Ku Tlangela Maphayona Ya Hina

1 Vatirhi-kulobye va Mfumo wa Xikwembu va tiyisana. (Vakol. 4:11) Loko hi xiya leswaku ntirho lowukulu wa bandlha ra Vukriste i ku chumayela mahungu lamanene, ku ni swivangelo leswi susumetelaka ku tlangela vatirhi va nkarhi hinkwawo lava nga exikarhi ka hina.—Marka 13:10; Varhoma 16:2; Vafil. 4:3.

HA YINI?

2 Hi ndlela leyi kongomeke, maphayona ma aka bandlha hi ku tirha ni vahuweleri lava nga ni ntokoto wuntsongo eka swivumbeko swo hambana-hambana swa ntirho wo chumayela. Leswi swi katsa ku nyikela vumbhoni hi timagazini, ku lunghiselela ni ku endla maendzo yo vuyela ni ku sungula ku fambisa tidyondzo ta le makaya ta Bibele hi laha ku humelelaka. Tlhandla-kambirhi, maphayona ma nga veka xikombiso hi ku nyikela vumbhoni bya xitshuketa hi xivindzi. Nseketelo wa vona wa malunghiselelo ya ntlawa lowu nyikelaka vumbhoni exikarhi ka vhiki wu va nyika nkarhi lowu va pfulekeleke leswaku va va lava pfunaka eka van’wana. Nhlohlotelo wa vona lowunene ensin’wini wu nga voniwa ngopfu-ngopfu loko maphayona ma seketela ntirho wa nsimu hi mahelo-vhiki, nkarhi lowu vahuweleri van’wana vo tala va kotaka ku hlanganyela ha wona.

3 Maphayona ma pfuna mabandlha leswaku ma hlanganisa nsimu hi rixaladza na hi ku phindha-phindha. Leswi swi pfuna vanhu ku tolovelana ku antswa ni rungula ra hina ni ku titwa va ntshunxekile swinene loko hi va endzela hikuva va swi tiva leswaku hi vamani. Tiawara leto tala leti maphayona ma ti hetaka ensin’wini ma ri karhi ma siya tibuku eka vanhu lava tsakelaka ni ku hlakulela ku tsakela—kahle-kahle, va ri karhi va byala ni ku cheleta timbewu ta ntiyiso—ti nga yisa ntsena eka nsimu leyi tswalaka mihandzu hi xitalo.—1 Vakor. 3:6.

EBANDLHENI

4 Vo tala va khutaziwe ku nghenela ntirho wa nkarhi hinkwawo hikwalaho ka leswi timbilu ta vona ti khumbiweke hi ku chivirika ni ku hiseka ka maphayona lama tshembekaka. Makwerhu un’wana wa xisati a a kanakana ehenhleni ka ku va phayona ra nkarhi hinkwawo hikwalaho ka leswi a ma nga ri kona ebandlheni. Kambe loko a khutaziwe hi mulanguteri wa xifundza, u ye emahlweni kutani a tsarisa. Van’wana va landzerile hi ku hatlisa, naswona bandlha rero sweswi ri ni nhlayo leyi vonakaka ya maphayona lama gingiritekaka.

5 Ku nga ha va ni minkarhi leyi vakulu va nga ta kombela phayona ku pfuna munhu loyi a nga viki kona nkarhi na nkarhi kumbe loyi a holeke. Mpfuno lowu wu nga katsa ku fambisa dyondzo ya Bibele ni munhu wo tano. Ripfumelo ni ku chivirika ka phayona xisweswo swi nga hoxa xandla eku kondleteleni ka rirhandzu ra munhu ra ntiyiso ni ku pfuna ku n’wi pfuxa leswaku a tirhela ku hetisisa mindzhwalo ya ku tinyiketela ka yena.—1 Vates. 5:14.

KHUTAZA MAPHAYONA

6 Maphayona, loko ma ri karhi ma endla leswo tala leswaku ma khutaza van’wana, na wona ma lava xikhutazo leswaku ma hambeta ma tsaka entirhweni wa wona. (Varhoma 1:12) Xana u vulavula hi vutirheli bya vuphayona hi ndlela leyinene? Xana u hetelele rini ku bumabumela phayona hikwalaho ka ntirho wa rona ni moya wa ku tinyikela? Maphayona ngopfu-ngopfu ma tlangela ku va ni un’wana leswaku ma tirha na yena entirhweni wa nsimu eminkarhini ya siku leyi vahuweleri lava nga riki vangani va humeke ha yona. Xana u nga famba ni maphayona ivi kumbexana u heta tiawara leti leheke leswaku u seketela ntirho wo chumayela?

7 Xana u nga khutaza maphayona hi tindlela tihi tin’wana ke? Handle ko bumabumela, u nga phofula ku tlangela ka wena ka vatirhi vo tano lava gingiritekaka hi ndlela leyi xiyekaka hi ku dya na vona swakudya, u va pfuna hi timali ta vona ta ku famba-famba hi ku tirhandzela naswona u va seketela hi tindlela tin’wana hi laha u nga kotaka ha kona.—Ringanisa 1 Vatesalonika 5:12, 13.

8 Loko vakulu ni malandza ya vutirheli va rhangela ebandlheni, maphayona ni vahuweleri va ta nyikela nseketelo lowu taleke eka malunghiselelo lama hleriweke kahle ya ntirho. Hinkwerhu ka hina xisweswo hi ta va hi tirhisa tinyiko tihi na tihi leti hi nga na tona eku ‘tirhelaneni.’—1 Pet. 4:10, 11.