Xana Rito “Mukreste” Ri Lahlekeriwa Hi Nhlamuselo Ya Rona?
XANA swi vula yini ku va Mukreste? A wu ta hlamula njhani? Vanhu vo karhi lava hlawuriweke va le matikweni yo hambana-hambana va vutisiwe xivutiso xexo, naswona hi leti tinhlamulo ta vona:
“Swi vula ku landzela Yesu ni ku n’wi tekelela.”
“Swi vula ku va munhu lonene ni ku avelana swilo ni van’wana.”
“Swi vula ku amukela Kreste tanihi Hosi ni Muponisi.”
“Swi vula ku ya eka Masa, ku phata Rhosari ni ku dya Xilalelo xo Kwetsima.”
“A ndzi kholwi leswaku loko u ta va Mukreste u fanele u ya ekerekeni.”
Hambi ku ri swihlamusela-marito swi nyikela tinhlamuselo to tala leti rharhanganeke. Kahle-kahle, buku yin’wana yi ni tinhlamuselo ta khume ehansi ka rito leri nge “Mukreste,” leti sukelaka eka leyi nge “ku pfumela kumbe ku va xirho xa vukhongeri bya Yesu Kreste” ku ya eka leyi nge “munhu wo xiximeka kumbe la amukelekaka.” A swi hlamarisi leswi vo tala swi va tikelaka ku hlamusela leswi ku va Mukreste swi vulaka swona.
Mboyamelo Wa Ku Pfumelela Xin’wana Ni Xin’wana
Namuntlha exikarhi ka lava va tivulaka Vakreste—hambi ku ri lava nghenaka kereke yin’we—u nga kuma mavonelo yo hambana-hambana swinene eka timhaka to tanihi ku huhuteriwa ka Bibele hi Xikwembu, dyondzo ya hundzuluko, ku katseka ka kereke eka tipolitiki ni ku byela van’wana leswi u swi pfumelaka. Timhaka ta mahanyelo to tanihi ku humesa khwiri, vusodoma ni ta mimpatswa leyi tshamaka swin’we kambe yi nga tekananga, hi xitalo ti pfuxa njhekanjhekisano. Mboyamelo lowu nga kona i ku pfumelela xin’wana ni xin’wana.
Hi xikombiso, phepha-hungu leri nge Christian Century ri vika leswaku huvo yin’wana ya kereke ya Protestente ya ha ku hlawula ku seketela mfanelo ya kereke “yo hlawula wanuna loyi swi tiviwaka leswaku i musodoma leswaku a va murhangeri wa huvo ya yona.” Vafundhisi van’wana va kale va nyikela ni mavonelo ya leswaku ku pfumela eka Yesu a hi swa nkoka lowu nga endlaka leswaku u ponisiwa. Xiviko xa The New York Times xi ri, va kholwa leswaku Vayuda, Mamoslem ni van’wana “va nga nghena etilweni [ku fana ni Vakreste].”
Ehleketa hi Mumarxist la hlohlotelaka vukhepitali kumbe museketeri wa mfumo wa xidemokrati lexi hlohlotelaka leswaku ku va ni vulawuri bya tihanyi kumbe mutivi wa ta mbango la seketelaka ku herisiwa ka makhwati. U nga ha vula leswaku “munhu yoloye a hi Mumarxist kumbe museketeri wa mfumo wa xidemokrati kumbe la khathalaka hi mbango,”—naswona u ta va u vurisa. Kambe loko u languta ku hambana ka mavonelo ya lava va tivulaka Vakreste namuntlha, u vona tidyondzo leti hambaneke swinene naswona hakanyingi leti kanetanaka ni leswi Musunguri wa Vukreste, Yesu Kreste a swi dyondziseke. Xana sweswo swi vula yini hi ku tivula ka vona Vakreste?—1 Vakorinto 1:10.
Ku navela ku cinca tidyondzo ta Vukreste leswaku ti pfumelelana ni swiyimo swa nkarhi wo karhi i nchumu wa khale, hilaha hi nga ta swi vona hakona. Xana Xikwembu na Yesu Kreste va titwa njhani hi ku cinca ka muxaka lowu? Xana tikereke leti sekelaka tidyondzo leti nga sekeriwangiki eka Kreste ti nga tivula hilaha ku faneleke leswaku i Vakreste? Swivutiso leswi swi ta kambisisiwa exihlokweni lexi landzelaka.