Rhamba Van’wana Leswaku Va Landzelela Nghwazi
1 Tanihi laha swi tsariweke ha kona eka Matewu 5:14, Yesu u byele vadyondzisiwa vakwe a ku: “N’wina mi ku vonakala ka misava.” Valandzeri va Yesu a va fanele ku byela vanhu hinkwako hi Mfumo wa Yehovha ni lunghiselelo ra Yena ra rirhandzu ra nkutsulo hi ku tirhisa Yesu. Hi ri ni xileriso xexo emianakanyweni, hi n’hweti ya December hi langutele ku fambisa buku leyi nge Nghwazi Leyi Tshameke Yi Hanya. Hi leswi swiringanyeto swin’wana leswi u nga ha lavaka ku swi tirhisa.
2 Endzhaku ka ku titivisa, u nga ha vula leswi landzelaka hi marito ya wena:
◼ “Vo tala va tivutisa leswaku Yesu a ri njhani loko a hanya tanihi munhu laha misaveni. Xana u ehleketa leswaku a hambane ni van’wana hi tindlela tihi? [Yimela nhlamulo.] Buku leyi leyi nyanyulaka, leyi nge Nghwazi Leyi Tshameke Yi Hanya, yi rungula tinhla-nkulu ta vutomi ni vutirheli byakwe, naswona yi hlamusela muxaka wa munhu loyi a ri yena. Endzhaku ka ku yi hlaya, van’wana va titwe onge va ve ni lunghelo ro hanya na yena hi byakwe, va xaniseka na yena ni ku vona vutirheli bya yena hi ku kongoma.” Kombisa xifaniso xo sungula ebukwini, lexi nga ni vito ra yona. Kutani pfula xingheniso xa buku leyi ivi u hlaya ndzimana ya vumbirhi ehansi ka xihlokwana lexi nge “Pfuneka Hi Ku Dyondza Hi Ta Yena.” Fambisa buku hi munyikelo wa R10,50.
3 Kumbe u nga ha vula swo fana ni leswi:
◼ “Enguveni leyi vanhu va ehleketa hi Yesu. Hambi swi ri tano, hikwalaho ka leswi ku humelelaka swilo swo tala leswo biha emisaveni hinkwayo, van’wana va nga ha tivutisa loko Yesu a hi khathalela hakunene. Xana u titwa njhani hi mhaka leyi?” Yimela nhlamulo. Pfula ndzima 24 ya buku leyi nge Nghwazi, kutani u hlamusela xivangelo xa ku va Yesu a te emisaveni hi ku komisa. Kutani hlaya Yohane 15:13, u kandziyisa rirhandzu lerikulu ra Yesu hi van’wana. U nga rivali ku va ni timagazini ta sweswinyana, broxara kumbe xiphephana lexi faneleke leswaku u ta swi fambisa loko buku yi nga tekiwi.
4 Hi lexi xiringanyeto xin’wana:
◼ “Vantshwa vo tala va lava ku tekelela vanhu va le mahlweni, kambe swa nonon’hwa ku kuma lavanene. Yesu Kreste u vekele un’wana ni un’wana xikombiso lexi hetisekeke. [Hlaya 1 Petro 2:21.] Vutomi byakwe hinkwabyo a byi tirhisela ku gandzela Tata wakwe wa le tilweni. Xana u ehleketa leswaku a swi ta va njhani loko vanhu hinkwavo vo ringeta ku n’wi tekelela?” Yimela nhlamulo. Bula hi ndzimana ya vumune eka tluka ra le mahlweni ka lero hetelela ra buku, leri hlamuselaka timfanelo takwe leto hlawuleka. Hlamusela ndlela leyi buku leyi nge Nghwazi yi nga hi pfunaka ha yona hinkwerhu ka hina leswaku hi va Vakreste vo antswa.
5 U nga ha lava ku tirhisa swin’wana swo fana na leswi:
◼ “Loko munhu a vulavula hi Yesu Kreste, vanhu vo tala va n’wi teka tanihi n’wana kumbe tanihi munhu la xanisekaka loyi a nga ekusuhi ni ku fa. Mianakanyo ya vona hi Yesu yi katsa ku velekiwa ni ku fa ka yena ntsena. Hakanyingi swilo swo hlamarisa leswi a swi vuleke ni ku swi endla hi nkarhi wa ku hanya ka yena a swi lemukiwi. Leswi a swi endleke swi khumba munhu un’wana ni un’wana loyi a tshameke a hanya emisaveni leyi. Hi yona mhaka leyi swi nga swa nkoka leswaku hi dyondza swo tala hi laha hi nga kotaka ha kona malunghana ni swilo leswi a hi endleleke swona.” Hlaya Yohane 17:3. Pfula tluka ro sungula ra xingheniso xa buku leyi nge Nghwazi, kutani u hlaya ndzimana ya vumune. Hlamusela ndlela leyi buku yi nga kumiwaka ha yona ni ku tirhiseriwa dyondzo ya munhu hi xiyexe.
6 Tiyiseka leswaku u tsala rhekhodo ya lava tsakelaka ni ya lomu u yi fambiseke kona leswaku u ta endla maendzo yo vuyela. Loko ka ha ri ni nkarhi, a hi tikarhateleni ku lava vanhu lava nga ni timbilu letinene ni ku va pfuna leswaku va va valandzeri va Muponisi wa hina, Yesu Kreste.—Mt. 16:24.