Mathwasana Ya Le Gilead Ma Hisekela Ku Hangalasa Mahungu Lamanene

“NCHUMU wo hlamarisa swinene lowu hi nga ta ka hi nga wu rivali.” Yoleyo a ku ri ndlela leyi Anders na Amalia Groth va titweke ha yona hi vuleteri bya vona bya vurhumiwa. Va phofule mintlhaveko ya mathwasana hinkwawo ya 48 ya ntlawa wa vu-97 ya Xikolo xa Bibele xa Gilead xa Watchtower hi ku vula leswi landzelaka: “Vuleteri bya le Gilead byi hi khutazile ni ku hi endla hi lungheka, kutani hi hisekela ku ya eswiavelweni swa hina leswintshwa.”

Hi nga vona ntsako lowu loko swichudeni swi ri karhi swi hlamusela nongonoko wo thwasisa; laha vanhu va 6 420 a va hlengeletanele xiendlakalo lexi hi September 4, 1994.

David Abel ni nsati wakwe Kelli va vule leswi: “Theodore Jaracz wa Huvo leyi Fumaka u pfule nongonoko hi ku vulavula hi nhloko-mhaka leyi nge ‘Ku Dyondzisiwa Hi Yehovha.’ Yinhla leyi hi nga ta ka hi nga yi rivali hi leyi vuriweke hi Makwerhu Jaracz loko a ku: ‘Hi fanele ku amukela leswaku hi vatsongo loko hi ringanisiwa na Yehovha,’ kutani a swi kombisa hi dyondzo ya matimba leyi kumekaka eka Yobo tindzima 38 na 39. Makwerhu Jaracz u boxe leswaku hambi leswi hi andziseke vutivi bya Bibele hi Xikolo xa Gilead, a swi vuli leswaku hi tiva nhlamulo ya xivutiso xin’wana ni xin’wana. Hi fanele ku hambeta hi dyondza Rito ra Xikwembu.”

Christian na Angele Coffy va vulavurile va ku: “Hi tsakisiwe hi nkulumo leyi nyikeriweke hi Max Larson leyi a yi ri na xihloko lexi nge ‘Hi Wihi Nkoka Wa Masungulo Lamanene?’ Hi rhandze ku hi fanisa ka yena ni muako lowu lavaka masungulo lama enteke emisaveni leyi tiyeke leswaku wu ta yima wu tiyile hambi loko ku va ni ku ninginika ka misava. Hi ku dyondza hi ku hiseka, hi nga aka vuxaka bya le kusuhi na Yehovha, naswona hi nga sekela ripfumelo ra hina evutivini lebyi enteke leswaku hi ta yima hi tiyile eminkarhini yo nonon’hwa.”

Gary na Lynn Elfers va ri: “Nkulumo ya Milton Henschel, muungameri wa xikolo, leyi a yi ri ni xihloko lexi nge ‘Masimu Ma Vupfele Ku Tshoveriwa’ a hi nge yi rivali. Tsalwa-nkulu ra yona, ku nga Yohane 4:35-38, ri kandziyise lunghelo leri hi nga na rona ro nghena ensin’wini leyi se yi byariweke hi vatirhi vo rhanga. Leswi swi ta hi susumetela ku tirha hi ku hiseka.” Hi ku pfumelelana ni leswi, Jan na Sirpa Vaahtola va te: “Makwerhu Henschel u pfuxe ku langutela ka hina malunghana ni ntshovelo lowu hi langutaneke na wona hi ku hlamusela xiviko xa sweswinyana lexi humaka eMatikweni ya Baltic. Ku andza ka le Estonia a ku ri 51 wa tiphesente, eLatvia a ku ri 106 wa tiphesente naswona eLithuania a ku ri 51 wa tiphesente. Vona ndlela leyi swi nyanyulaka ha yona! Vamakwerhu va kwalaho va kombela N’wini leswaku a rhumela vatirhi lava engetelekeke. A hi tsake ngopfu ku twa mhaka leyi, tanihi leswi hi averiweke aEstonia!”

Kevin na Evelyn Cortina va tsundzuke leswi: “Joel Adams u landzerile ni xihloko lexi nge ‘Tshemba Yehovha.’ U hi tsundzuxe leswaku a hi fanelanga hi ehleketa leswaku minkarhi yin’wana hi nga tshemba Yehovha ivi minkarhi yin’wana hi titshega hi ku twisisa ka hina. Eswiavelweni swa hina hi ta hlangana ni mintlhontlho yo tala—rihanyo, swakudya, ririmi, mindhavuko ni swin’wana swo tala. Hinkwaswo ka swona swi ta lava leswaku hi tshemba Yehovha.”

