Xiviko Xa Vahuweleri Va Mfumo

Ku Fikelela Swimitana Swa Le Kule Swa Le Greenland

KU RINGANA makume yo tala ya malembe Timbhoni ta Yehovha ti tirhise timagazini ta Xihondzo xo Rindza ni Xalamuka! ku chumayela mahungu lamanene. Timagazini leti ti tlakusa vutlhari bya Yehovha, hi laha byi hlamuseriwaka ha kona eRitweni rakwe, ku nga Bibele. Ti xiya swiendlakalo swa misava leswi fambisanaka ni vuprofeta bya Bibele, naswona ti tirhisa ndzayo leyi olovaka ya Bibele ku langutana ni swirhalanganya swa manguva lawa.—Yakobo 3:17.

Hi 1994, Timbhoni ta le Greenland ti endle matshalatshala yo hlawuleka yo nyikela Xihondzo xo Rindza ni Xalamuka! eka vanhu vo tala hi laha swi nga kotekaka ha kona. Hi ximumu, ti endle matshalatshala yo endzela tindhawu ta le kule etikweni leri ra Greenland. Ntlawa wa vahuweleri va Mfumo wu fambe 4 000 wa tikhilomitara hi byatso eribuweni ra le vupela-dyambu ku ya eQaanaaq (Thule), wu fikele switikwana swa le n’walungulungu wa xirhendzevutana xa misava. Riendzo ra wona ri teke nkombo wa masiku. Eribuweni ra le vuxeni, ntlawa lowutsongo wa Timbhoni wu fikelele ximutana lexi nga le Ittoqqortoormiit naswona a ku ri ro sungula xi hlanganisiwa hinkwaxo hi mahungu lamanene.

Eku sunguleni ka lembe rero, hi n’hweti ya April, tikopi ta 7 513 ta Xihondzo xo Rindza ni Xalamuka! ti fambisiwile eka vanhu va le Greenland. Leswi swi vula leswaku, hi xiringaniso, wun’we eka vahuweleri lava va Mfumo vo ringana 127 u fambise timagazini to ringana 59—magazini wun’we eka vaaki van’wana ni van’wana va 7. Hi n’hweti yoleyo, Xalamuka! a yi ri ni swihloko leswi tlhandlamanaka ehansi ka xihloko xa xifunengeto xa yona lexi nge: “Khensa Ya Mavele—Vuvabyi Lebyi Chaviwaka Hi Wansati Un’wana Ni Un’wana.” Mbhoni yin’wana leyi fambiseke timagazini to ringana 140, yi siyele muhaxi wa le ka thelevixini kopi ya Xalamuka! Endzhakunyana ka masiku ma nga ri mangani, nongonoko wa mahungu eka thelevixini wu humese swihloko leswi vulavulaka hi khensa ya mavele. Muhaxi u kombise magazini eka thelevixini, a kombisa matluka yo hlayanyana a ri karhi a bumabumela vuhundzuluxeri lebyinene bya Xigreenland. U tlhele a kandziyisa swiringanyeto leswi tirhaka leswi nyikeriweke hi Xalamuka! tanihi nkhathalelo wa rihanyo lowu sirhelelaka.

Mbhoni leyi ku nga yona yi fambiseleke muhaxi timagazini teto ku vulavuriwe na yona eka nongonoko wolowo wa TV. Yi hlamule swivutiso swo hlayanyana mayelana ni Timbhoni ta Yehovha ivi yi vulavula hi ku hangalasiwa ka timagazini hinkwako-nkwako, nhweti yoleyo. Yi tlhele yi hlamusela hi vutlhari lebyi tirhaka lebyi kumekaka eBibeleni ni ku kombisa leswaku tindzayo to tano leti twalaka ti nga hi pfuna ku hlangavetana ni swirhalanganya swa namuntlha.

Nongonoko wu hetelele hi ku burisana ni murhangeri wa Greenlandic Cancer Society. U vule leswaku a nga si tshama a vona rungula lerinene swonghasi emhakeni leyi, hi ririmi ra yena. Ivi a rhamba hinkwavo lava lavaka ku twa mhaka ya khensa ya mavele leswaku va hlaya swihloko swa Xalamuka! U vule leswaku a ku ri ni xivangelo lexinene xo nkhensa Timbhoni ta Yehovha hi goza leri ti ri tekeke.

Tanihi le Greenland, Timbhoni ta Yehovha emisaveni hinkwayo ti hambeta ti chumayela mahungu lamanene eka “swivumbiwa hinkwaswo leswi nge hansi ka tilo.” (Vakolosa 1:23; Mintirho 1:8) Hi ku tirhisa tibuku ta Bibele, ku katsa ni Xihondzo xo Rindza ni Xalamuka!, ti pfuna vanhu va tinxaka hinkwato ku hlangavetana ni swirhalanganya swa namuntlha, ni ku tlhela ti va nyika ntshembo wa vumundzuku byo antswa.

[Mepe lowu nga eka tluka 8]

(Leswaku u vona rungula leri hleriweke hi ku helela, vona nkandziyiso wa kona)

Qaanaaq (Thule)

Ittoqqortoormiit

Nuuk (Godthåb)