Ku Va Kona eMinhlanganweni—I Vutihlamuleri Lebyikulu
1 Xana u swi languta swi ri swa nkoka ku fikela kwihi ku va kona eminhlanganweni? Xexo i xivutiso lexi lavaka nhlamulo, xana a swi tano? Handle ko kanakana vo tala va hina hi titwa hi yi tsakela minhlangano. Hambi swi ri tano, swiviko swi komba leswaku nhlayo ya lava va vaka kona eminhlanganweni emavandlheni yo tala yi hungutekile. Xana xivangelo ku nga va ku ri yini? Xana van’wana va hina hi pfumelela ntirho wo tihanyisa lowu nga fanelangiki, ku karhala, ntirho wa le kaya, vuvabyinyana kumbe maxelonyana lama nga tsakisiki ma kavanyeta vutihlamuleri bya hina bya ku va kona eminhlanganweni nkarhi na nkarhi? (Det. 31:12) Tanihi leswi lexi ku nga xilaveko xa Matsalwa, un’wana ni un’wana wa hina u fanele ku anakanyisisa hi xivutiso lexi hi xikhongelo, Xana ndzi swi languta swi ri swa nkoka ku fikela kwihi ku va kona eminhlanganweni?
2 Vamakwerhu va hina van’wana va famba hi milenge tiawara to tala emapatwini ya ritshuri naswona va pela milambu leyi nga ni tingwenya leswaku va va kona emihlanganweni. Evandlheni ra ka n’wina, va nga ha va va ri kona lava tshembekaka, lava nga ‘xwiki’ eminhlanganweni ku nga khathariseki swiphiqo leswikulu swa rihanyo, vugono, ntshikilelo wa mintirho etindhawini leti va thoriweke eka tona kumbe swiavelo swo nonon’hwa exikolweni. (Lk. 2:37) Ha yini va endla matshalatshala ya ku va kona? Hikuva va swi tiva leswaku a va nge swi koti ku hlula swiphiqo swa misava leyi teleke ntshikilelo hi matimba ya vona ntsena. Va fanele va tshemba matimba lawa Xikwembu xi hi nyikaka wona.—2 Kor. 12:9, 10.
3 Namuntlha hi landzela ntila lowu vekiweke hi Vakreste vo sungula, lava a va hlangana nkarhi na nkarhi leswaku va khongela, va rungulelana mintokoto ni ku dyondza Rito ra Xikwembu. (Mint. 4:23-30; 11:4-18; Kol. 4:16) Hi kuma swiletelo mayelana ni vuprofeta ni tidyondzo ta Bibele, ni ku tikhoma loku amukeriwaka hi Xikwembu ni mahanyelo ya Vukreste ni switsundzuxo leswi fikaka hi nkarhi swa ku antswisa vutomi bya hina sweswi hi ku tirhisa milawu ya Matsalwa hi ndlela leyinene. (1 Tim. 4:8) Ku tlula kwalaho, ha tsundzuxiwa hi ku langutela loku hi nga na kona leswaku siku rin’wana ku ta herisiwa swiphiqo ni ku xaniseka. I swa nkoka leswaku hi tshama hi ri ni ku langutela loku.—Hev. 6:19.
4 Xana ndyangu wa wena wu swi languta swi ri swa nkoka ku fikela kwihi ku va kona eminhlanganweni? Xana i xiphemu xa xiyimiso xa n’wina ku fana ni swakudya kumbe ntirho wa ku tihanyisa? Hi masiku yo ya eminhlanganweni, xana mi tikuma mi kanakana leswaku mi fanele mi ya eminhlanganweni kumbe mi nga yi, kumbexana ku hlangana nkarhi na nkarhi ni vamakwenu i tshamela-maxelo endyangwini wa wena? Vahuweleri vo tala va tsundzuka xikombiso xa vatswari va vona lava tinyiketeleke loko va ha kula. Nkulu un’wana u tsundzuka kahle a ku: “Xilo xin’we hi Tatana, hi leswaku a tiyiseka nkarhi hinkwawo leswaku ndyangu wa ya eminhlanganweni. Loko un’wana a vabya, wun’we eka hina a a sala na yena ekaya, kambe lavan’wana hinkwavo a va ya eminhlanganweni!”
5 Eminkandziyisweni leyi landzelaka ya Vutirheli Bya Hina Bya Mfumo, hi ta hlamusela mpfuno wa nhlangano wun’wana ni wun’wana wa vandlha hi xikongomelo xo pfuna ku aka ku tlangeriwa ka malunghiselelo lawa ya moya. Loko ku va kona ka wena eminhlanganweni ku nga hundzuki, ha tshemba leswaku swihloko leswi swi ta ku pfuna u vona leswi u swi kayivelaka. Swi ta katsa ni switsundzuxo leswi pfunaka eka lava va fambisaka minhlangano, ku katsa ni swiringanyeto leswi hinkwerhu ka hina hi nga swi tirhisaka loko hi lunghiselela ni loko hi va ni xiphemu eminhlanganweni. Ha yini mi nga tshami ehansi tanihi ndyangu ivi mi anakanyela ndlela leyi mi hlanganyelaka ha yona eminhlanganweni, hi xikhongelo? Kutani mi lunghisa xiyimiso xa n’wina hi laha ku fanelaka ha kona. Ku tshama hi ri kona eminhlanganweni i xiphemu xa nkoka xa dyondzo ya hina ya swa le tilweni, naswona swi fanele swi langutiwa swi ri swa nkoka hakunene.