Endzhaku ku landzele Gerrit Lösch, xirho xa Huvo leyi Fumaka, loyi a vulavuleke hi nhloko-mhaka leyi nge “Tshama U Ri Karhi U Kombisa Musa Wa Yehovha.” Alen na Ann Marie Gokavi va te: “U kombise leswaku ku va ni musa eka varhumiwa-kuloni ni le ka lava hi va avelaka mahungu lamanene i xikombiso xa ku wupfa hi tlhelo ra Vukreste. Swiavelo swa matiko mambe swi katsa ku tinyiketela, kambe loko hi nga ri na musa, ku tinyiketela ka hina ku ta va ku nga ri ka nkoka.” (Matewu 9:13) Peter na Fleur Hupston va engeterile: “Makwerhu Lösch u vule leswaku hi fanele ku va ni musa na le ka vamakwerhu va xinuna ni va xisati, hi nga xopa-xopi swihoxo swa vona, leswaku ku tsana ka vona ku nga vi mhaka leyikulu.”

Mickey na Sherry Minsky va tsundzuke leswi: “Jack Redford, un’wana wa valeteri va hina va le Gilead, u landzerile hi nhloko-mhaka leyi nge ‘Xana U Nga Ku Amukela Ku Tshinyiwa?’ U kombise leswaku ku tikukumuxa ku endla leswaku swi nonon’hwa ku amukela ndzayo naswona loko hi venga xitsundzuxo, hi ta lahlekeriwa hi mbuyelo wa xona. Kutani malunghana ni ku amukela ndzayo, u nyike swiringanyeto leswi tirhaka leswi sekeriweke eka Swirilo 3:27-31.” Charles na Joan Held va engeterile: “Hakanyingi a hi swi voni swihoxo swa hina; hikwalaho, hi fanele ku teka ndzayo tanihi ndlela yo hi pfula mahlo leswaku hi vona swilo leswi a hi nga swi lemuki. Ndzayo ni ku tshinya loku humaka eka Yehovha i xikombiso xa rirhandzu ra yena eka hina.”

Kenneth na Lisbeth Ardkäll va te: “Muleteri un’wana, ku nga Ulysses Glass, u vulavule hi nhloko-mhaka leyi nge ‘Amukela Vutlharhi Lebyi Tirhaka Lebyi Yisaka eVuton’wini.’ U vutise a ku: ‘Xana u ta endla yini hi leswi u swi dyondzeke?’ Kutani u nyike xikombiso lexi sekeriweke eka Swivuriso 30:24-26 malunghana ni mbila ni ndlela leyi Yehovha a yi hlomiseke ha yona leswaku yi hanya. Na hina, hi tlhelo lerin’wana, a hi lo tswariwa hi tlharihile, hi fanele ku tikarhatela ku kuma vutlharhi. Yehovha u hi hlomise hi swilo hinkwaswo leswi hi swi lavaka leswaku hi endla tano. Ntsena loko hi titshineta eka Yehovha ni le ka van’wana hi rirhandzu, hi ta hetisisa swo tala.”

Nkulumo-nkulu

Jay na Gwen Abraczinskas va te: “Makwerhu Karl F. Klein, xirho xa Huvo leyi Fumaka, hi rirhandzu u kambisise Pisalema ya vu-19 na hina enkulumeni yakwe leyi nge ‘Ndzalama Exikarhi Ka Tindzalama.’ U kandziyise rirhandzu leri enteke ra mupisalema Davhida eka Yehovha ni ku tsakela ka yena Rito ra Xikwembu.” Keith na Donna Hornback va te: “Makwerhu Klein u avanyise pisalema leyi hi swiphemu swinharhu. Xiphemu 1 (tindzimana 1-6) xi kombisa ku tlangela ka Davhida eka ntumbuluko wa Xikwembu, xiphemu 2 (tindzimana 7-10) xi phofula ku tlangela ka yena milawu ya Xikwembu naswona xiphemu 3 (tindzimana 11-14) xi hi tsundzuxa leswaku tanihi Davhida hi fanele ku navela ku va ni vuxaka lebyinene na Yehovha.”

