Misava Yo Antswa—Xana Ko Va Norho Ke?

LOKO a wu ri mulandzeri wa Vumazda hi laha byi hlamuseriwaka ha kona hi muprofeta wa le Iran la vitaniwaka Zoroaster, a wu ta va u rindzele siku leri ha rona misava yi nga ta tlhelela eka vuxongi bya yona bya le ku sunguleni. Loko a wu hanya eGreece ra khale, kumbexana a wu ta va u navele ku kuma Xihlala xo Fuwa lexi rhandzekaka kumbe ku vona ku vuya ka Nguva ya Ntsako leyi hlamuseriwaka hi Hesiod, muphati wa lembe xidzana ra vunhungu B.C.E. Muindiya wa Muguaraní le Amerika Dzonga a nga ha va a ha hlota Tiko ro Pfumala Vubihi. Leswi u hanyaka enkarhini wa hina, kumbexana u ni ntshembo wa leswaku misava yi ta antswa hikwalaho ka tidyondzo ta politiki leti nga kona kumbe hikwalaho ka vutlharhi bya manguva lawa byo langutela mbangu.

Nguva ya Ntsako, Xihlala xo Fuwa, Tiko ro Pfumala Vubihi—lawa i man’wana ya marito lama tirhiseriwaka ku hlamusela nchumu lowu fanaka lowu naveriwaka, ntshembo wo kuma misava yo antswa.

Misava leyi ya hina, a swi kanakanisi leswaku a hi ndhawu yo tsakisa. Ku andza ka vugevenga lebyi chavisaka, ku dlayana ka vamakwavo eka madzolonga lama nga si tshamaka ma voniwa, ku herisiwa ka rixaka, ku nga khathali loko van’wana va xaniseka, vusweti ni ndlala, ku pfumaleka ka mintirho ni ku pfumaleka ka vun’we, swiphiqo swa mbangu, vuvabyi lebyi nga tshungulekiki lebyi hlaselaka timiliyoni ta vanhu—makhombo lama nga kona sweswi, ku hlaya wona i ku xurha. Loko a anakanya hi tinyimpi leti lwiwaka sweswi, mutsari un’wana wa timagazini wa Muntariyana u te: “Mhaka leyi fikaka ku sungula emianakanyweni, hi leswaku swi tikomba onge madzolonga ma famba emahlweni enkarhini wa hina.” Loko u anakanya hi xiyimo lexi, xana u vona onge swa twala ku lwela ku kuma swin’wana swo antswa? Kumbe xana ku navela koloko i ku navela Utopia, ku nga norho lowu nga taka wu nga hetiseki? Xana a yi kona ndhawu yin’wana leyi tlulaka misava leyi hi hanyaka eka yona?

Mianakanyo leyi a hi yintshwa. Hi malembe xidzana yo tala vanhu a va ri karhi va navela misava leyi eka yona ku nga ni ku twanana, vululami, ku humelela ni rirhandzu. Hi ku famba ka nkarhi, vativi vo tala va filosofi va hlamusele tidyondzo ta vona ta Tiko leri tsakisaka, misava yo antswa, hi vuenti. Kambe, lexi khomisaka gome, a va si tshama va swi kota ku hlamusela ndlela yo yi endla yi humelela.

Xana nxaxamelo lowu wa milorho leyi heteke malembe xidzana, ya Ti-utopia ni ku navela ka vanhu leswaku ku va ni vaaki vo antswa, yi nga hi dyondzisa swo karhi?

[Xifaniso lexi nga eka tluka 3]

Xana a yi kona ndhawu yo antswa ku tlula misava leyi?