a va tata wa mina.

Tatana A Dyondza Ntiyiso Wa Bibele

Judge (muavanyisi) u nyikiwe vito rakwe leri nga tolovelekangiki loko a tswariwa. Loko tata wakwe a n’wi vona ro sungula, u te: “Nghohe ya n’wana loyi yi languteka tanihi ya muavanyisi,” hi loko a va a thyiwe vito rero. Hi 1917, loko Tatana a ri na malembe ya 16, u nyikiwe xiphephana lexi nge Where Are the Dead? ni lexi nge What Is the Soul? leswi kandziyisiweke hi Watch Tower Bible and Tract Society. Se a ku hundze malembe mambirhi Kokwana wa xinuna la tswaleke tatana a file, kutani swiphephana leswi swi n’wi hlamule swivutiso leswi a a ri karhi a lava tinhlamulo ta swona malunghana ni xiyimo xa vafi. Endzhakunyana u sungule ku va kona eminhlanganweni ya Swichudeni swa Bibele, hi laha Timbhoni ta Yehovha a ti tiviwa ha kona enkarhini wolowo.

Hi xihatla Tatana u lave ku hlanganyela emintirhweni ya vandlha. U averiwe ndhawu leyi a a ta chumayela eka yona, kutani endzhaku ka xikolo a a ya kona hi xikanyakanya, a ya hangalasa swiphephana. U tinyiketele swinene eku hangalaseni ka ntshembo wa Mfumo, ivi hi March 24, 1918, a kombisa ku tinyiketela ka yena eka Yehovha hi ku khuvuriwa ematini.

Lembe leri tlhandlameke loko Manana a rhurhela eSan Antonio, Tatana u hatlise a kokiwa mahlo hi leswi a nga swi vula “ku n’wayitela loku tsakisaka ni mahlo ya wasi ku tlurisa” lama a nga si vona yo fana na wona. Endzhakunyana va vule leswaku va lava ku tekana, kambe swi va nonon’hwerile swinene ku khorwisa vatswari va Manana. Kambe va swi kotile ku cata hi April 15, 1921. Pakani ya vona havambirhi a ku ri vutirheli bya nkarhi hinkwawo.

Ku Sungula Ka Vutirheli

Loko Manana na Tatana va ha khomekile hi ku lunghiselela ku ya entsombanweni wa le Cedar Point, Ohio, hi 1922, va kume leswaku Manana u tikile. Endzhakunyana ka ku tswariwa ka mina, Tatana u vekiwe ku va mufambisi wa ntirho wa vandlha, a ha ri ni malembe ya 22 ntsena. Xiavelo lexi a xi lava leswaku a endla malunghiselelo ya ntirho hinkwawo wa nsimu. Ku nga si hela mavhiki mangani ndzi tswariwile, Manana u sungule ku famba na mina evutirhelini bya yindlu na yindlu. Entiyisweni, vakokwana na vona a va lava ku famba na mina ensin’wini.

Loko ndza ha ri ni malembe mambirhi ntsena, vatswari va mina va rhurhele le Dallas, eTexas, ivi va sungula vutirheli bya nkarhi hinkwawo tanihi maphayona endzhaku ka malembe manharhu. Ni vusiku a va etlela eximbhedwanini etlhelo ka pato, mina va ndzi etlerisa exitshan’weni xa le ndzhaku xa movha. Entiyisweni leswi a swi ndzi tsakisa, kambe endzhakunyana swi tikombile leswaku a va nga si tiyimisela ku phayona vutomi bya vona hinkwabyo enkarhini wolowo. Kutani Tatana u sungule bindzu. Endzhaku u ake xiyindlwana lexi kokiwaka leswaku a tlhela a sungula ku phayona.

