Ku Amukela, Ku Tirhisa Ni Ku Pfuneka eRitweni Ra Xikwembu

¹ Hambi leswi timiliyoni ta vanhu ti nga ni kopi ya Bibele, vo tala a va pfumeli leswaku i Rito ra Xikwembu, vo tala a va xi tirhisi xitsundzuxo xa yona xa vutlhari, xisweswo a hi vangani lava yi va pfunaka. Hambi swi ri tano, vanhu va Yehova va pfumela leswaku hakunene i Rito ra Xikwembu ni leswaku ra pfuna eka swilo hinkwaswo. (2 Tim. 3:16, 17) Hikwalaho, nhloko-mhaka ya nongonoko wa nhlengeletano ya xifundza ya lembe ra ntirho ra 1993 yi ta va leyi nge, “Ku Amukela, Ku Tirhisa Ni Ku Pfuneka eRitweni Ra Xikwembu.”

² Ku ta va ni tinkulumo, minkombiso, swikece, mintokoto ni mimbulavurisano leyi nga ta hi khutaza leswaku hi entisa ku tlangela ka hina Rito ra Xikwembu ni ku hi pfuna ku ri tirhisa hi xitalo eka swivumbeko hinkwaswo swa vutomi. Nongonoko wa Mugqivela ni ndzhenga wu ta vulavula hi xitsundzuxo ni ndzayo endyangwini malunghana ni vuhungasi, vunghana ni swilo leswi vonakaka. Wu ta komba ndlela leyi ha yona hi faneleke hi hambana ni misava ni leswaku hi nga teki mikhuva ya yona yo biha ni ririmi ro bola kumbe leri thyakeke. Tlhandla-kambirhi, ku ta nyikeriwa xikhutazo xo pfuna vatswari lava nga voxe ni vana lava nga riki na vatatana.

³ Nakambe, hi Mugqivela vanhu lava ha ku tinyikelaka va ta kuma nkarhi wo khuvuriwa endzhaku ko yingisela nkulumo ya Matsalwa mayelana ni mhaka leyi. Lava kunguhataka ku khuvuriwa enhlengeletanweni ya xifundza va fanele va vula ku tsakela ka vona hi xihatla eka mulanguteri la ungamelaka wa bandlha leswaku a va ni nkarhi lowu eneleke wo hlela leswaku vakulu va kambisisa swivutiso swa lava yaka eku khuvuriweni.

⁴ Nongonoko wa Sonto ni mixo wu ta kambisisa tindlela leti hi tihambanisaka ni misava ha tona hi ku namarhela Rito ra Xikwembu. Nkoka wa ku languteka ka hina ni ndlela yo papalata ku thyakisa mianakanyo ya hina, i tin’wana ta timhaka leti nga ta kambisisiwa. Ni ndzhenga, mulanguteri wa muganga u ta nyikela nkulumo ya le rivaleni leyi nge “I Yini Lexi Kombisaka Bibele Yi Ri Ya Ntiyiso?” Hi fanele hi tiyiseka leswaku hi rhamba hinkwavo vanhu lava tsakelaka va ta eka nongonoko lowu lowunene.

⁵ Masiku ni ndhawu ya nhlengeletano leyi ya xifundza swi ta nyikiwa hi mulanguteri wa n’wina wa xifundza, naswona hi mi khutaza hinkwenu ku va kona leswaku mi amukela, mi tirhisa ni ku pfuneka eka xitsundzuxo xa Rito ra Xikwembu.—Yak. 1:22-25.