Vuyeriwa Exikolweni Xa Vutirheli Bya Le Tilweni Xa 1996—Xiyenge 2
1 Endzhakunyana ka ku sungula ka Xikolo xa Vutirheli bya le Tilweni hi 1943, rin’wana ra marhavi ya Sosayiti ri vikile: “Lunghiselelo leri ra kahle ri humelerile ku nga si hundza nkarhi wo leha eku pfuneni van’wana vo tala lava a va anakanya leswaku a va nge pfuki va ve swivulavuri leswaku va va lava humelelaka swinene epulatifomo ni le nsin’wini.” Xikolo xi hambeta xi nyikela ndzetelo lowunene ngopfu, lowu hinkwerhu ka hina hi wu lavaka.
2 Ku Hlaya Ka Bibele: A hi lava nyikelaka tinkulumo exikolweni ntsena lava pfunekaka. Entiyisweni, hinkwerhu ka hina hi na xiavelo—ku hlaya ka Bibele ka vhiki na vhiki. Xiyimiso xa xikolo xi komba tindzimana ta Bibele leti nga ta hlayiwa vhiki rin’wana ni rin’wana. Ku na switsundzuxo swo tala swa Matsalwa leswi kandziyisaka nkoka wa ku hlaya Bibele siku na siku. (Yox. 1:8; Ps. 1:2; Mint. 17:11) Ku hlaya ka Bibele i ka nkoka eka rihanyo ra moya; ku wundla mianakanyo ni mbilu. Loko hi hlaya Bibele kwalomu ka timinete ta ntlhanu hi siku, hi ta swi kota ku fambisana ni xiyimiso. Loko lembe ri hela, hi ta va hi hlaye tindzimana ta 150 ta Rito ra Xikwembu. Loko hi tshama hi veke Bibele erivaleni, hi ta swi kota ku hlaya xiphemu xa yona siku na siku.
3 Nkulumo Yo Laya: Leswaku vamakwerhu va pfuniwa ku tirha hi ku tshembeka ni hi ku hiseka, xivulavuri lexi nyikelaka nkulumo yo laya xi fanele xi tirhisa madyondziselo lamanene, leswaku xi va endla va twisisa, ni ku va endla va tlangela Yehovha, Rito ra yena ni nhlengeletano ya yena. Vakulu ni malandza ya vutirheli va nga hetisisa leswi hi ku lunghiselela kahle, va endla nkulumo ya vona yi twanana ni nhloko-mhaka, va vulavula hi ndlela leyi khorwisaka, naswona va endla mhaka yi hanya. (Hev. 4:12) I swa nkoka leswaku xivulavuri xi hlayisa nkarhi lowu vekiweke. Buku leyi nge “Matsalwa” yi tele hi tindzimana ta Bibele naswona yi na timhaka to hambana-hambana ta Matsalwa lama tsakisaka leti nga hi pfunaka emoyeni. Buku leyi nge Vahuweleri yi na matimu ya manguva lawa ya nhlengeletano ya Yehovha leyi vonakaka naswona yi hlamusela leswi endlekeke evuton’wini bya vanhu lava kombiseke ripfumelo, ku hiseka, ku tinyikela ni rirhandzu. Ku na swo tala swo swi dyondza mayelana ni ndzhaka ya hina ya le henhla ni ndlela leyi Yehovha a katekiseke vanhu va yena eminkarhi ya manguva lawa.
4 Tinhla-nkulu Ta Bibele: Vamakwerhu lava nyikiwaka xiavelo lexi va fanele va hlawula tindzimana to karhi leti nga tirhisiwaka hi ndlela leyi twalaka leswaku ku pfuneka vandlha. Leswi swi lava leswaku ku hlayiwa tindzimana leti averiweke, ku anakanyisisa ha tona, ni ku endla ndzavisiso hi tindzimana leti hlawuriweke leswaku ku kumiwa tinhla leti nga ta paluxa leswi matsalwa wolawo ma swi vulaka. Eka matluka ya le ndzhaku ya Watch Tower Publications Index, ku ni “Xikombo Xa Matsalwa,” lexi nga pfunaka ku kuma rungula ra tindzimana to karhi ta Bibele. Vamakwerhu lava tamelaka xiphemu lexi va fanele va hlawula kahle naswona va papalata ku nghenisa mhaka leyi nga fanelangiki. A va fanelanga va lunghiselela mhaka yo tala leyi swi nga taka swi nga koteki ku yi hlanganisa hi tsevu wa timinete.
5 Hinkwerhu ka hina hi nga pfuneka eka Xikolo xa Vutirheli bya le Tilweni. Xi nga hi pfuna leswaku hi antswisa mavulavulelo ya hina ni ku antswisa vuswikoti bya hina byo dyondzisa. Ku tirhisa lunghiselelo leri hi xitalo, kunene swi ta hi pfuna ku endla leswaku ‘hinkwavo va vona hilaha hi yaka emahlweni hakona.’—1 Tim. 4:15.