Manana u ndzi dyondzise ku hlaya ni ku tsala ndzi nga si sungula xikolo, naswona a ndzi swi tiva ku andzisa tinhlayo ku sukela eka n’we ku ya fika eka mune. Minkarhi hinkwayo a a tikarhatela ku ndzi pfuna ku dyondza. A a ndzi yimisa ehenhla ka xitulu etlhelo ka yena, ndzi sula tindyelo leti a ti hlantsweke, naswona a a ndzi dyondzisa ku tiva matsalwa hi nhloko ni ku yimbelela tinsimu ta Mfumo, kumbe ti-hymn, hi laha a ti vitaniwa ha kona enkarhini wolowo.

Mina Ni Vatswari Va Mina Hi Tirhela Xikwembu

Hi 1931, hinkwerhu ka hina hi ve kona eka ntsombano lowu nyanyulaka le Columbus, eOhio, laha hi kumeke kona vito leri nge Timbhoni ta Yehovha. Hambi leswi a ndzi ri ni malembe ya nhungu ntsena, ndzi kume ku ri vito lerinene ku tlula hinkwawo lawa ndzi tshameke ndzi ya twa. Endzhakunyana, loko hi vuyile ekaya, bindzu ra Tatana ri tshwe ri hela, Tatana na Manana va vule leswaku i “ku rhandza ka Hosi,” leswaku va ta tlhela va sungula ku phayona. Kutani ku sukela hi ximumu xa 1932, hi tiphinile hi vutirheli bya nkarhi hinkwawo hi malembe yo tala.

Vatswari va mina a va phayona eTexas xikarhi leswaku va ta tshama ekusuhi ni vatswari va Manana, lava a va ha ri eSan Antonio. Ku rhurha endhawini leyi va averiweke eka yona va ya eka yin’wana swi endle leswaku ndzi tshamela ku cinca swikolo. Minkarhi yin’wana vamakwerhu lava nga vupfangiki a va ku, “Ha yini mi nga tshami ndhawu yin’we, mi va ni kaya ra n’wana yoloye,” onge hi loko ndzi nga khathaleriwi kahle. Kambe mina a ndzi vona vutomi bya hina byi tsakisa swinene, ni leswaku a ndzi pfuna Tatana na Manana evutirhelini bya vona. Kahle-kahle, a ndzi leteriwa ni ku hlomiseriwa leswi endzhaku swi veke xiphemu xa vutomi bya mina.

Ku hundze tin’hweti ndzi tshamela ku byela Tatana na Manana leswaku ndzi lava ku khuvuriwa, naswona a va tshamela ku vulavula na mina ha swona. A va lava ku tiyiseka loko ndzi swi tiva leswaku xiboho xa mina i xa nkoka ku fikela kwihi. Hi December 31, 1934, ku fike siku ra xiendlakalo lexi xi nga rivalekiki evuton’wini bya mina. Hambi swi ri tano, hi madyambu ya le mahlweni ka ku khuvuriwa ka mina, Tatana u tiyisekise leswaku ndzi vekiwa emahlweni ka Yehovha hi xikhongelo. Kutani u endle nchumu wo tsakisa swinene. U kombele leswaku hinkwerhu ka hina hi nkhinsama, kutani a sungula ku khongela. U byele Yehovha leswaku u tsake ngopfu hi xiboho xa xin’hwanyetana xa yena, xo nyiketela vutomi bya xona eka Yena. Entiyisweni, madyambu wolawo ndzi nga ka ndzi nga ma rivali vutomi bya mina hinkwabyo!

Vuleteri Bya Vakokwa Wa Mina

Exikarhi ka 1928 na 1938, ndzi tirhise nkarhi wo tala ndzi endzela vakokwa wa mina le San Antonio. Loko ndzi ri na vona a swi fana ni loko ndzi ri ni vatswari va mina. Kokwana wa xisati a a ri khalipotiya, hi laha maphayona a ma vitaniwa ha kona, ivi endzhaku a va phayona ra nkarhinyana. Kokwana wa xinuna u vekiwe ku va phayona hi December 1929, kutani ntirho wa nsimu a wu endliwa siku na siku.

