Va Khutaze Leswaku Va Va Valandzeri Va Yena
1 Eka 1 Vakorinto 3:6, Pawulo u tsarile: “Mina ndzi byarile, Apolosi ú cheletile; kambe Xikwembu hi xona xi miriseke.” Pawulo u tirhise nhlamuselo leyi leswaku a pfuna vamakwavo ku vona xilaveko xo tirha hi vun’we ehansi ka vunhloko bya Kreste. Hi mukhuva wolowo u tlhele a va pfuna leswaku va twisisa xiphemu xa nkoka lexi va xi hetisisaka entirhweni wa nkoka wo byala ni ku cheleta.
2 Ntirho wolowo wo ponisa vutomi wu ta fikisiwa emakumu enkarhini lowu. Tanihi Vakreste lava tinyiketeleke, hi hetisisa vutihlamuleri lebyikulu byo pfuna van’wana leswaku va va valandzeri va Yesu. (Mint. 13:48) Xana u nga ku landzelela njhani ku tsakela loku u ku pfuxeke hi ku tirhisa buku leyi nge Nghwazi Leyi Tshameke Yi Hanya?
3 Loko u endzela munhu loyi a tekeke buku, u nga ha ku:
◼ “Eku sunguleni, hi bule hi leswi Yesu Kreste a ri xiswona tanihi munhu. Ndzi tsakele ku ku siyela buku leyi nge Nghwazi Leyi Tshameke Yi Hanya. I yini lexi ku tsakiseke ngopfu malunghana ni ku dyondzisa ka Yesu ni hi vumunhu bya yena?” Yimela nhlamulo. Pfula ndzima 113, kutani u hlamusela xikombiso lexinene ngopfu xa Yesu xa ku titsongahata. Hlaya Vafilipiya 2:8 u kombisa ndlela leyi muapostola Pawulo a ri tekeke ha yona langutelo ra Yesu ro titsongahata. Kutani u nga hlamusela ndlela leyi ku nga dyondziwaka leswi engetelekeke ha yona hi dyondzo ya nkarhi na nkarhi ya Bibele.
4 U nga ha tsakela xingheniso lexi:
◼ “Hi vulavule hi swilo leswi Yesu a swi endleke loko a ha ri emisaveni leswi kombisaka leswaku wa hi khathalela hakunene. Xana u ehleketa leswaku u ta endla yini eku heteleleni leswi nga ta ntshunxa lava xanisekaka hi ndlela leyi?” Yimela nhlamulo. Pfula ndzima 133, kutani u bula hi tinhlamuselo leti nga eka ndzimana ya vuntlhanu. Pfula xifaniso lexi nga eka tluka leri landzelaka, kutani u hlamusela leswi nga ta va xiswona loko ku rhandza ka Xikwembu ku endliwa emisaveni tanihi le tilweni. Kombisa mpfuno lowu nga kumiwaka hi ku dyondza leswi engetelekeke.
5 Loko u nga swi kotanga ku fambisa buku eku sunguleni hi mhaka ya ku tsakela loku nga nyawuriki, kumbexana u nga sungula bulo ra wena hi ndlela leyi:
◼ “Ndza tshemba ha pfumelelana leswaku vanhu vo tala namuntlha evuton’wini va tekelela munhu loyi va n’wi vonaka a ri emahlweni. Yesu Kreste i munhu loyi a nga emahlweni swinene loyi un’wana ni un’wana a nga n’wi tekelelaka. Ndzi tsakela ku avelana na wena dyondzo ya nkoka swinene leyi ndzi yi kumeke hi ku dyondza hi xikombiso lexi vekiweke hi Yesu. [Pfula ndzima 40 ya buku leyi nge Nghwazi, kutani u yisa nyingiso eka dyondzo leyinene ya Yesu ya ntwela-vusiwana.] Leswi swi ndzi tsundzuxe kahle hi laha ndzi faneleke ku yi kombisa hi xitalo ha kona mfanelo leyi eka van’wana.” Hlaya Matewu 5:7. Loko sweswi ku vonaka ku ri ni ku tsakela lokukulu, fambisa buku kumbe broxara leyi nge Xana Xikwembu Xa Hi Khathalela Hakunene?
6 Kumbexana u nga ha lava ku ringeta manghenelo lawa yo kongoma:
◼ “Eriendzweni ra mina leri hundzeke, hi bule hi nkoka wa ku kuma vutivi hi Yesu. Yohane 17:3 yi vula leswaku swi ‘vula vutomi lebyi nga heriki’ ku kuma vutivi byo tano. Xana hi nga swi endla njhani sweswo?” Yimela nhlamulo. Yana emahlweni u hlamusela lunghiselelo ra hina ra dyondzo ya Bibele ni ndlela yo ri tirhisa.
7 Pawulo u vula leswaku mutirhi entshovelweni u “ta amukela hakelo ya yena hi mpimo wa ntirho wa yena.” (1 Kor. 3:8) Loko hi tinyiketela hi matimba leswaku hi pfuna van’wana leswaku va va valandzeri va Yesu, hakelo ya hina yi ta va leyikulu swinene.