Ku Dzunisa Yehova Hi Risimu
1 Hi kombela u pfula risimu ra wena endzhaku eka tluka ro hetelela. U vona yini? Ntlawa wa vayimbeleri va Valevhi etempeleni yo kwetsima ya Yehova, va ahlamise milomu ya vona swinene, va yimbelela hi ku hiseka. Vuyimbeleri a ku ri xivumbeko xa nkoka xa vugandzeri bya ntiyiso etempeleni ya Yehova. Hi nkarhi wa Hosi Davhida, ku tlula 10 wa tiphesente ta lava tirhaka etempeleni a va averiwe ku dzunisa Yehova hi vuyimbeleri. Naswona eka nhlayo yoleyo, 288 a ku ri vayimbeleri lava leteriweke, ‘hinkwavo va ri na vutivi.’ U nga tiyiseka leswaku ku yimbelela ka vona va ku teke ku ri ka nkoka.—1 Tikr. 23:3, 5; 25:7.
2 Loko hi ta eka minkarhi ya Vukriste, hi twa leswaku Yesu ni vaapostola va yena va yimbelele risimu eku heleni ka Xilalelo xa Hosi. (Marka 14:26) Naswona muapostola Pawulo hi ku phindha-phindha u hi byela ku yimbelelela Xikwembu xa hina tinsimu. Eka Vakolosa 3:16 u tsarile: “Rito ra Kriste a ri tshame ka n’wina, ri andza. Dyondzisanani, mi khongotelana hi vutlhari hinkwabyo, mi twarisa Xikwembu hi ku yimbelela tipisalema, ni tinsimu, ni ku yimbelela swa Moya, mi ri karhi mi nkhensa etimbilwini ta n’wina [eka Yehova].”—Nakambe vona Vaefesa 5:19, 20.
3 Ku yimbelela tinsimu ta Mfumo hi yin’wana ya tindlela leti hi dzunisaka Yehova ha tona. Eka Vutirheli Bya Hina Bya Mfumo bya February 1990, xikhutazo xi nyikeriwile leswaku hi antswisa ku yimbelela ka hina. Swiviko swi komba leswaku mabandlha yo tala ma landzelele xiringanyeto xa ku va ni nongonoko wo yimbelela tinsimu endzhaku ka dyondzo ya Xihondzo xo Rindza. Leswi swi vange vuyimbeleri lebyi antswisiweke eka mintsombano yin’wana ya hina ya muganga. Hambi swi ri tano, u ta pfumela leswaku ka ha ri na nkarhi wo tala wo endla nhluvuko. Ku nga endliwa yini leswi engetelekeke ku antswisa ku yimbelela ka hina?
4 Hi bumabumela leswaku mabandlha hinkwawo ma hlela nongonoko wa ku titoloveta endzhaku ka dyondzo ya Xihondzo xo Rindza. Lava va bohekaka ku huma va nga ntshunxiwa naswona van’wana va nga hlanganyela eku yimbeleleni ka risimu rin’we kumbe timbirhi. Nkulu kumbe nandza wa vutirheli la nga ni vutihlamuleri u fanele ku langutela nongonoko lowu wa ku yimbelela tinsimu. Loko nongonoko lowu wu sunguriwa endzhakunyana ka dyondzo ya Xihondzo xo Rindza, swi ta hi tekela timinete ti nga ri tingani ntsena vhiki na vhiki. Lunghiselelo leri ri nga ya emahlweni ku kondza un’wana ni un’wana a tolovelana ni tinsimu.
5 Mabandlha lama yimbelelaka ma nga fambisani na vuyimbeleri lebyi rhekhodiweke ma khutaziwa ku tirhisa tirhekhodi kumbe tikhasete ta Sosayiti. Leswi swi ta pfuna hina hinkwerhu leswaku hi tolovelana ni rivilo lerinene ni miloti ya tinsimu ta hina. Loko u swi kuma swi nonon’hwa ku yimbelela hi tikhasete kumbe tirhekhodi, hambeta u titoloveta ku kondza u ti tiva kahle. Hi ndlela leyi hinkwerhu hi ta kota ku yimbelela hi ku twanana ni vamakwerhu hinkwavo emisaveni hinkwayo. Vakulu va khutaziwa ku seketela lunghiselelo leri hi xitalo.
6 Loko hi yimbelela hi timbilu ta hina hinkwato hi yisa ku dzuneka eka Yehova. U yingisela tinsimu leti yisiwaka eka yena hi laha a endlaka ha kona eka swikhongelo swa hina. Loko hi yimbelela hakunene, hi nga tisa ntsako ni le ka van’wana, naswona hina ha vuyeriwa.
7 Ehleketisisa hi marito yo saseka ya tinsimu ta hina. Leswi hakunene i mpfuno ehenhleni ka ‘ku dyondzisana ni ku khongotelana’ ka hina. Mawaku ndzayo leyinene swonghasi leyi tinsimu ta hina ti nga na yona! Hi ku tekela ndzayo yoleyo enhlokweni, hi nga pfuneka ku hlakulela mihandzu ya moya ni ku tivonelo ehenhleni ka ku ngheniwa hi minkucetelo ya nyama, ya misava. ‘Ku yimbelela swi suka etimbilwini ta hina’ swi hi khutaza ku tirhela Yehova hi xivindzi na hi ntsako.
8 Leswaku ku yimbelela ku va ni masungulo lamanene eminhlanganweni, mutshami wa xitulu a nge tivisi nomboro ya risimu ntsena kambe ni nhloko-mhaka kumbe vito. Nkarhi wun’wana a nga ha languta xisekelo xa Matsalwa xa risimu ivi a hlamusela hi ku komisa ndlela leyi ri fanelanaka ha yona ni rungula leri nyikeriwaka.
9 Hi ku phindha-phindha Matsalwa ma hi tsundzuxa hi ndzhwalo wa ku dzunisa Tata wa hina wa le tilweni la rhandzekaka hi risimu. A hi endleni tano hi moya-xiviri hinkwawo. Hikwalaho hi nga nyikela vumbhoni lebyi tsakisaka eka muendzi loyi a nge xikarhi ka hina. Ina, a hi yimbeleleni ni ku endlela Yehova miloti, hi laha Davhida wa khale a endleke ha kona.—Ps. 108:1-3.