Kokwana wa xinuna a a ndzi khoma hi mavoko ni madyambu, a ndzi dyondzisa mavito ya tinyeleti. A a ndzi dyondzisa swiphato leswi a swi nhlokohateke. Ndzi fambe na yena ko tala hi switimela swa Pullman, leswi a a tirha eka swona. Loko ndzi ri ni xiphiqo minkarhi hinkwayo a swi ndzi olovela ku ya eka yena; a a ndzi tiyisa, a ndzi sula mihloti. Kambe loko ndzi xupuriwa hikwalaho ko huhwela etlhelo, ivi ndzi ya eka yena leswaku a ta ndzi chavelela, a ku (ku nga marito lawa a ndzi nga ma twisisi hi nkarhi wolowo, kambe wona a ma twala swinene): “Murhandziwa, loko munhu a dyoha, wa xaniseka.”

Malembe Ya Ku Xanisiwa

Nyimpi ya Vumbirhi ya Misava yi tlhekekile hi 1939, kutani vanhu va Yehovha va vone maxangu ni ku xanisiwa hi mintlawa wa vapfukeri. Eku heleni ka 1939, Manana a a vabya swinene, ivi eku heteleleni a boheka ku endliwa vuhandzuri, kutani hi tlhelele eSan Antonio.

Loko hi ri karhi hi fambisa timagazini eswitarateni swa San Antonio, mintlawa ya vapfukeri a yo swi pfuketana yi humelela. Kambe ndyangu wa ka hina a wu nga tshiki ku fambisa timagazini vhiki rin’wana ni rin’wana, un’wana ni un’wana a a yima ekhonweni leyi a averiweke yona. Tatana a a tala ku tekiwa a yisiwa exitichini xa maphorisa, ndzi swi langute hi mahlo.

Tatana u tikarhatile a ya emahlweni ni vuphayona, hambi leswi Manana a bohekeke ku byi tshika. Hambi swi ri tano, a a nga kumi mali leyi eneleke hi leswi a a tirha nkarhinyana ntsena, kutani na yena u boheke ku tshika. Ndzi hete xikolo hi 1939, kutani na mina ndzi ye eku tirheni.

Vito ra Tatana leri nge Judge (muavanyisi) ri kumeke ri tirha hakunene emasikwini wolawo. Hi xikombiso, vamakwerhu vo hlayanyana va ye eku nyikeleni ka vumbhoni edorobeni leri nga mpfhukanyana ku ya en’walungwini wa San Antonio, kutani mulawuri wa ndhawu a ya va pfalela hinkwavo ekhotsweni. A a khome vamakwerhu va kwalomu ka 35, ku katsa ni vakokwa wa mina. Va tivise Tatana hi ta mhaka leyi, kutani a ya kona. U nghene ehofisini ya mulawuri wa ndhawu, a ku: “Hi mina Judge Norris, ndzi huma eSan Antonio.”

“Hi swona Nkulukumba Muavanyisi, xana ndzi nga ku pfuna ke?” ku vutisa mulawuri wa ndhawu.

Tatana u hlamule a ku: “Ndzi tele ku ta humesa vanhu lava ekhotsweni.” Hi loko mulawuri wa ndhawu a va humesa handle ka beyili—a nga ha vutisi nchumu!

Tatana a a rhandza ku nyikela vumbhoni emiakweni ya tihofisi edorobeni, naswona ngopfu-ngopfu a a rhandza ku endzela vaavanyisi ni magqweta. A a byela muamukeri wa vaendzi a ku: “Hi mina Judge Norris, ndzi endzele Muavanyisi Swimani-mani.”

Kutani loko a fika eka muavanyisi, minkarhi hinkwayo a ku: “Ndzi nga si vulavula hi xikongomelo xa riendzo ra mina, ndzi tsakela ku ku tivisa leswaku mina i khale ndzi ri Muavanyisi ku tlula wena. A ndzi ri yena ku sukela loko ndzi tswariwa.” Kutani a a hlamusela ndlela leyi a kumeke vito rakwe ha yona. Leswi a swi endla leswaku va sungula ku va ni xinghana, naswona u hlakulele vuxaka lebyinene ni vaavanyisi vo tala emasikwini wolawo.

