“Leswi Swi Vula Vutomi Lebyi Nga Heriki”

“Leswi swi vula vutomi lebyi nga heriki, ku nghenisa ka vona vutivi ha wena, Xikwembu xi ri xin’we xa ntiyiso, ni loyi u n’wi rhumeke, Yesu Kreste.”—YOHANE 17:3.

VUTIVI byi nga ponisa vutomi. Loko Nouhou la nga ni tinh’weti ta khume a sungule ku vabya, mana wakwe—loyi a nga muongori wa le Niger—a a tiva leswi a a fanele a swi endla. U sungule ku endla swakunwa leswi endliwaka hi mati lama baseke, munyu ni chukele leswaku a endla miri wa n’wana wakwe wu tshama wu ri ni mati. Hi ku ya hi nhlangano wa Nkwama wa Vana wa Nhlangano wa Matiko (UNICEF) leswi a “hatliseke a teka goza ni leswi a a ri ekusuhi ni ku kuma mpfuno wa swa vutshunguri, n’wana wakwe u hatle a hola.”

Vutivi lebyi nga eBibeleni byi nga tlhela byi ponisa vutomi bya vanhu. Muxe mutsari wo sungula wa Bibele u te: “A hi marito lama nga pfuniki nchumu eka n’wina, kambe ma vula vutomi bya n’wina, naswona hi rito leri, mi nga lehisa masiku ya n’wina.” (Deteronoma 32:47) Xana hakunene Bibele yi nga lehisa masiku ya hina? Xana i vutomi eka hina hi ndlela yihi?

Swihloko leswi hundzeke swa ntlhanu eka nxaxamelo lowu swi kombise leswaku Bibele i buku leyi nga fanisiwiki ni yin’wana hikwalaho ka vuprofeta bya yona lebyi tshembekaka, matimu ni timhaka ta sayense leti pakanisaka, ku pfumelelana ka yona ni nkongomiso wa yona lowu twisisekaka. Leswi swi kombisa leswaku Bibele yi hambanile ni tibuku tin’wana. Kutani loko yi vulavula hi vutomi byo leha—vutomi lebyi nga heriki—xana a swi faneli leswaku wena u yi tekela enhlokweni?

Ha ku khutaza leswaku u dyondza ndlela leyi vutivi lebyi kongomeke bya Bibele byi nga ku pfunaka ha yona leswaku u va ni ku rhula ka mianakanyo sweswi u tlhela u kuma ntsako enkarhini lowu taka. Timbhoni ta Yehovha ti nga swi tsakela ku ku komba ndlela leyi u nga byi kumaka ha yona vutivi byo tano.

[Bokisi/Xifaniso lexi nga eka tluka 9]

Bibele yi tlhela yi hambana ni tibuku tin’wana hileswi ku nga yona ntsena leyi nyikelaka tinhlamulo leti enerisaka ta swivutiso swa nkoka leswi hi nga ha tivutisaka swona swo tanihi leswi nge:

• Ha yini hi ri laha?

• Ha yini ku ri ni ku xaniseka konghasi?

• Xana ku ni ntshembo hi varhandziwa va mina lava feke?

U nga kuma tinhlamulo ta le Bibeleni ta swivutiso leswi eka buku leyi nge Xana Bibele Yi Dyondzisa Yini Hakunene?, leyi kandziyisiweke hi Timbhoni ta Yehovha.