Ku Tirhisa Tibuku Ta Hina Hi Ndlela Leyinene
1 Yehovha u hi nyike ndzalo ya swakudya leswi fuweke swa moya. Vunyingi bya swakudya leswi byi kumeka eka tibuku ta matluka ya 192. Hi January hi ta va hi fambisa buku ya matluka ya 192 leyi nge Xana Vutomi Lebyi Byo Va Na Sweswi Ntsena? Loko u nga ri na tona tikopi ta buku leyi ekaya, hi kombela u tikumela tona ekhawuntarini ya tibuku. Swi ta va swinene ku pfuxeta tinhla tin’wana to vulavula ha tona leti u nga ti tirhisaka eka rungula ra wena.
2 Loko u fambisa buku leyi nge “Xana Vutomi Lebyi Byo Va Na Sweswi Ntsena?,” u nga ha sungula hi ku vula leswi:
◼ “Ndza tshemba leswaku u ta pfumela leswaku swi languteka swi nga koteki ku tiphina hi ntsako wa xiviri emisaveni hambi ku ri swa xinkarhana hikwalaho ka swiphiqo hinkwaswo leswi hi langutaneke na swona swo tanihi vuvabyi, ku dyuhala, ndlala, vugevenga ni ku pfumaleka ka nsirhelelo. [Pfumelela n’wini wa muti leswaku a hlamusela.] Ku ni swivangelo leswinene leswi nga hi endlaka leswaku hi tshemba leswaku hakunene swa koteka ku hanya hi laha ku nga heriki hi ntsako emisaveni. Xivangelo xin’wana hi leswaku Xikwembu xi hi tshembisa sweswo. Xiya leswi vuriwaka laha eka Pisalema 37:29. [Hlaya.] Kambe ku vuriwa yini hi swilo leswi vangaka leswaku hi pfumala ntsako leswi hi vulavuleke ha swona? Eka Nhlavutelo 21:3, 4 Xikwembu xi tshembisa ku swi herisa. [Hlaya.] Ndza tshemba leswaku u nga lava ku dyondza swo tala, kutani ku ku pfuna ku endla tano, hi fambisa buku leyi.” Kutani kombisa n’wini wa muti yinhla yo karhi leyi nga ebukwini.
3 Xingheniso xin’wana xi nga ha va xo fana ni lexi:
◼ “Xana u tshama u navela rihanyo lerinene leri nga ta ka ri nga heli? [Pfumelela n’wini wa muti leswaku a hlamula.] Hi ku va ni rihanyo leri hetisekeke, vutomi byi nga tsakisa swinene. Xana a wu swi tiva leswaku eBibeleni, eka Nhlavutelo 21:1-4, Xikwembu xi hi tshembisa leswaku nkarhi wa ta lowu vuvabyi hambi ku ri rifu swi nga ta nyamalala? [Hlamusela tindzimana 1-3 hi ku komisa kutani u hlaya Nhlavutelo 21:4 loko swi koteka.] Leswi hi leswi vanhu va swi khongelelaka loko va kombela Mfumo wa Xikwembu leswaku wu ta ni leswaku ku rhandza ka xona ku endliwa emisaveni. Xana u nga tsakela ku dyondza swo tala malunghana ni xitshembiso lexi lexi hlamarisaka? [Kombisa buku.] Xipfuneto lexi xo dyondza Bibele xi ni ndzima leyi nga ni xihloko lexi nge ‘Misava Leyi Ntshunxekeke eMavabyini Ni Le Rifini.’ Ndza tshemba leswaku u ta tiphina hi ku yi hlaya. U nga tikumela buku hi R1,00 ntsena.”
4 U nga ha hlawula ku tirhisa broxara leyi nge “Xana Xikwembu Xa Hi Khathalela Hakunene?” Loko swi ri tano, u nga vula leswi:
◼ “Vanhu vo tala va tivutisa leswaku ha yini Xikwembu xi pfumelela ku xaniseka konghasi emisaveni. Loko xi ri ni matimba hinkwawo, ha yini xi nga endli swin’wana leswaku xi herisa mahlomulo ya hina? Xana u titwa njhani? [Yimela nhlamulo.] Bibele ya hi tiyisekisa leswaku Xikwembu a xi hi tshikanga.” Pfula tluka 27, ndzimana 22, kutani u hlaya Pisalema 37:11, 29. Kombisa xifaniso lexi tsakisaka lexi hlamuselaka leswi hi nga swi langutelaka. Loko broxara yi amukeriwa, hlela ku tlhela u vuya leswaku u ta kombisa ndlela leyi yi nga tirhiseriwaka dyondzo ya Bibele ha yona.
5 Tibuku ta hina ti susumetele vanhu va magidi leswaku va kambisisa Bibele swinene. Leswi va swi dyondzeke swi va tisele ntshembo wa vumundzuku lebyi tsakisaka. (Ps. 146:5) I lunghelo ra hina ku va pfuna.