Tshama U Ri Karhi U Xiyisisa Ku Dyondzisa Ka Wena

¹ Nongonoko lowuntshwa wa Xikolo xa Vutirheli bya le Tilweni wu ta sungula hi January 1995. Xana i yini lexintshwa enongonokweni? Matimu lama nyanyulaka ya nhlengeletano ya Yehovha ya manguva lawa ma ta va nhloko-mhaka ya bulo eka tinkulumo to tala to laya. Lembe hinkwaro, ku ta kambisisiwa matluka ya 178 ya buku leyi nge Timbhoni Ta Yehovha I Vahuweleri Va Mfumo Wa Xikwembu. Tanihi leswi ku nga ta ka ku nga vi na swivutiso swa mpfuxeto leswi landzelaka nkulumo yo laya leyi humaka ebukwini leyi nge Vahuweleri, xana hi nga endla yini leswaku hi xiyisisa ku dyondzisa ka hina ni ku endla leswaku ku vuyerisa swinene?​—⁠1 Tim. 4:⁠16.

² Hambi leswi vo tala ana se va hlayeke buku leyi nge Vahuweleri, ku kambisisiwa ka mhaka leyi nga eka xiyimiso xa xikolo ku ta pfuna hinkwavo leswaku va tlangela ndzhaka ya vona ya moya ku tlurisa. (Ps. 71:​17, 18) Ha yini mi nga veki nkarhi wo karhi etlhelo vhiki rin’wana ni rin’wana leswaku mi ta pfuxeta mhaka leyi aviweke ebukwini leyi nge Vahuweleri?

³ Tinkulumo To Laya Leti Hanyaka Ni Leti Tsakisaka: Tinkulumo to laya leti humaka ebukwini leyi nge Vahuweleri ti fanele ku nyikeriwa hi mukhuva lowu hanyaka ni lowu tsakisaka. Nakambe ti fanele ku kandziyisa nkoka lowu tirhaka wa rungula, ti tirhiseriwa ku kombisa xichavo lexi enteke enhlengeletanweni ya Yehovha ni ku tlangela malunghelo lawa hi nga na wona tanihi malandza ya Xikwembu. Loko ndyangu wun’wana ni wun’wana lowu vaka kona eXikolweni wu ta ni buku leyi nge Vahuweleri eminhlanganweni, swirho swa ndyangu swi nga yi landzela kahle nkulumo yo laya ni ku pfuneka hi minkombiso ni swifaniso leswi nga ebukwini.

⁴ Ku Hlaya Ka Bibele Loku Tlhontlhaka Mianakanyo: Ku hlaya kahle, u kandziyisa mongo ni ntlhaveko, i xiphemu xa nkoka xo dyondzisa hi ndlela leyi humelelaka. Ku engetela kwalaho, mhaka leyi averiweke ku hlayiwa eka Nkulumo No. 2 a yi lehanga ngopfu, naswona xivulavuri xi ta va ni nkarhi lowunene wo vula marito yo pfula ni marito yo gimeta. Masungulo ma fanele ku pfuxa ku tsakela emhakeni leyi aviweke ni ku endla vayingiseri va lunghekela ku twisisa nkoka wa yona lowu tirhaka. Mahetelelo ma nga ha katsa marito yo hlamusela ni ku tirhisiwa ka mhaka, kutani xivulavuri xi wu tirhisa hi xitalo nkarhi lowu vekiweke.

⁵ Tinhlamuselo leti engetelekeke malunghana ni nongonoko wa xikolo ni ndlela leyi swiavelo swi faneleke ku tameriwa ha yona swi nga kumiwa eka “Xiyimiso Xa Xikolo Xa Vutirheli Bya Le Tilweni Xa 1995.” Hi xiyisisa ku dyondzisa ka hina hi ku pfuxeta swiletelo emhakeni leyi, hi ku lunghiselela swiavelo swa hina kahle, ni hi ku tirhisa ndzayo leyi hi nyikiwaka yona, leswaku hi ta antswisa madyondziselo ni mavulavulelo ya hina. Lava nga siki tsarisaka exikolweni va rhambiwa hi rirhandzu leswaku va endla tano.