Xiviko Xa Vahuweleri Va Mfumo

Vantshwa Va Twarisa Mahungu Lamanene eAfrika

ENDZHAKUNYANA ka ku pfuka ka Yesu, wanuna wa Muntima a a ri karhi a endzela eYerusalema. Bibele a yi ri boxi vito ra yena. U tiviwa tanihi “ndhuna leyikulu ni mulanguteri wa rifuwo hinkwaro ra Kandake, hosi ya wansati ya Etiyopiya.” Hikwalaho ka yini a boxiwa eBibeleni? Hikuva ntsumi yi kongomise muvuri wa evhangeli wa Mukreste Filipi, ku ya twarisa ‘mahungu lamanene malunghana na Yesu’ eka yena. Wanuna loyi wa Muetiyopiya a a ri Muntima wo sungula erhekhodweni ku va xirho xa vandlha ra Vukreste.—Mintirho 8:26-39.

Namuntlha, ku ni madzana ya magidi ya Timbhoni ta Yehovha eAfrika. Ti tirhisa nkarhi wun’wana ni wun’wana ku avela van’wana mahungu lamanene malunghana na Yesu. Mintokoto leyi landzelaka yi kombisa leswaku hambi va ri vantshwa eAfrika va hlanganyela entirhweni lowu.

◻ Sandy na Priya, vanhwanyana vambirhi va malembe ya 11 hi vukhale va le Nairobi, eKenya, a va ri vaakelani. A va tsakela ku tlanga swin’we ni ku lombana tibuku ta mintsheketo. Vatswari va Priya va sungule ku dyondza Bibele ni Timbhoni ta Yehovha. Sweswi Priya a a ri ni tibuku to hambana-hambana letintshwa to engetela eka leti a ti hlengeleteke, ku katsa ni yin’wana leyi a a yi rhandza swinene, ku nga Listening to the Great Teacher, leyi humesiweke hi Watchtower Bible and Tract Society. U hlaye buku ya yena leyi nge Great Teacher ni munghana wa yena Sandy, naswona vanhwanyana lavambirhi va sungule ku yi hlaya nkarhi na nkarhi.

Hambi swi ri tano, mana wa Sandy, Una, a a nghena Kereke ya Anglican naswona a nga lavi leswaku n’wana wa yena a hlaya tibuku leti humaka eka Timbhoni ta Yehovha. Ku nga khathariseki nkaneto wa mana wakwe, dyondzo yi ye emahlweni. Siku rin’wana Sandy u kombele mana wa yena ku yingisela bulo ra vona kan’we ntsena. Ndzima leyi vanhwanyana lava va yi hlayeke siku rolero a yi ku “Vavanuna Vambirhi Lava Tlangeleke Masiku Ya Ku Velekiwa.” Una u yingiserile naswona a a tsakile swinene. Hi ku hatlisa u ye eka mana wa Priya a ri ni swivutiso swo tala swa Bibele.

Mana wa Priya u hlele leswaku Mbhoni yin’wana yi ta dyondza Bibele na Una. Hi ku hatlisa Una a a byela mutirhi-kulobye Dolly leswi a swi dyondza. Hi nkarhi lowu fanaka, Priya wa malembe ya 11 hi vukhale u ye emahlweni a endla nhluvuko, ivi a tiboha ku kombisa ku tinyiketela ka yena eka Yehovha Xikwembu hi nkhuvulo wa mati entsombanweni wa muganga wa Timbhoni ta Yehovha. Lexi tsakiseke Priya ngopfu, Una na Dolly na vona va khuvuriwile entsombanweni wolowo!

◻ Ku ni matiko man’wana ya le Afrika laha ntirho wa Timbhoni ta Yehovha wu nga amukeriwangiki ximfumo eka wona. Etikweni rin’wana ro tano, ku ni xiyimo lexi tolovelekeke xa ku pfumelela mintirho ya vukhongeri ya Timbhoni ni leswi ti swi pfumelaka. Exikolweni xin’wana etikweni rolero, mufana wa malembe ya nkombo hi vukhale ni makwavo wa yena wa malembe ya tsevu hi vukhale—i vana va Timbhoni—va pfumeleriwe ku huma etlasini hi nkarhi wa swikhongelo swa vukhongeri.

Siku rin’wana mudyondzisi lontshwa u lave leswaku vafana lava va hlanganyela exikhongelweni ni vana lavan’wana. Mufana lonkulu u arile kutani a biwa hi mudyondzisi. Makwavo wa yena lontsongo, Shadrack wa malembe ya tsevu hi vukhale u sindzise ku ya vona nhloko ya xikolo ehofisini ya yona. Nhloko ya xikolo ni mudyondzisi lontshwa va n’wi vutise lexi n’wi endlaka a nga lavi ku hlanganyela ni lavan’wana. Va n’wi vutise loko a chava ku biwa hi vatswari va yena. U hlamule hi Xiarabu lexinene ngopfu a ku: “E-e, Xikwembu lexi ndzi xi gandzelaka a hi Xikwembu xa mpfilumpfilu kambe i xa nhleleko. A ndzi nge vi un’wana wa Timbhoni ta Yehovha ekaya kambe exikolweni ndzi va wa vukhongeri byin’wana!” Hikwalaho, u nyikiwe ntshunxeko.

Endzhaku ko khuvuriwa, wanuna wa Muetiyopiya loyi a boxiweke ebukwini ya Mintirho ‘u ye emahlweni ni riendzo ra yena, a tsakile swinene.’ (Mintirho 8:39) Hi ku fanana namuntlha, vahuweleri va Mfumo etiko-nkulu ra Afrika va tsakela lunghelo ra vona ro ‘twarisa mahungu lamanene malunghana na Yesu.’—Mintirho 8:35.