Varhandziwa Va Wena Lava Feke—Va Kwihi?

ALEC a a karhatekile swinene. Hi vhiki rin’we ntsena u loveriwe hi vanghana va yena vambirhi. Un’wana wa vona, Nevil, u dlayiwe hi mbanga yo duvuriwa. Lowun’wana, Tony, u dlayiwe hi mhangu ya movha. Jaha leri ra malembe ya 14 ra le Afrika Dzonga, ri sungule ku va ni swivutiso leswi ri nga si tshamaka ri va na swona. U tivutisile a ku, ‘Hikwalaho ka yini vanhu va fanele va fa? Naswona ku humelela yini endzhaku ka ku fa?’

Loko a ri karhi a ya enkosini wa Nevil, Alec a a tshemba leswaku u ta kuma tinhlamulo ta swivutiso leswi. U ri: “Kambe muprista u lo hlaya ntsena ebukwini, a vula leswaku Nevil u ye etilweni. Le masirheni, u vule leswaku hi rindzele ku pfuka ka vafi. Leswi swi ndzi pfilunganyile swinene. Loko Nevil a ri etilweni, swi tisa ku yini leswaku a rindzela ku pfuxiwa eku feni?”

Hi ndzhenga wa siku rero, Alec u ye enkosini wa Tony. Ntirho wa kona a wu fambisiwa hi ririmi leri a a nga ri twisisi. Kambe, ku bongosa ka van’wana va vakhandli va nhlonge ku kombise Alec leswaku a ku nga ri na nkhongotelo lowu nyikeriwaka kwalaho. U ri: “Vusiku bya kona, a ndzi hlundzukile swinene. Ndzi tivone ndzi nga pfuni nchumu, ndzi pfilunganyekile. A a ku nga ri na la nga ndzi nyikaka tinhlamulo leti enerisaka eka swivutiso swa mina. A ku ri ro sungula evuton’wini bya mina ndzi tivutisa loko hakunene Xikwembu xi ri kona.”

Lembe na lembe, ku fana na Alec, timiliyoni ta vanhu ti loveriwa hi varhandziwa va tona. 1992 Britannica Book of the Year yi ri: “Emisaveni hinkwayo, ku fe vanhu va 50 418 000 hi 1991.” Xana i timiliyoni tingani leti se ti feke ku fikela sweswi? Anakanya hi mihloti yo tala ya lava feriweke! Ku tlhandlekela eka nhlomulo wa vona, ku na ku pfilunganyeka loku vangiwaka hi mianakanyo leyi hambanaka malunghana ni rifu.

Xisweswo, vanhu vo tala ku fana na Alec, va pfilunganyekile naswona va kanakana loko xi ri kona xisekelo xo va ni ntshembo wo hanya endzhaku ka ku fa. Hi ku ya hi Encyclopedia of Religions, “eka malembe hinkwawo lama hundzeke, vanhu lava anakanyaka a va tshama va hambanile ni ntshungu hinkwawo, . . . a va nga swi twisisi leswaku moya-xiviri kumbe vutomi bya munhu, wu nga hanyisa ku yini handle ka byongo ni miri wa yena.”

Lexi tsakisaka, nsonga-vutivi lowu boxiweke laha henhla wa pfumela leswaku dyondzo ya vukhongeri ya moya-xiviri lowu nga fiki lowu hanyaka handle ka miri, a yi seketeriwi eBibeleni. I ntiyiso, ku kona laha Bibele yi vulavulaka hi ‘moya-xiviri’ wa munhu lowu humaka ni ku tlhelela emirini lowu feke, kambe etindhawini toleto ‘moya-xiviri’ wu va wu tirhiseriwa ku vula “vutomi,” lebyi lahlekeke kumbe lebyi vuyeke. (Genesa 35:16-19; 1 Tihosi 17:17-23) Hakanyingi, eBibeleni rito ‘moya-xiviri’ ri tirhiseriwa ku kombetela eka swivumbiwa leswi vonakaka swa nyama ni ngati, ku nga swivumbiwa leswi hanyaka. (Genesa 1:20; 2:7) Hikwalaho, Bibele hi ku phindha-phindha yi vula leswaku mimoya-xiviri ya fa. (Ezekiyele 18:4, 20; Mintirho 3:23; Nhlavutelo 16:3) Rito ra Xikwembu ri vula leswaku loko mimoya-xiviri yi fa, a ya ha “tiv̌i ntšhumu.”—Eklesiasta 9:5, 10.

