Mimpimanyeto Ya Mahanyelo Ya Hohloka

“SWILO swa muxaka lowu a swi nga tali ku humelela,” marito wolawo ma vuriwe hi Helmut Schmidt, khale ka holobye wa le Jarimani. A ririsa hi milandzu leyikulu ya sweswinyana ya ku pfumala ku tshembeka ka vatirhela-mfumo leyi nga eka tluka ro sungula ra maphepha-hungu. U te: “Mimpimanyeto ya mahanyelo yi hohlokile hikwalaho ka makwanga.”

Vo tala va nga pfumelelana na yena. Mimpimanyeto ya mahanyelo leyi sekeriweke eRitweni ra Xikwembu ku nga Bibele, leyi ku sukela khale a yi amukeriwa hi vo tala tanihi xikongomiso xa leswi lulameke ni leswo biha ya bakanyiwa. Xiyimo xi tano ni le matikweni lawa ma tivulaka ya Vukreste.

Xana Mahanyelo Lamanene Lama Bumabumeriwaka Hi Bibele I Ya Nkoka?

Mahanyelo lamanene lama sekeriweke eka leswi dyondzisiwaka eBibeleni ma katsa ku tshembeka. Kambe, vuxisi ni vukanganyisi swi tele hinkwako. The Times ya le London yi vika leswaku mafokisi man’wana “ma hehliwe hi ku yiva kwalomu ka tipondho ta 100 000 [R1 000 000] hi nkarhi wun’we hi ku teka swidzidzirisi leswi tekeriweke vanhu ivi ma swi nyika makhamba leswaku ma swi xavisa kumbe ma herisa vuthala hi ku tirhisa makhamba lama hlelekeke.” Le Austria ku vuriwa leswaku

vukanganyisi bya ndzindza-khombo i tshamelo-maxelo. Naswona eJarimani vativi va sayense a va tsemeke nhlana loko sweswinyana vakambisisi va kume “byin’wana bya vukanganyisi lebyikulu lebyi tsemaka nhlana eka sayense ya le Jarimani.” Profesa la nga “nghwazi exikarhi ka vativi va swa xitekela eJarimani,” u hehliwe hi leswaku u endle vuxisi kumbe u tisungulele mahlayelo lama hangalakeke swinene malunghana ni vukamberi.

Mahanyelo lama sekeriweke eBibeleni nakambe ma katsa ku tshembeka evukatini, lebyi sunguriweke leswaku byi va vuxaka lebyi nga bya hilaha ku nga heriki. Kambe mimpatswa yo tala yi hetelela ehubyeni yo thalana. Phepha-hungu ra Makhatoliki ra Christ in der Gegenwart (The Contemporary Christian) ri ri “hambi ku ri eSwitzerland ya ‘khale’ vatekani vo tala va thalana.” Le Netherlands, 33 wa tiphesente ta vatekani ti hetelela hi ku dlaya vukati. Wansati la xiyeke ku cinca ka mahanyelo le Jarimani emalembeni ma nga ri mangani lama hundzeke u tsale leswi n’wi karhataka: “Vukati byi tekiwa byi ri nchumu wa xikhale naswona byi ri lebyi hundzeriweke hi nkarhi. Vanhu a va ha tekani leswaku va tshama swin’we vutomi hinkwabyo.”

Hi hala tlhelo, timiliyoni ti teka mimpimanyeto ya mahanyelo leyi kumekaka eBibeleni yi ri leyi tshembekaka naswona yi ri leyi tirhaka evuton’wini bya manguva lawa. Vatekani lava tshamaka endzilakaneni wa Swiss-German va kume leswaku ku dyondza ku hanya hi ku pfumelelana ni mahanyelo lama bumabumeriwaka hi Bibele swi endle leswaku va tsaka. Hi ku vula ka vona, “ku ni nkongomiso wun’we ntsena malunghana ni timhaka hinkwato ta vutomi. Nkongomiso wolowo i Bibele.”

Xana wena u swi vona njhani? Xana Bibele yi nga tirha tanihi nkongomiso wa risima? Xana mahanyelo lamanene lama sekeriweke eBibeleni ma tirha namuntlha?