Bokisi Ra Swivutiso

◼ Xana ku ta va ku nga ri ku nyikela kambirhi loko hi hoxa munyikelo endzhaku ko teka tibuku kutani hi tlhela hi hoxa munyikelo lowu hi wu kumeke ensin’wini, emabokisini ya ntirho wa Sosayiti wa misava hinkwayo?

Doo! Minyikelo leyi hoxiwaka emabokisini ya minyikelo ya ntirho wa Sosayiti wa misava hinkwayo a hi ya tibuku ntsena. Vahuweleri swin’we ni vanhu lava kombisaka ku tsakela ka xiviri ensin’wini va kuma tibuku handle ko hakerisiwa. Minyikelo leyi humesiwaka hi vahuweleri i ya ku seketela tihofisi ta marhavi, makaya ya Bethele, swikolo swa vurhumiwa ni swa vutirheli, varhumiwa, valanguteri lava famba-fambaka, vuhlayiselo bya tibuku ni mintirho yin’wana yo tala leyi lavekaka leswaku xiavelo lexi Yesu a xi nyikeke vadyondzisiwa vakwe xi hetiseka. Ku kandziyisiwa ka tibuku ko va xiphemunyana xa xiavelo lexi.

Hikwalaho, loko hi amukela minyikelo eka vanhu lava tsakelaka ensin’wini, a hi fanelanga hi va byela leswaku munyikelo wolowo i wa “tibuku.” Hilaha hi va hlamuselaka hakona, lava va swi tsakelaka hakunene ku hlaya tibuku ta hina va nga ti kuma handle ko hakerisiwa mali yo karhi. Munyikelo wun’wana ni wun’wana lowu va wu humesaka wu ta tirhisiwa ku seketela ntirho wa misava hinkwayo. Swi tano ni hi minyikelo leyi humesiwaka hi vahuweleri.

Hikwalaho a xi kona xivangelo xa leswaku vahuweleri va nga wu kombeli munyikelo wa ntirho wa misava hinkwayo, hi ku ehleketa leswaku ana se va wu humesile munyikelo wa tibuku toleto.