Ku Tlangela Vukongomisi Bya Vatswari

A ndzi ri emalembeni lama karhataka ya kondlo-a-ndzi-dyi, naswona a ndzi swi tiva leswaku Tatana na Manana a va karhateka swinene loko va ndzi languta, va tivutisa leswaku i yini lexi ndzi nga ta xi endla endzhaku. Hi laha vana hinkwavo va endlaka ha kona, ndzi ringe Tatana na Manana hi minkarhi yo tala, ndzi kombela ku endla xo karhi kumbe ku ya endhawini yo karhi, leswi a ndzi swi tiva ndzi nga si kuma nhlamulo leswaku a va nga ta swi pfumela. Minkarhi yin’wana a ndzi rila mihloti. Entiyisweni a ndzi ta vaviseka swinene loko a va lo ndzi byela va ku: “Swi lulamile, endla leswi wena u swi rhandzaka. Hina a hi na mhaka na swona.”

Ku tiva leswaku a ndzi nga ta swi kota ku va sindzisa ku cinca mimpimanyeto ya vona swi ndzi tiyisile. Kahle-kahle, leswi swi endle leswaku swi ndzi olovela ku ala ku va kona eka vutihungasi lebyi nga fanelangiki loko vana van’wana va ndzi rhamba, hikuva a ndzi ku: “Tata wa mina a nge ndzi pfumeleli ku ya kwalaho.” Loko ndzi ri ni malembe ya 16, Tatana u ndzi dyondzise ku chayela, kutani ndzi kuma tsalwa ra mina ra mpfumelelo wo chayela. Nakambe hi nkarhi lowu fanaka u ndzi nyike xilotlelo xa yindlu. Swi ndzi tsakisile swinene ku vona leswaku wa ndzi tshemba. Ndzi tivone ndzi kurile, kutani swi endle ndzi tilanguta tanihi munhu loyi a nga ni vutihlamuleri ni ku tiyimisela ku endla leswaku va ya emahlweni va ndzi tshemba.

Emasikwini wolawo a ku nga nyikiwi switsundzuxo swo tala hi ta vukati, kambe Tatana a a yi tiva Bibele, ni leswi a yi vula swona malunghana ni ku teka ‘eHosini ntsena.’ (1 Vakorinto 7:39) U ndzi byele hi ku kongoma leswaku loko ndzo ta ni mufana wa misava ekaya, kumbe ku anakanya ku hungasa na yena, swi ta n’wi karhata swinene. A ndzi swi tiva leswaku u tiyisile, hikuva ndzi vone ntsako ni vun’we evukatini bya vona, hi leswi va tekaneke ‘eHosini.’

Hi 1941, loko ndzi ri ni malembe ya 18, ndzi rhandzane ni jaha rin’wana ra le vandlheni. Jaha leri a ri ri phayona naswona a ri dyondzela ku va gqweta. A ndzi tsakile swinene. Loko hi byela vatswari va mina leswaku hi lava ku tekana, ematshan’wini yo kombisa ku ka va nga swi tsakeli kumbe ku hela matimba, va te: “Hi ni xikombelo xin’we eka wena Blossom. Hi vona onge wa ha ri ntsongo, kutani hi kombela leswaku u rindza lembe rin’we. Loko mi rhandzana hakunene, ku rindza lembe rin’we a swi nge onhi nchumu.”

Swa ndzi tsakisa swinene leswi ndzi yingiseke xitsundzuxo xexo xa vutlharhi. Hi lembe rero rin’we ndzi ve la vupfeke emianakanyweni, kutani ndzi sungula ku vona leswaku jaha leri a ri nga ri na tona timfanelo ta munghana lonene wa vukati. U hetelele a siye nhlengeletano, kutani ndzi pone khombo leri a ri ta ndzi tela evuton’wini bya mina. Swa tsakisa swonghasi ku va ni vatswari lava endlaka swiboho leswi tshembekaka!

