Xiviko Xa Vahuweleri Va Mfumo
Vanhu Lava Rhandzaka Yehovha I Va Risima Eka Yena
KU SUKELA eminkarhini ya Bibele, Lebanoni a ri dume hi swilo swa ntumbuluko leswi a swi kumeka eka rona. (Pisalema 72:16; Esaya 60:13) Lexi a xi rhandziwa ngopfu eka rona a ku ri mikedari leyikulu, leyi a yi laviwa ngopfu leswaku ku ta akiwa hi yona hikwalaho ka ku saseka ka yona, nun’hwelo ni ku tiya ka yona. Eka lembe-xidzana ro sungula, ku endleke xiendlakalo xin’wana xa nkoka swinene eLebanoni. Evhangheli ya Marka yi vika leswaku endhawini leyi khale a yi ri ya Lebanoni, ku nga Tiri na Sidoni, “vunyingi lebyikulu . . . loko byi twa hi swilo swo tala leswi [Yesu] a a swi endla, byi [ye] eka yena.”—Marka 3:8.
Hilaha ku fanaka ni namuntlha, Lebanoni ri ya emahlweni ri veka mihandzu leyi nga ya risima swinene ematihlweni ya Yehovha. Ntokoto lowu landzelaka wu kandziyisa mhaka leyi.
• Wissam, Mbhoni leyi ya ha riki muntshwa, u komberiwe ku va ni bulo ra 30 wa timinete ni vana va tlilasi lava a nghenaka na vona xikolo. Wissam u endle xiboho xa leswaku lowu wu ta va nkarhi lowunene wa ku nyikela vumbhoni. Hiloko a tirhisa buku leyi nge Life—How Did It Get Here? By Evolution or by Creation? kutani a lunghiselela ku vulavula hi mhaka leyi khumbaka ntumbuluko. Kambe, loko mudyondzisi wa Wissam a vone rungula leri a ri lunghiseleleke, u vule leswaku leswi ri nga ra nkoka swinene, Wissam a nga ri nyikela hi 45 wa timinete.
Loko Wissam a sungula ku vulavula, mudyondzisi wakwe u n’wi kavanyetile kutani a rhuma un’wana ku ya vitana nhloko ya xikolo. Nhloko ya xikolo yi fike hi ku tsopeta ka tihlo, kutani Wissam a tlhela a sungula bulo rakwe. Loko nhloko ya xikolo yi ri karhi yi yingisele swivutiso leswi Wissam a swi vutiseke eku sunguleni ka bulo rakwe, yi nyanyukile ivi yi vula leswaku swichudeni hinkwaswo swi fanele ku endleriwa tikopi ta bulo rero.
Endzhakunyana, mudyondzisi un’wana, loyi a a tihundzela kwalaho, u xiye nyanyuko lowu a wu ri kona etlilasini ivi a vutisa leswaku a ku endleka yini. Loko va n’wi byele leswi endlekaka, u lave ku tiva leswaku Wissam u ringeta ku seketela mhaka ya ntumbuluko kumbe ya hundzuluko. Va n’wi hlamule va ku, ya “ntumbuluko.” Loko mudyondzisi loyi a byeriwe leswaku Wissam i Mbhoni ya Yehovha, u byele vana va tlilasi a ku: “Bulo rakwe ri swi veka erivaleni leswaku sayense a yi seketeri hundzuluko kambe yi seketela ntumbuluko.”
Ku kumeke leswaku mudyondzisi loyi a a ri ni kopi ya buku leyi nge Creation, naswona a a yi tirhisa ku dyondzisa ha yona eyunivhesiti! A nga si famba, u kombele ku tisa swichudeni swakwe hi siku leri tlhandlamaka leswaku Wissam a ta bula na swona. Sweswo swi endle leswaku ku nyikeriwa vumbhoni byin’wana lebyinene ha Yehovha.
• Nina wa malembe ya 22 hi vukhale a a ri ni torha ra mati ya ntiyiso. Siku rin’wana muzala wakwe u n’wi nyike Bibele kutani a n’wi yisa eKerekeni ya Pentekosta. Nina u tsakele ku hlaya Bibele kutani a dyondza leswaku Vakreste va fanele ku chumayela, hiloko a sungula ku chumayela vanghana vakwe. Hinkwavo lava a vulavuleke na vona va n’wi vutise va ku: “Xana u Mbhoni ya Yehovha?” Sweswo swi n’wi hlamarisile.
Endzhaku ka malembe ya tsevu, Timbhoni ta Yehovha ti endzele kaya ra ka va Nina ivi ti n’wi byela hi Mfumo wa Xikwembu. Eku sunguleni, u ringete ku xopaxopa swihoxo etidyondzweni ta tona. Kambe, u kume leswaku tinhlamulo ta tona hinkwato a ti twala naswona a ti sekeriwe eBibeleni.
Leswi Nina a swi dyondzeke eku heteleleni—ku nga vito ra Xikwembu, Yehovha; mikateko leyi nga ta tisiwa hi Mfumo; ni swin’wana—swi n’wi khorwisile leswaku u kume ntiyiso. U nyiketele vutomi byakwe eka Xikwembu kutani a khuvuriwa. Nina se u ni malembe ya nkombo a ri muvuri wa evhangheli wa nkarhi hinkwawo. Kunene, Yehovha u katekisa lava va n’wi rhandzaka hi mbilu hinkwayo.—1 Vakorinto 2:9.