Va Pfune Leswaku Va Teka Goza Leri Fambisanaka Ni Rungula Ra Mfumo
1 Ntirho wa hina wo chumayela wu nyika vanhu nkarhi wa ku twa ‘mahungu lamanene ya Mfumo wa Xikwembu.’ (Mt. 24:14) Kambe loko va ta pona ‘nhlomulo lowukulu,’ va fanele va tlhela va teka goza leri fambisanaka na wona naswona va va vadyondzisiwa va Yesu Kreste. (Nhlav. 7:14; Mt. 28:19, 20) Ku khumbeka vutomi! Kutani tiyiseka leswaku wa vuyela eka lava ro sungula va kombiseke ku tsakela eminkandziyisweni leyi u yi tirhiseke n’hweti leyi.
2 Loko u siye buku leyi nge “Vantshwa” u nga ha ku:
◼ “Ndza tsaka ku ku vona nakambe. Enkarhini lowu hundzeke loko hi vulavula, hi vulavule hi swiphiqo leswi vantshwa va langutanaka na swona. Ndzi ku siyele buku leyi hlamulaka swo tala swa swivutiso leswi vantshwa va nga na swona. Loko u ve ni nkarhi wo hlaya buku leyi leyinene, kumbexana u vone switsundzuxo leswi tirhaka ni leswi nga enkarhini leswi yi nga na swona. Ndzi rhandza ku tirhisa timinete ti nga ri tingani leswaku ndzi ku komba vumundzu lebyinene lebyi Xikwembu xi byi tshembisaka.” Kutani pfula matluka 306 na 307, u kombisa tinhla leti faneleke ni matsalwa loko nkarhi wu ri kona. Endla malunghiselelo ya ku tlhela u vuya leswaku mi ta yisa bulo emahlweni.
3 Loko u siye xiphephana lexi nge “Xana Misava Leyi Yi Ta Pona?” eka riendzo ra wena ro sungula, u nga ha vula swo fana ni leswi:
◼ “Ndza tsaka ku ku kuma u ri ekaya namuntlha. Loko ndzi ku endzerile ku nga ri khale, hi vulavule hi swiendlakalo leswi vumbaka xikombiso lexi nga ta humelela ku nga si fika makumu ya misava. [Pfuxeta tinhla leti faneleke ta xikombiso lexi kumekaka eka Matewu 24:3-14.] Xana u xiye xiendlakalo xin’wana lexi xa ha ku humelelaka emisaveni kumbe endhawini ya ka hina lexi u ehleketaka leswaku xi nga va xiphemu xa ku hetiseka ka xikombiso?” N’wi kombe xihloko xa timagazini tin’wana ta sweswinyana, u n’wi byela hi ku hetiseka ka byin’wana bya vuprofeta bya Bibele. Fambisa timagazini timbirhi hi munyikelo wa R1,60. Eku heteleleni ka riendzo ra wena, boxa xihloko xa nkulumo ya le rivaleni ya vhiki rero naswona u n’wi rhamba leswaku a va na wena eHolweni ya Mfumo.
4 Loko u rhambe n’wini wa muti eXitsundzuxweni, vula leswi:
◼ “Nkarhi lowu hundzeke loko ndzi ku endzerile, hi vulavule hi nkoka lowukulu wa rifu ra Yesu evanhwini. Ndzi tlhele ndzi ku rhamba leswaku u va kona eXitsundzuxweni xa rifu rakwe, lexi nga ta tlangeriwa hi Vakreste emisaveni hinkwayo hi March 26. Namuntlha ndzi tile ku ta ku tsundzuxa leswaku wa rhambiwa eka xiendlakalo xexo xa nkoka. [Vula nkarhi ni ndhawu ya nkhuvo.] Swi nga ha ku pfuna leswaku u vona nkoka wa xiendlakalo lexi loko hi pfuxeta yin’wana ya mikateko leyi hi yi tsakelaka sweswi tanihi vuyelo bya leswi Yesu a swi endleleke vanhu, ku katsa ni mikateko yin’wana leyi nga ta ta.” Loko swi koteka, hlela leswaku u pfuna munhu la tsakelaka leswaku a va kona eXitsundzuxweni.
5 Loko munhu yoloye a ri muyingiseri lonene ntsena, leswi swi nga ha pfuna:
◼ “Ndzi ku tsakele ngopfu ku vulavurisana ka hina ka sweswinyana hi Bibele. Ndzi vuyile hikuva ndzi lava ku ku vona u tsakela leswi Xikwembu xi swi tshembisaka vanhu lava lavaka ku dyondza swo tala hi xona.” Hlaya Yohane 17:3, kutani u n’wi komba xiphephana lexi nge Vutomi eMisaveni Leyintshwa Ya Ku Rhula.
6 Onge rirhandzu ra wena hi vutomi ni ku tsakela nkutsulo swi nga ku susumetela ku endla maendzo yo vuyela eka vanhu lava tsakelaka. Va pfune va teka goza leri fambisanaka ni marungula lama tsakisaka ya Mfumo. Tsundzuka, “nkari wu kusuhi” !—Nhlav. 1:3.