Vukati Ni Ntirho Wo Famba-famba

Hi xixika xa 1946, endzhaku ko heta malembe ya tsevu ndzi ri eku phayoneni ni ku tirha nkarhinyana, ku nghene jaha lerinene eka hinkwawo lawa ndzi ma tivaka eHolweni ya Mfumo. Gene Brandt a a averiwe ku famba swin’we ni mutirheli la fambelaka vamakwerhu, hi laha mulanguteri wa xifundzha a a vitaniwa ha kona enkarhini wolowo. Hi rhandzanile hi timbilu ta hina hinkwato, kutani hi tekana ni August 5, 1947.

Endzhakunyana Tatana na Gene va pfule bindzu. Kambe Tatana u byele Gene a ku: “Loko bindzu leri ri hi sivela ku ya enhlanganweni kumbe ri hi sivela ku hetisisa xiavelo xa swa le tilweni, ndzi ta ri pfala.” Yehovha u yi katekisile mianakanyo leyi yo kombisa ku khathalela swilo swa moya, kutani bindzu ri tirhe kahle lerova ri enerisa swilaveko swa hina swa nyama ni ku hi nyika nkarhi wo phayona. Tatana na Gene a va ri van’wamabindzu lavanene, kutani ingi hi ve swifumi hi ku olova, kambe sweswo a ku nga ri pakani ya vona.

Hi 1954, Gene u averiwe ku va malunguteri wa xifundzha, leswi a swi vula ku hundzuka lokukulu evuton’wini bya hina. Xana vatswari va mina a va ta titwisa ku yini? Ni sweswi, leswi a va khathala ngopfu ha swona a ku ri swilaveko swa Mfumo wa Xikwembu ni vuhlayiseki bya moya bya vana va vona, ku nga ri ku khathala hi vona vini. A va kalanga va ku: “Ha yini mi nga tswali vana leswaku hi ta kuma vatukulu?” Ematshan’wini ya sweswo, a va ku: “I yini lexi hi nga mi pfunaka ha xona entirhweni wa nkarhi hinkwawo?”

Kutani loko ku fika siku ro famba ha rona, a va vula ntsena marito ya xikhutazo ni ya ku tsakela lunghelo ra hina lerikulu. A va kalanga va endla hi titwa onge ha va lahla, kambe minkarhi hinkwayo a va hi seketela hi ku helela. Loko hi fambile, va ye emahlweni ni ntirho wa vuphayona lowu va wu endleke malembe ya khume lama landzeleke. Tatana u vekiwe ku va mulanguteri wa doroba ra San Antonio, ku nga ntirho lowu a wu endleke malembe ya 30. Swi n’wi tsakisile loko a vona ku andza ku suka eka vandlha rin’we edorobeni hi va-1920 ku ya eka mavandlha ya 71 emahlweni ka rifu rakwe hi 1991.

Vutomi bya mina na Gene a byi tsakisa swinene. Hi swi tsakerile swinene ku pfuna vamakwerhu lava rhandzekaka ematikweni yo tlula 31, ni lunghelo ro va kona eka ntlawa wa vu-29 wa Xikolo xa Bibele xa Gilead xa Watchtower hi 1957, leri kumbexana ku nga lunghelo ro tlula hinkwawo lawa hi veke na wona. Endzhaku hi tlhelele entirhweni wo famba-famba. Hi 1984, endzhaku ka malembe ya 30 hi ri entirhweni wa xifundzha ni wa muganga, Sosayiti hi musa yi avele Gene ku ya tirha xifundzha xa le San Antonio, tanihi leswi vatswari se a va ri ni malembe yo tlula 80, ni rihanyo leri nga tsakisiki.

