Ku Tirha Nsimu Leyi Hlanganisiwaka Nkarhi Na Nkarhi
1 Ha tsaka ku amukela swiviko leswi vulaka leswaku mavandlha yo tala ma tirha nsimu ya wona nkarhi na nkarhi. (Mt. 24:14; 1 Tim. 2:3, 4) Hambi loko leswi swi tisa ntlhontlho lowukulu, ntokoto wu kombise leswaku hi nga hlangavetana na wona hi laha ku humelelaka loko hi lunghiselele kahle naswona hi lunghekele ku langutana ni swiyimo swo hambana-hambana leswi nga humelelaka.
2 Swingheniso Leswi Humelelaka I Xilotlelo: I swa nkoka ngopfu ku lunghekela ku tirhisa xingheniso xin’we kumbe swo tala leswi hi ehleketisiseke kahle ha swona. Swi fanele swi katsa ni tinhlamuselo leti twalaka leti hlamuselaka kahle swivangelo swa nkoka leswi endlaka leswaku hi endza nkarhi na nkarhi.
3 Buku leyi nge Reasoning yi nyikela swikombiso swo tala leswinene swa swingheniso leswi fanelaka leswi hi nga swi tirhisaka. Swinharhu swi longoloxiwe eka tluka 15 ehansi ka nhloko-mhaka leyi nge “In Territory Often Worked.” Pfuxeta leswi u lavaka ku swi tirhisa ensin’wini ya ka n’wina.
4 Vahuweleri van’wana va humelela loko va tirhisa mhaka leyi humaka eka phepha-hungu ra ndhawu ya ka vona, ku sungula mabulo eka nsimu leyi tirhiwaka nkarhi na nkarhi. Buku leyi nge Reasoning yi nyikela swikombiso swinharhu swa ndlela leyi leswi swi nga endliwaka ha yona. Xiya xingheniso xa vumbirhi ehansi ka nhloko-mhaka leyi nge “Crime/Safety” eka tluka 10 ni swingheniso swimbirhi swo sungula ehansi ka nhloko-mhaka leyi nge “Current Events” eka tluka 10 na 11.
5 Swingheniso Leswi U Swi Lunghiselelaka: Titwe u ntshunxekile ku endla ni ku tirhisa swingheniso leswi faneleke, u swi endla hi ku ya hi leswi nga ebukwini leyi nge Reasoning. Swi vule hi ndlela leyi u vulavulaka ha yona, u tirhisa marito ya wena n’wini. U nga titoloveta swona ni muhuweleri la nga ni ntokoto u nga si swi tirhisa ensin’wini.
6 Hi xikombiso, u nga ha vula swo fana ni leswi:
◼ “Hi mpfhuka ka loko hi ku endzerile enkarhini lowu hundzeke, [boxa xiendlakalo lexa ha ku humelelaka lexi vanhu va kwalaho va vulavulaka ha xona]. Hikwalaho ka leswi hinkwerhu ka hina hi khumbekaka hi tindlela to hambana-hambana, vaakelani va hina vo tala va kombise ku karhateka lokukulu. Kumbexana na wena u ehleketilenyana ha swona. [Miyelanyana u yimela nhlamulo.] Mayelana ni swiyimo swa misava namuntlha, xana a wu nge pfumelelani na leswi muprofeta Yeremiya a swi tsaleke eka ndzima 10, ndzimana 23?” Endzhaku ko hlaya tsalwa, kuma mavonelo ya n’wini wa muti, kutani u n’wi kombisa tsalwa ro karhi leri kombisaka ndlela leyi Yehovha a nga ta xi tlhantlha ha yona xiphiqo lexi mi vulavulaka ha xona.
7 Kumbexana u nga ku:
◼ “Handle ko kanakana u swi twile emahungwini ya namuntlha [vula xiendlakalo xo karhi]. Kumbexana u ta pfumela leswaku leswi swa hi khumba hinkwerhu. [Miyelanyana u yimela nhlamulo.] Hi nga langutela tihulumendhe leswaku ti endla mpfuno wa xinkarhana; hambi swi ri tano, Bibele yi komba ndlela leyi xiphiqo lexi xi nga ta tlhantlhiwa ha yona hi ku helela.” N’wi kombise tsalwa ro karhi leri hlamuselaka leswi Xikwembu xi nga ta swi endla.
8 “Ha Yini Mi Vuya Nkarhi Na Nkarhi?” Tinhlamulo leti fanelaka eka marito lawa ma nga ha kotaka ku siva bulo ti nyikeriwile ebukwini leyi nge Reasoning eka tluka 20 ehansi ka nhloko-mhaka leyi nge “Why Do You People Call So Often?” Hambi loko hi nga vutisiwanga, hi nga nyikela vumbhoni lebyinene loko hi tirhisa nkarhi wun’wana ni wun’wana lowu hi wu kumaka ku pfuna van’wana va xiya leswaku rirhandzu ra hina ra xiviri hi Xikwembu ni vaakelani ri hi susumetela ku va endzela nkarhi na nkarhi hi laha swi kotekaka ha kona. Ku vulavurisana hi marito ya Yesu lama kumekaka eka Yohane 21:15-17 swi nga va mpfuno lowukulu emhakeni leyi.
9 A hi hambeteni hi hlangavetana ni ntlhontlho wa ku tirha nsimu leyi tirhiwaka nkarhi na nkarhi, ku kondza Yehovha a ku swi ringene. Loko hi ri ni ku tiyimisela loku, hi nga tiyiseka leswaku u ta hi kongomisa, a hi hlayisa ni ku hi katekisa ku yisa emakun’wini.—Mt. 28:19, 20.