Ku Landzelela Xikombiso Xa Hina Tanihi Vabyarhi Va Ku Vonakala
1 Yesu u vule leswi mayelana na yena: “Hi mina ku vonakala ka misava.” Hi ku landzelela xikombiso xa yena, vadyondzisiwa va Yesu na vona a va ri “ku vonakala ka misava.” (Mt. 5:14) Tanihi “ku vonakala ka misava,” Yesu u vule leswaku hinkwavo lava n’wi landzelaka va ta kuma “ku vonakala ka vutomi.” (Yoh. 8:12) Sweswo swi hi endla vabyarhi va ku vonakala va moya, lava nga fanelangiki ku pfumelela nchumu xi sirha kumbe ku sivela ku vonakala koloko.
2 Nhlengeletano ya Yehovha yi nyikela vuleteri byo hi komba ndlela leyi hi nga vaka vabyarhi va ku vonakala lava humelelaka ha yona. Loko hi yi landzelela kahle ndzayo ni nkongomiso lowu hi wu kumaka, hi ta kota ku voningela vanhu vo hambana-hambana malunghana ni ntiyiso wa Mfumo. (1 Tim. 4:6) Ku tirha tanihi vabyarhi va ku vonakala a swi katsi ku vulavula ntiyiso nkarhi wun’wana ni wun’wana ntsena kambe swi katsa ni ku hlayisa hanyelo lerinene tanihi Vakreste. Hanyelo ra Xikombiso xa hina a ri ri hava xisolo. Tanihi valandzeri va yena, hi fanele ku kombisa leswaku Vukreste i ndlela ya hina yo hanya ya siku na siku. (Ef. 5:9; Tito 2:7, 8, 10) Hi fanele ku humesa mintirho leyinene leyi van’wana va nga yi vonaka, yi va susumetela ku dzunisa Xikwembu.—Mt. 5:16.
3 Mbhoni yin’wana yi tshame yi kuma xikombelo lexi nga tolovelekangiki loko yi famba hi yindlu na yindlu. Wanuna wa muti ni nsati wa yena a va vabya ngopfu, kambe a va lava ku ya veka mali yo karhi ebankini. Va vutise Mbhoni loko yi nga swi endla. U pfumerile ivi a nyikiwa R7 250 leswaku a yi yisa ebankini! Loko a vuyile u vutisile a ku: “Xana mi nga ndzi tshemba njhani mi nga ndzi tivi ni ku ndzi tiva?” Nhlamulo: “Ha swi tiva, naswona un’wana ni un’wana wa swi tiva leswaku Timbhoni ta Yehovha hi vona vanhu lava tshembekaka ntsena.” Mawaku ndlela leyi hi faneleke ku khensa ha yona leswi ku namarhela ka hina misinya ya milawu ya Bibele swi tisaka ndhuma yo tano leyi xiximaka Xikwembu!
4 Mudyondzisi wa ntlawa wa le hansi u hlamusele tlilasi ya yena xivangelo xa ku va xichudeni lexi nga Mbhoni xa malembe ya tsevu hi vukhale xi nga hlanganyeli eku sasekiseni ka swifaniso swa Halloween. Mudyondzisi u vule leswaku a a tinyungubyisa hi xona hikwalaho ko va ni xivindzi xo hambana ni van’wana hikwalaho ka leswi xi swi pfumelaka. Mudyondzisi u vule leswaku, loko hi pfumela eka xokarhi hi fanele ku va ni xivindzi xo xi yimela. Vusiku byolebyo mudyondzisi u kambisise vupfumeri bya yena ivi a swi xiya leswaku a nga kombisanga xivindzi lexi fanaka xo yimela leswi a swi pfumelaka. Siku leri landzelaka u vule leswaku a nga ha ta tlhela a katsa tlilasi ya yena eku tlangeriweni ka tiholideyi ka nkarhi lowu taka, leti tin’wana ta tona a nga pfumeli eka tona!
5 Vanhu va Yehovha va hisekela ku voningisa ku vonakala ka vona, ku nga khathariseki leswaku va kwihi. Ku tikhoma loku nga xikombiso ka vantshwa exikolweni ku tsakise vadyondzi-kulobye ni vadyondzisi. Timbhoni leti kuleke leti kombisaka ku tikhoma lokunene laha ti tshamaka kona ti vangela van’wana leswaku va vulavula kahle hi rungula ra Mfumo. Ku veka vumbhoni hi xitshuketa ehansi ka swiyimo swo tala swi koka vanhu va timbilu letinene lava lavaka ku dyondza leswi engetelekeke. Hambi ku ri ku hiseka ni ku tshembeka entirhweni wa hina wo tihanyisa swi veka vumbhoni. Ina, ku nga khathariseki leswaku hi le kwini kumbe hi endla yini, hi nga pfuxa ku tsakela ntiyiso.
6 Hi ku veka mahlo ya hina eka muxaka wa vutomi lowu hetisekeke wa Xikombiso xa hina lexikulu, hi nga ya emahlweni hi hetisisa vutshila bya hina tanihi vadyondzisiwa va yena. Ku tekelela xikombiso xa yena swi ta tiyisekisa leswaku ku vonakala ka hina ku “voninga hinkwavo.”—Mt. 5:15; 1 Pet. 2:21.