Ku Khathalela Vatswari

A hi ri ni lembe ni hafu ntsena hi vuyile eSan Antonio loko Manana a sungula ku khomiwa hi vuvabyi bya ku lahlekeriwanyana hi mianakanyo, kutani a fa. Swi humelele hi ku hatlisa swinene lerova ndzi nga koti ku n’wi byela swin’wana swa swilo leswi a ndzi lava ku n’wi byela swona. Leswi swi ndzi dyondzise ku vulavula ngopfu na Tatana. Endzhaku ka 65 wa malembe va tekanile, a a n’wi tsundzuka swinene Manana, kambe hi tikarhatile hi n’wi kombisa rirhandzu ni ku n’wi seketela.

Tatana u namarhele xikombiso lexi a xi vekeke evuton’wini byakwe hinkwabyo hi ku va kona eminhlanganweni ya Vukreste, ku dyondza ni ntirho wa nsimu ku fikela loko a fa. A a swi rhandza ku hlaya. Tanihi leswi a a sala a ri yexe loko hi ri ensin’wini, a ndzi vuya ndzi n’wi vutisa, “Xana a wu nga khomiwanga hi xivundza ke?” A ndzi kuma leswaku a a khomeke swinene hi ku hlaya ni ku dyondza, lerova ni leswaku xivundza i yini a swi nga ri kona emianakanyweni yakwe.

Ku ni mukhuva wun’wana lowu hi wu namarheleke vutomi hinkwabyo. Tatana a a tshamela ku khutaza leswaku ndyangu wu dya swin’we, ngopfu-ngopfu swakudya swa ni mixo, loko ku kambisisiwa ndzimana ya Tsalwa ra siku na siku. A ndzi nga pfumeleriwi ku huma ekaya hi nga si dyondza ndzimana ya siku. Minkarhi yin’wana a ndzi ku: “Tatana, loko hi dyondza ndzimana ya siku ndzi ta fika xikolo xi nghenile (kumbe ntirho wu sungurile).”

Yena a a hlamula a ku: “A hi ndzimana ya siku leyi ku endlaka u fika nkarhi wu hundzile; hi wena u nga hlwela ku pfuka.” Kutani a ndzi boheka ku rindza ndzi yi twa. U endle leswaku xikombiso lexi xinene xi ya emahlweni ku fikela emasikwini yo hetelela ya vutomi byakwe. Leyi i ndzhaka yin’wana leyi a ndzi siyeleke yona.

Tatana u tshame a xalamukile emianakanyweni ku fikela eku feni kakwe. Lexi endleke leswaku swi olova ku n’wi khathalela hi leswaku a a nga ri munhu wo nyenyela kumbe wo tshamela ku vilela. Kavula, minkarhi yin’wana a a vulavula hi vuvabyi byakwe bya marhambu, kambe a ndzi n’wi tsundzuxa leswaku vuvabyi byakwe a ku ri “Vuadamu,” kutani a hleka. Tatana u fe hi ku rhula ni mixo, hi November 30, 1991, mina na Gene hi ri etlhelo kakwe.

Sweswi ndzi ni malembe lama tlulaka 70 hi vukhale, naswona ndza ha pfuneka hi xikombiso lexinene xa vatswari va mina va Vakreste lava nga ni rirhandzu. Kutani ndzi khongela hi matimba leswaku ndzi kombisa ku tlangela ka mina ka ndzhaka leyi hi ku yi tirhisa khwatsi emalembeni hinkwawo lama ha taka.—Pisalema 71:17, 18.

[Xifaniso lexi nga eka tluka 5]

Manana, a ri na mina

[Swifaniso leswi nga eka tluka 7]

1. Ntsombano wo sungula eka mina: San Marcos, eTexas, hi September 1923

2. Ntsombano wo hetelela eka Tatana: Fort Worth, eTexas, hi June 1991 (Tatana hi loyi a tshameke)

[Xifaniso lexi nga eka tluka 9]

Gene na Blossom Brandt