“Hi tsakele yinhla ya leswaku ku chava Yehovha i swa nkoka loko hi ta papalata leswo biha. Leswi swi hi susumetela leswaku hi endla leswi tengeke emahlweni ya yena,” ku vule David na Raylene Long. Frank na Vibeke Madsen va pfumerile. Va te: “Nhlamuselo ya Makwerhu Klein malunghana ni ndlela leyi switsundzuxo, milawu ni swileriso swa Yehovha swi vuyerisaka ha yona yi katsakanye swilo leswi hi swi dyondzeke eGilead hi ndlela leyinene. Leswi swi hi endle leswaku hi tiyimisela swinene ku namarhela Rito ra Xikwembu enkarhini lowu taka ni ku ri endla ri va vuhlayiselo bya rifuwo ra risima.”

Endzhaku ka nkulumo-nkulu, swichudeni swi amukele tidiploma ta swona, naswona ku tivisiwe swiavelo swa swona swa le matikweni mambe. Endzhaku ka ku wisa va kuma swakudya swo khomisa nyoka, hinkwavo va tlhele va hlengeletanela xiyimiso xa nindzhenga. Mathwasana ma hlanganyele eku hlamuleni ka swivutiso leswi lunghiseleriweke hi nkarhi wa Dyondzo ya Xihondzo xo Rindza leyi komisiweke.

Bob na Shannon Lakatos va tsundzuke leswi: “Kutani ku landzele nongonoko wa swichudeni lowu a wu ku ‘Ku Leteriwa Ku Va Vahuweleri Va Mfumo eMisaveni Hinkwayo.’ Xiphemu xo sungula xa nongonoko a xi vulavula hi mintokoto ya swichudeni entirhweni wa nsimu hi nkarhi wa tin’hweti ta hina ta ntlhanu ta vuleteri. Xi yise nyingiso eku tirhiseni ka swivutiso hi vutshila evutirhelini bya hina. Xiyenge xa mbulavurisano xi kombise tindlela letinene to langutana ni mintlhontlho ni ku cinca swiyimo swa vutomi bya vurhumiwa. Tinkulumo tinharhu ta ti-slide ta Costa Rica, India na Malawi ti hi endle leswaku hi vonanyana nhlengeletano ya Yehovha ya misava hinkwayo.”

Jesse na Michelle Duncan va te: “Drama leyi nga landzela, leyi nge Vana Munhu Wa Moya, Hayi Wa Misava yi kombise vuyelo byo biha lebyi maxaka man’wana ya misava, lama tianakanyelaka hi ndlela ya wona ma nga vaka na byona.” Wenzel na Kelly Koula va engetele va ku: “Yi kombise leswaku Vakreste va fanele ku languta swiletelo ni minkongomiso ya le Tilweni tanihi leyi faneleke ni leyi vuyerisaka.”

Risimu ni xikhongelo xo hetelela swi fikise nongonoko lowu wo tsakisa emakumu. Loko mathwasana ma hangalaka ma ri ni ku langutela ka ku ya eswiavelweni swa wona swa le matikweni mambe ya 18, mianakanyo ya wona yi phofuriwe kahle hi nhlamuselo yo koma ya Tommi na Jael Kauko loko va ku: “Hi hisekela ku ya eswiavelweni swa hina ni ku ya tirhisa leswi hi swi dyondzeke. Hi nyikiwe swo tala—sweswi i nkarhi wa hina wa ku nyika.”

[Xifaniso lexi nga eka tluka 26]

Ntlawa Wa Vu-97 Lowu Thwasaka Wa Xikolo Xa Bibele Xa Gilead Xa Watchtower

Eka nxaxamelo lowu nga laha hansi, tilayeni ti hlayeriwe ku sukela emahlweni ku ya endzhaku, naswona mavito ma xaxametiwe ku suka eximatsini ku ya exineneni eka layeni yin’wana ni yin’wana.

(1) Hong, J.; Hong, D.; Groth, A.; Cortina, E.; Lakatos, S.; Hornback, D.; Acevedo, L.; Coffy, A. (2) Elfers, L.; Gokavi, A.; Ardkäll, L.; Abraczinskas, G.; Knott, K.; Lizer, T.; Abel, K.; Abel, D. (3) Duncan, M.; Gokavi, A.; Held, J.; Hupston, F.; Lakatos, B.; Long, R.; Minsky, S.; Acevedo, E. (4) Ardkäll, K.; Kauko, J.; Vaahtola, S.; Cortina, K.; Carson, N.; Minsky, M.; Lizer, G.; Koula, K. (5) Duncan, J.; Abraczinskas, J.; Vaahtola, J.; Madsen, F.; Madsen, V.; Long, D.; Carson, C.; Elfers, G. (6) Kauko, T.; Hupston, P.; Held, C.; Groth, A.; Hornback, K.; Koula, W.; Knott, D.; Coffy, C.