Hi tlhelo lerin’wana, Bibele yi na tona timhaka ta ku pfuxiwa ka vanhu lava feke. Lazaro u pfuxiwe endzhaku ka loko ku hundze mune wa masiku a file. (Yohane 11:39, 43, 44) Kambe, ku ta humelela yini hi vanhu lava feke madzana kumbe magidi ya malembe lama hundzeke? Xana leswaku va tlhela va hanya enkarhini lowu taka, Xikwembu xi fanele xi pfuxa mimiri ya vona leyi a va ri na yona loko va fa?

Doo. Mianakanyo yo tano a yi pfumelelani ni leswi humelelaka eka tiathomu ta miri lowu feke. Hi ku famba ka nkarhi, tin’wana ta tiathomu leti ti tswongiwa hi swimilana, ivi ti dyiwa hi swivumbiwa swin’wana, ti va xiphemu xa miri wa swona.

Xana leswi swi vula leswaku a ka ha ri na ntshembo hi vanhu lava feke khale? Doo. Muvumbi wa vuako bya hina lebyikulu u ni vuswikoti lebyikulu byo tsundzuka. Hi vuswikoti bya yena lebyi hetisekeke byo tsundzuka, wa swi kota ku hlayisa vumunhu ni mikhuva ya xitekela ya munhu loyi a lavaka ku n’wi tsundzuka. Ku tlula kwalaho, Yehovha Xikwembu u ni matimba yo tumbuluxa miri wa munhu wu va ni xitekala xo velekiwa na xona, lexi fanaka ni xa munhu loyi a tshameke a hanya. A nga tlhela a nghenisa ni nkumbuko ni vumunhu bya loyi a n’wi tsundzukaka, ku fana na Abrahama.

Malembe ya kwalomu ka magidi mambirhi endzhaku ka ku fa ka Abrahama, Yesu Kreste u nyike xitiyisekiso lexi: “Loko ku ri ku pfuka ka vafi, Muxe na yena u tiyisile mhaka loko a ri kusuhi ni xihlahla, kutani a vula leswaku [Yehovha] i Xikwembu xa Abrahama, ni Xikwembu xa Isaka, ni Xikwembu xa Yakobo. Hikokwalaho a hi Xikwembu xa lava feke, kambe i xa lava hanyaka; hikuva, eka xona, hinkwavo va hanya.” (Luka 20:37, 38) Handle ka Abrahama, Isaka na Yakobo, vanhu van’wana va timiliyoni lava feke va kona emianakanyweni ya Xikwembu, va rindzele ku pfuxiwa ka vafi loku taka. Bibele ya tiyisekisa: “Lavo lulama ni lava nga lulamangiki va ta pfuka eku feni.”—Mintirho 24:15.

Endzhaku ka mavhikinyana a feriwile, Alec u kume tinhlamulo ta swivutiso swakwe. Un’wana wa Timbhoni ta Yehovha u te ekaya ka vona ivi a n’wi komba leswi Rito ra Xikwembu ri swi vulaka hi vafi ni hi ku pfuka ka vafi. Leswi swi chavelele Alec, swi endla vutomi bya yena byi va ni xikongomelo.

Xana na wena u nga swi tsakela ku kuma vutivi lebyi engetelekeke hi ntshembo wa ku pfuka ka vafi lowu sekeriweke eBibeleni? Hi xikombiso, xana ku pfuka ka vafi ko tala ku ta humelela etilweni kumbe emisaveni? Naswona, xana munhu u fanele a endla yini leswaku a amukeriwa hi Xikwembu ivi a vona ku hetiseka ka xitshembiso xa xona lexi vangamaka, xa leswaku vanhu va nga ha tlhela va hlanganisiwa ni varhandziwa va vona lava feke?