Dyondzo Ya Ndyangu Yi Lava Matshalatshala Kambe Ya Vuyerisa
DYONDZO YA NDYANGU i ya nkoka loko vana va fanele va kurisiwa hi “ku tshinya ni nkongomiso wa mianakanyo wa Yehovha.” (Efe. 6:4) Kambe loko u ri mutswari wa swi tiva leswaku vana va phirheka hi ku olova. U nga endla yini leswaku va tshama va ri karhi va tsakela dyondzo ya ndyangu? Xiya leswi vatswari van’wana va swi endleke.
George, wa le California, eU.S.A., u ri: “Loko vana va hina va ha ri vatsongo, mina ni nsati wa mina a hi ringeta ku dyondza hi timhaka to hambana-hambana lerova dyondzo ya ndyangu a yi tshama yi ri yintshwa minkarhi hinkwayo. Minkarhi yin’wana hinkwerhu a hi ambala swiambalo swo fana ni swa vanhu va le Bibeleni ni ku va encenyeta loko hi ri karhi hi hlaya ha vona eka Buku Yanga Ya Timhaka Ta Bibele. Hi endle ni switirhisiwa swa kona—mabanga, tinhonga ta vuhosi, swirhundzu ni swin’wana. Naswona a hi tlanga ntlangu lowu nge ‘hi mina mani’ lowu sekeriweke eBibeleni naswona hi tsale bodo ya ntlangu wa Bibele leyi nga ni swivutiso swo tika ni swo olova. Nakambe a hi endla mintirho yin’wana yo fana ni ku aka ngalava leyi fanaka ni ya Nowa kumbe ku tsala minkarhi leyi swiendlakalo swa le Bibeleni swi endlekeke ha yona. Minkarhi yin’wana a hi mpfampfarhuta vanhu kumbe ku tsala switori swa le Bibeleni. Sweswi hi kunguhata ku tsala mahavelo ya moya lama hlamuseriwaka eka Vaefesa 6:11-17, laha ha un’we wa hina a nga ta hlamusela leswi havelo ha rin’we ri fanekiselaka swona. Maendlelo lawa ma hi pfuna leswaku hi tsakela dyondzo ya hina ya ndyangu.”
Debi, manana un’wana wa le Michigan, eU.S.A., u ri: “Mina ni nuna wa mina a swi hi tikela swinene ku fikelela mbilu ya xinhwanyetana xa hina hi nkarhi lowu a xi ri ni kwalomu ka malembe manharhu. Kutani siku rin’wana loko hi ri eku hlayeni hi rito leri tlakukeke ka mhaka ya Isaka na Raveka eka Buku Yanga Ya Timhaka Ta Bibele, ndzi teke swipopana swimbirhi ivi ndzi sungula ku swi tirhisa ku encenyeta mbulavurisano lowu kumbexana va veke na wona. Xi yingisele hi vurhon’wana. Eka tin’hweti leti landzeleke, swipopana sweswo hi swi tirhisele ku fanekisela vanhu vo tala va le Bibeleni. Loko hi heta ku hlaya mhaka yo karhi, xinhwanyetana xa hina a xi secha yindlu xi lava swo tlanga ha swona kumbe swilo swin’wana leswi xi nga swi tirhisaka ku encenyeta mhaka ya kona. Ndlela leyi a xi secha ha yona a yi fana ni leyi xuma xi laviwaka ha yona. Bokisi ra tintangu ni ntambhu yo tshwuka yo khavisa ha yona a yi fanekisela yindlu ya Rahava ni ntambhu ya ribungu. Nyoka ya thoyi leyi leheke mitara ni hafu leyi a hi yi tsondzela eka nhonga ya nkukulu a yi yi fanekisela kahle nyoka ya koporo leyi nga eka Tinhlayo 21:4-9. Swingolongondzwana leswi a hi swi hoxa enkwameni lowukulu lowu endliweke hi nguvu yo tsindziyela. Lexi hi tsakisaka, xinhwanyetana xa hina a xi tala ku tshama ekamareni ro tshama eka rona kutani xi lava-lava swilo enkwameni lowu nga ni swingolongondzwana swa timhaka ta Bibele. Hakunene a swi hi tsakisa ku xi vona xi encenyeta switori hi ndlela ya xona yo hlawuleka!”
Ku kurisa vana a swi olovi naswona swi teka nkarhi wo tala ku tlula lowu hetiwaka vhiki ni vhiki ku va dyondzisa leswaku va tsakela ku tirhela Yehovha. Kambe dyondzo ya ndyangu yi nga va masungulo ya ndzetelo wun’wana wa moya. A swi kanakanisi leswi swi vuyerisaka ku va ni dyondzo yoleyo.