“Ndzi Wa Risima Eka Yehovha!”

EMINKARHINI leyi “yo nonon’hwa,” malandza yo tala ya Yehovha yo tshembeka ma hambeta ma lwisana ni mintlhaveko ya ku titwa ma nga pfuni nchumu. (2 Timotiya 3:1) Leswi a swi hlamarisi, hikuva “mano” man’wana ya Sathana i ku hi endla hi titwa onge a hi rhandziwi, hambi ku ri hi Muvumbi wa hina! (Vaefesa 6:11, vona nhlamuselo ya le hansi eka NW.) Hi laha ku faneleke nkandziyiso wa Xihondzo xo Rindza xa April 1, 1995 wu tamele swihloko swimbirhi leswi dyondziwaka evandlheni leswi nge “Mi Hlawulekile eMahlweni Ka Xikwembu!” na lexi nge “Ku Pfuxana eRirhandzwini Ni Le Mintirhweni Leyinene—Njhani?” Swihloko leswi swi endleriwe ku hi tsundzuxa leswaku Yehovha wa ma tlangela matshalatshala ya hina. Leti landzelaka i tinhlamuselo leti kombisaka ku tlangela:

“Emalembeni ya mina ya 27 ndzi ri un’wana wa Timbhoni ta Yehovha a ku si tshama ku va ni magazini lowu wu ndzi khumbeke hi ndlela leyi. A ndzi nga swi koti ku sivela mihloti leswaku yi nga humi—swihloko leswi swi ndzi wisisile swinene. Sweswi ndza swi twa leswaku Yehovha wa ndzi rhandza hakunene. Swi vonaka onge ndzi rhuriwe ndzhwalo lowukulu emakatleni.”—C. H.

“Ndzi hlaye magazini lowu ka mune hi siku rin’we. Ndzi tsakisiwe hi loko xihloko lexi xi vula leswaku u dyondzisiwe mavunwa loko u vula leswaku a wu pfuni nchumu. Ndzi ta tirhisa xihloko lexi entirhweni wa vurisi ni le ntirhweni wa ku chumayela hi yindlu na yindlu.”—M. P.

“Sathana u tirha hi matimba ku endla leswaku hambi lava va rhandzaka Yehovha, va titwa va nga pfuni nchumu ni ku ti twa va nga rhandziwi. Ku tsundzuxiwa hi ntlawa wa ‘nandza lowo tshembeka’ leswaku Yehovha wa hi rhandza swinene ni leswaku wa swi tlangela hinkwaswo leswi hi n’wi endlelaka swona hambi loko swi ri switsongo, inchumu lowu khutazaka swinene, eka leswi ndzi swi hlayeke. Hi malembe layo tala a ndzi titwa hi ndlela leyi mi yi hlamuseleke eka swihloko leswi. Ndzi titwe onge Yehovha a a nga ndzi rhandzi, lero ndzi tirhe hi matimba entirhweni wa yena leswaku a ta ndzi rhandza. Kambe a ndzi susumetiwa hi ku tivona nandzu ni ku khomiwa hi tingana. Hikwalaho ku nga khathariseki leswaku a ndzi tirha tiawara tingani evutirhelini, kumbe leswaku ndzi pfune vanhu vangani, a ndzi twa swi nga enelanga. A ndzi vona ndzi kayivela nchumu wun’wana. Kutani loko ndzi tirhela Yehovha hi rirhandzu, ndzi anakanya leswaku wa n’wayitela naswona wa tinyungubyisa hi mina. Leswi swi endla leswaku rirhandzu ra mina eka yena ri andza swinene naswona swi ndzi endla ndzi navela ku endla leswi engetelekeke. Sweswi ndzi ni ntsako lowukulu entirhweni wa mina eka Yehovha.”—R. M.

“Ina, leswi i swihloko leswinene, leswi akaka, leswi khumbhaka timbilu ta hina leswi ndzi tshameke ndzi swi hlaya! Ndzi hlaye Xihondzo xo Rindza ku ringana 55 wa malembe, naswona a ku ri ni swihloko swo tala leswo hlawuleka. Kambe nkandziyiso lowu wu tlula xin’wana ni xin’wana lexi hi tshameke hi va na xona leswaku hi hunguta ku kanakana, ku karhateka, ni nchavo wa leswaku ‘a hi pfuni nchumu’ ni leswaku ‘a hi rhandziwi’ ni leswaku a hi nge swi koti ku endla leswi ringaneke leswaku hi ‘kuma’ rirhandzu ra Yehovha. Xihondzo xo Rindza lexi xi tamele mpfuno wa xiviri wa moya lowu vamakwerhu va wu lavaka swinene. Ndzi tiyimisele ku tirhisa swihloko leswi nkarhi na nkarhi loko ndzi endla vurisi.”—F. K.

“Eka van’wana va hina lava lwisanaka ni ku nga titshembi, kumbe ku nga tirhandzi swi nga hi nonon’hwela ngopfu ku tama ha ha ri na matimba ivi hi ya emahlweni na ntiyiso. Nkandziyiso lowu wu kombise ku enta ka ntwela-vusiwana ni ku twisisa, a wu chavelela, kukotisa murhi wo tshungula, loko wu nghena embilwini. Mayana ndlela leyi swi chavelelaka ha yona ku hlaya marito yo tano eka Xihondzo xo Rindza ni ku tiva leswaku Yehovha wa twisisa! Ndza nkhensa loko mi hi tsundzuxa leswaku Yehovha a nga ringeti ku endla vanhu va yena leswaku va tivona nandzu, va khomiwa hi tingana, kumbe ku khomiwa hi nchavo. Hambi leswi ndlela leyi a ndzi hoxa xandla entirhweni wa ku chumayela endzhakunyana a yi hikiwile swinene hikwalaho ka swiphiqo swa timali na rihanyo endyangwini, ndza tsaka hikwalaho ka leswi ndzi kotaka ku swi endla. Ndzi titwa ndzi tsaka swinene evutirhelini loko ndzi ringeta ku pfumelela rirhandzu ri va rona leri ndzi susumetaka.”—D. M.

