Ku Twarisa Mahungu Lamanene

Hi Timagazini

1 Ku hava timagazini tin’wana ematin’wini leti veke ni vuyelo byo tano bya leswinene evuton’wini bya vanhu ku fana na Xihondzo xo Rindza na Awake! Nkandziyiso wun’wana ni wun’wana wu tele hi swakudya swa moya leswi nyikaka vutomi. Vuyelo bya ndzavisiso lowu enteke lowu nyikeriweke ni nseketelo lowu tiyeke wa Matsalwa swi nghenisa rungula ra ntiyiso emianakanyweni ni le timbilwini ta hina.

2 Xihondzo xo Rindza, ematlukeni ya xona, xi hlamusela tidyondzo ta Bibele ivi xi yisa nyingiso wa hina eku hetisekeni ka vuprofeta bya Bibele. Xi khutaza hinkwavo lava nga ni ndlala hi tlhelo ra moya leswaku va hundzula mianakanyo ya vona ni ku ambala vumunhu lebyintshwa. (Varhoma 12:2; Vaef. 4:22-24) Awake! yi xalamukisa vahlayi va yona eka swiendlakalo leswi nga ni nkoka emisaveni. Swifaniso swa yona leswi hlamarisaka leswi hlamuselaka swihlamariso swa ntumbuluko swi pfuxa ku tsakela misava leyintshwa ni ku kurisa ku tlangela Muvumbi wa rirhandzu.

A TI FANI NI TIMAGAZINI TA MISAVA

3 Timagazini ta misava a ti kombisi vanhu ndlela yo tsakela vutomi lebyi anerisaka emisaveni leyi ha yona. A ti wu nyikeli ntshembo wa vumundzuku naswona ti hluleka ku dyondzisa vanhu ndlela yo kuma vutomi lebyi nga heriki ha yona. Timagazini teto ta misava ti kunguhateriwe ku tlakusa swilo swa misava. Vona ku hambana konghasi ni Xihondzo xo Rindza ni Awake!—1 Yoh. 2:15-17.

4 A swi kanakanisi leswaku wena hi wexe u titwa u ri ni ku tlangela lokukulu ka nkandziyiso wun’wana ni wun’wana wa Xihondzo xo Rindza ni Awake!—timagazini leti nga ni ku nun’hwela loko nandziha ka ntiyiso lowu humaka eka “mulanguteri lowo tshembeka.” (Luka 12:42) Xana hi nga endla yini leswaku hi antswisa ku fambisa ka hina ka timagazini ivi xisweswo hi pfuna lava engetelekeke leswaku va pfuneka hi timagazini ta hina?

KU ENDLA XIYENGE XA HINA

5 Hi nga si kota ku khutaza khwatsi vanhu va timbilu leti tshembekaka leswaku va hlaya timagazini ta hina, hi fanele ku tiva leswi magazini wun’wana ni wun’wana wu swi khomeke. Leswi swi lava leswaku hina hi hlaya nkandziyiso wun’wana ni wun’wana hi nga si wu tirhisa evutirhelini. Hi ku tolovelana khwatsi ni leswi wu swi khomeke, hi nga tirhisa tindlela ta vutirheli bya yindlu na yindlu, ntirho wa le xitarateni ni ku nyikela vumbhoni bya xitshuketa leswaku hi hangalasa timagazini.

6 Nakambe, hi ku va ni timagazini ta sweswinyana loko hi ya eku xaveni, hi khandziya vutleketli bya mani na mani, exikolweni, exivandleni xa hina xa ntirho kumbe kwihi na kwihi laha hi yaka kona, hi ta swi kota ku tirhisa minkarhi leyi hi pfulekeleke leyi fanelaka yo nyikela vumbhoni. Xingheniso lexi hlawuriweke khwatsi lexi humaka ebukwini leyi nge Reasoning lexi fambisanaka ni yinhla leyi humaka eka xin’wana xa swihloko xi nga pfuxa ku navela ka munhu ka ku hlaya timagazini ta hina.

7 Hambi loko mabulo ya hina ma nga ha va lama komeke loko hi nyikela timagazini, a hi fanelanga ku hikela bulo ra hina eka minete yin’we ntsena kumbe ku tlulanyana kwalaho. Hi lava ku teka nkarhi leswaku hi vona loko munhu a tsakela rungula hakunene ni loko a ta hlaya magazini. Loko swivutiso swi tlakuka, minkarhi hinkwayo hi fanele ku ringeta ku hlamula swivutiso hi ku tirhisa Bibele ya hina kumbe buku leyi nge Reasoning hi xitalo. Hi ku tilulamisela ku lwela vupfumeri bya hina, hi nga tshovela mikateko leyi hlamarisaka.—1 Pet. 3:15.

8 Loko munhu a pfumela ku hlaya timagazini, hi nga vulavula ehenhleni ka muxaka wa ntirho wa hina ni ndlela leyi timagazini leti ti humesiwaka ha yona kambirhi hi n’hweti tanihi xiyenge xa ntirho wa misava hinkwayo wa dyondzo ya Bibele. Rungula leri nga eka tluka 2 ra Xihondzo xo Rindza kumbe tluka 4 ra Awake! ri hlamusela leswi hi ndlela leyinene. Tanihi leswi timhaka leti khomiweke hi nkandziyiso lowu landzelaka ti xaxametiwaka nkarhi na nkarhi, hi nga kambisisa swivutiso leswi yelanaka ka ha ri emahlweni kumbe hi yisa nyingiso eka swihloko leswi taka. Leswi swi nga pfuxa ku navela ka munhu ivi swi n’wi susumetela ku phofula ku navela ku kuma nkandziyiso wolowo loko wu huma. Leswi ku nga va ku sungula ka ntila wa timagazini.

9 Tanihi leswi makumu ya mafambiselo lawa ma tshinelaka, onge hi nga hatlisisa goza ra hina leswaku hi pfuna vanhu va timbilu leti tshembekaka ku baleka eka Babilona Lonkulu ivi va ta entiyisweni. (Nhlav. 18:4) Xihondzo xo Rindza na Awake! swi teka xiyenge xa matimba entirhweni wa hina wa misava hinkwayo wa dyondzo ya Bibele. Ha nkhensa leswi Yehova a ti lunghiseleleke leswaku hi ti tirhisa evutirhelini. Onge Yehova a nga hambeta a katekisa ku tirhisa ka hina ka rixaladza ni loku nga ni matimba ka timagazini leti!