Xana Ku Ni Tintsumi Laha Hi Nga Kona?
Swi humelele hi ku copeta ka tihlo. A a ri karhi a anakanya leti na letiya naswona a tirivele leswaku u le kwihi, Marilynn u fambe a ya fika exiporweni. Hi xitshuketa, u twe pongo lerikulu. Loko a languta, u sungule ku vona leswaku u yime endleleni ya xitimela lexi a xi ri karhi xi ta! Marilynn u yime a ku dzi, a omile hi ku chava. Xitimela a xi ri kusuhi swinene lerova a swi kota ku vona mahlo ya wasi ni nghohe leyi chuheke ya mufambisi wa xona. Marilynn a nga swi rivalanga leswi humeleleke endzhakunyana. U te: “Onge hi loko ndzi susumetiwe hi xihontlovila hi le ndzhaku. Ndzi thamuke ndzi suka exiporweni ndzi ya wela enkumeni.” Hambi leswi a vavisekilenyana, Marilynn u pfuke a lava ku nkhensa la n’wi poniseke—kambe a nga vonanga munhu! Xana u hetelele a te yini? Marilynn u te: “Ntsumi leyi ndzi rindzaka yi ponise vutomi bya mina. Xana a nga va mani handle ka yona?”
MISAVA leyi nga ni ku kanakana yi tikomba yi godzomberiwe ngopfu hi tintsumi masiku lawa. Emalembeni ya sweswinyana, swivumbiwa swa le tilweni swi kombisiwa ngopfu eka thelevhixini, tibayisikopo ni le ka ntlango wa Broadway. Tibuku leti vulavulaka hi tintsumi ti tele eka nxaxamelo wa tibuku ta vukhongeri leti xavisiwaka ngopfu. Ku ni mintlawa, tiseminara ni swiphephana leswi vulavulaka hi tintsumi. Minhlangano yi vumbiwile leswaku yi pfuna wena—hi laha xihloko xin’wana xi swi vekaka ha kona—ku ku “endla u ‘kuma mpfuno wa tintsumi.’”
Vaxavisi lava rindzeleke leswi vuyerisaka vona ntsena va tirhisa fambiselo ro gandzela tintsumi leswaku va hambeta va xavisa swilo swo tala. Un’wana wa n’wini wa xitolo xin’wana xa le United States u ri: “Xilo xihi na xihi lexi nga ni ntsumi eka xona xa bindzurisa.” Ku engetela eka tibuku to tala leti xaviwaka, u xaxameta “swifaniso swa tintsumi, swipereta, swipopana, swikipa, swifaniso ni makhadi ya marungula”—hinkwaswo swi hlengeleta leswi mutsari un’wana wa mahungu a swi vitanaka “mpindzulo wa le tilweni.”
Kambe lowu a hi nchumu lowu tsakeriwaka swa nkarhinyana, ku vula lava seketelaka ntsumi. Leswaku va tiyisa leswi va swi vulaka, va nyikela vumbhoni byo tala—“evuton’wini bya xiviri” laha va hlanganeke ni tintsumi. Van’wana va vula leswaku va vone ntsumi yi ri ni xivumbeko xa munhu. Van’wana va vone ku vonakala, va twe rito, va ri va titwe va ri ni moya kumbe va titwe va ri ni nsusumeto lowu va kholwaka leswaku i wa ntsumi. Vo tala, ku fana na Marilynn, va vula leswaku ntsumi yi ponise vutomi bya vona.
Ku humelela yini? Joan Wester Anderson, loyi a tsaleke tibuku timbirhi mayelana ni “mahlori” u ri: “Ndzi ehleketa leswaku ku na mimoya leyi pfukaka.” Alma Daniel, loyi a pfuneteke eku tsariweni ka buku yin’wana, u yima hi rito leri. U vula leswaku tintsumi “sweswi ti lerisiwa leswaku ti ti tivisa leswaku vanhu vo tala va ta fikeleriwa. Leswi endlaka leswaku hi vona swo tala mayelana na tona hi leswi ti swi lavisaka sweswo. Ta swi endla.”
Xana leswi swi tano hakunene? Kumbe ku ni xin’wana lexi vangaka nyanyuko lowu nga kona sweswi mayelana ni tintsumi? Leswaku hi kuma nhlamulo, hi fanele hi kambisisa Rito ra Xikwembu. Bibele yi tamele ntiyiso mayelana ni tintsumi, hi laha hi nga ta vona ha kona.
[Laha Xifaniso Xi Humaka Kona eka tluka 2]
Pages 3 and 4: The New Testament: A Pictorial Archive from Nineteenth-Century Sources, by Don Rice/Dover Publications, Inc.