“Ndza ha ku heta ku hlaya xihloko lexi nge ‘Mi Hlawulekile eMahlweni Ka Xikwembu!’ Loko ndzi ri karhi ndzi hlaya ndzimana yin’wana ni yin’wana a ndzi khapakhapisa mihloti. Ndzi kulele emutini lowu a wu nga ri na rirhandzu. A ndzi tekeriwa hansi, ndzi vungunyiwa ni ku hlekiwa. Hikwalaho ke, ku sukela evuhlangini ndzi titwe ndzi nga pfuni nchumu. Ndza ha ri na mintlhaveko leyi simekiweke khale loko ndzi tshikileleka hi nkarhi wa maxangu. Loko ndzi ta va ndzi yimisiwe ku tirha tanihi nkulu wa vandlha, ndzi titwe ndzi ri mutsandzeki—eka Xikwembu, eka ndyangu wa mina, ni le ka vamakwerhu evandlheni. Mintlhaveko leyi a yi suki hi ku olova, kambe xihloko lexi, lexi nga enkarhini xi ndzi pfunile leswaku ndzi tlhela ndzi swi kota ku ringanisela. Xi voninge malangutelo ya mina.”—D. L.

“Ndzi nkhensa xihloko lexi nge ‘Mi Hlawulekile eMahlweni Ka Xikwembu!’ Ndzi lwisana hi matimba ni ku nga tirhandzi ni mintlhaveko leyi enteke ya ku titwa ndzi nga pfuni nchumu, leyi nga mila ku sukela eku xanisiweni ka le vuhlangini. Kahle-kahle swi fanerile ku xiya mianakanyo leyi yo homboloka tanihi mano ya Sathana. Yi nga herisa ku navela ka munhu ku hanya. Entiyisweni siku na siku ndzi boheka ku lwisana ni mavunwa ya leswaku a ndzi rhandziwi. Xihloko lexi xi vula swo tala eka mina ku tlula leswi u nga anakanyaka ha swona.”—C. F.

“Ngopfu-ngopfu vamakwerhu namuntlha va tsakela ku tiva leswaku Yehovha u tlangela mintirho leyi susumetiwaka hi rirhandzu ematshan’wini yo sindzisiwa kumbe ku tshikileriwa. Ku xiya vumunhu bya Yehovha lebyi kufumetaka ni lebyi rhandzekaka, ni ku tsakela ka yena vanhu vakwe ha un’we-un’we, ni mukhuva lowu rhandzekaka lowu a wu kombisaka swa phyuphyisa ni ku khutaza. Emhakeni leyi, hi ku hatlisa endzhaku ka loko hi kume xihloko lexi nge ‘Mi Hlawulekile eMahlweni Ka Xikwembu!’ vo tala va phofule ku tlangela ka vona. Eka vo tala swi vonaka ku ri ku pfuleka ka ndlela yo antswisa swinene vuxaka bya munhu hi xiyexe na Yehovha. Mina ni nsati wa mina hi tsakela ku phofula ku tlangela ndlela leyi mhaka yi andlariweke ha yona eka timagazini ta sweswinyana ta Xihondzo xo Rindza, ni ndlela leyi swilaveko ni mintlhaveko ya van’wana swi xiximiwaka ha yona. Hi tikarhatela ku tirhisa tinhla to tala loko hi ri karhi hi endzela mavandlha.”—Yi huma eka mulanguteri la famba-fambaka.

“Ndzi ve muhlayi wo tshembeka kwalomu ka 30 wa malembe, a ndzi si tshama ndzi hlaya nchumu lowu khutazaka, lowu phyuphyisaka swonghasi. Ku tirhisiwa loku nga ni matimba ka matsalwa, hi ndlela ya vutshila swi ndzi pfune ku tsuvula mavunwa lama a ma ri emintlhavekweni ya mina, ndzi titshinete ekusuhi na Yehovha. Hi malembe yo tala ndzi tirhele Yehovha ndzi ri karhi ndzi tivona nandzu. Ndzi wu twisise kahle nkutsulo ni rirhandzu ra Xikwembu. Ndzi nkhensa swihloko swo tano leswi nyikaka vutlharhi leswi anakanyeriweke kahle. Ndza tshemba leswaku ndza ha ta hlaya swo tala leswi fanaka na swona.”—M. S.

“Emalembeni ya mina hinkwawo ya 29 ndzi ri entiyisweni, a ndzi tsundzuki ku ve ni xihloko lexi ndzi vangeleke ku va ndzi nkhensa hi ndlela leyi ni ku va ni nsusumeto lowu enteke. Hambi leswi ndzi wundliweke hi rirhandzu lerikulu endyangwini lowu khathalelaka, a ndzi nga si tshama ndzi twa ntikelo wa ku hanya, ndzi nga ha vuli ntikelo wa ku tirhela Yehovha. Endzhaku ko hlaya xihloko lexi, ndzi nkhinsame hansi hi matsolo, ndzi ri karhi ndzi khavaxela mihloti ndzi nkhensa Yehovha. Ndzi ta tlangela xihloko lexi hi laha ku nga heriki. A ndzi nge he tilanguti hi ndlela leyi a ndzi anakanya ha yona eku sunguleni hikuva se ndza swi tiva leswaku ndzi wa risima eka Yehovha.”—D. B.